Hatutan.com, (24 Maiu 2025), Díli-Empreza KAPSTAAD Unipessoal Lda ho nia parseiru   TogoEuro Exim Gaming, Sábadu (24/05/2025),  ofisialmente lansa indústria jogu online ida iha Timor-Leste.

Empreza KAPSTAAD Unipessoal Lda ho nia parseiru TogoEuro Exim Gaming, ofisialmente lansa jogu online, Sábadu (24/05/2025). Foto/Elio dos Santos da Costa

Lansamentu Jogu online ne’e realiza iha Beach Garden Otel, Díli, ho intensaun bele fó kontribuisaun sosiál ba avansu ekonómiku no sosiál Timor-Leste nian iha mundu.

Diretór TogoEuro Exim Gaming, Inacio Moreira iha ámbitu serimónia lansamentu indústria jogu online ne’e fundamenta katak, jogu online ne’e  sei lori Timor-Leste ba oin, la’ós de’it iha kontinente Asia, maibé hahú  viajen ne’ebé naruk ba avansu sosiál no ekonómiku iha Timor-Leste.

Iha esperansa iha tinan 6 liu ba katak Governu sei bele halibur osan hodi suporta projetu sosial no governamental iha Timor-Leste liu husi hala’o atividade jogu online divertidu, sosial, no lokal husi ARL KAPSTAAD Unip.Lda, maibe infelizmente seidauk akontese, agora ARL KAPSTAAD Unipessoal Lda hetan parseiru husi TogoEuro Exim Gaming S.A halo ona kompromisu hanesan parseiru hodi hala’o atividade jogus online ho responsabilidade no fiar katak Timor-Leste sei sai koñesidu iha mundu tomak nu’udar sentru ba atividade jogu online ne’ebé diak, seguru, ekuitativu, no responsavel.

“Ami espera katak nasaun nia avansu sosiál no kreximentu ekonómiku bele hetan apoiu hosi inisiativa haree ba benefisiu potensiál sira ba Timor-Leste nia setór turizmu, traballadór, no jogu sira, ARL sira hanesan ne’e TogoEuro Exim Gaming S.A. iha kolaborasaun ho Ministériu Turizmu, espesial liu ba Inspektor  Jerál Jogu, sente kontente atu lansa ami nia jogu online ne’e,” Inácio Moreira hateten.

Inácio hateten sira-nia parte dedikadu atu halo  “Kontribuisaun Sosial” ba avansu ekonómiku no sosial Timor- Leste nian, hanesan ezije hosi Dekretu Lei Nú.6 hodi rontu atu aloka porsentu 15 hosi atividade jogu online  nia rendimentu líkidu.

Inácio Moreira kontinua husu apoiu ba ema hotu-hotu liuliu ministeriu kompetente, espesiál liubá Inspektor  Jogu atu kontinua halo aktividades sira n’ee ho divertidu, ekuitativu no konfiavel.

Jogu online. Foto/Elio dos Santos da Costa

KAPSTAAD Unipessoal Lda ho nia parseiru  TogoEuro Exim Gaming sei introdús uluk jogu sorteiu online lubuk ida ne’ebé inklui variasaun oioin hanesan hosi “Seis Bolas”, (Bola neen) tanba aloka entre 56% to’o 76% hosi nia reseita brutu totál ba jackpot ka manan sira, ida-ne’e signifika katak bainhira kliente sira joga Kapstaat – TogoEuro Exim Games beibeik liu, jackpot sira sei aas liu tan deit no jogu Offshore Online Gaming mak hanesan Futu Mano, halai taru kuda, Cripto Currancy no seluk seluk tan ne’ebé prepara hela atu ajuda Timor-Lestse hodi hamosu reseitas barak liutan.

“Ami hein katak hirak ne’e sei fó benefisiu boot, la’ós de’it ba manan-na’in sira, maibé mós ba Timor-Leste, tanba ami mós sei selu taxa 10% ba manán hotu-hotu,” Inácio Moreira hateten.

Iha fatin hanesan CEO ARL KAPSTAAD Unipessoal.Lda, Gregorio Saldanha, dehan, inisiativa ida ne’e sei loke dalan ba futuru ida prospeiru no sustentavel ba Timor-Lestse, ne’e la’ós deit jogu, maibé oportunidade boot atu transforma iha área ekonomia sosiedade ne’ebé mehi hamutuk husi kedas tempu naruka ba kotuk.

Tuir Gregorio Saldanha katak online game sei lori benefisiu konkreta ba Timor-Leste hodi diversifika ekonomia hodi  hamenus dependensia ba minarai no gas, setor ne’ebé limitadu no naun renovavel, online game sei loke rendimentu foun husi teknolojia entre atendementu hodi karante estabilidade ekonomika ba jerasaun sira tuir mai.

“Hodi haburas setor turismu ho plataforma digital ita bele atrai turista sira husi mundu tomak, sira sei koñese ita-nia kultura ita-nia istoria no beleza Timor-Leste nian, liu husi esperensia interativa ne’ebé promove ita nia identidade iha Global. Hodi aumenta kofer estadu, rendimentu husi online game suporta projeitu importante sira iha edukasaun, saude no infrastrutura sira seluk iha komunidade nia let,” nia informa.

Timor-Leste iha ona industria jogu online. Foto/Elio dos Santos da Costa

Online game ne’e, Gregorio Saldanha hateten, inisiativa ida ne’e sei kria kampu serbisu ba  joven sira tuir área teknologia, programasaun, dezeñu  no jestaun. Timor oan sira sei iha fatin atu hatudu sira nia talentu hodi hamenus dezempregu no habelar prosperiedade, hodi reduz problema sosial ba oportunidade produtivu  bele lori joven sira ho atividade ne’ebé possetivu. Online game sei halo ema hotu prevene konflitu iha sosiedade sira hodi hametin unidade no harmonia iha rain no komunidade nia let.

“Hodi aselera dezenvolvimentu nasional, investimentu internet infrastrutura dijital no teknolojia moderna sei halo Timor-Leste sai nasaun ne’ebé kompetetivu, ita sei iha dalan atu hamrik iha era dijital ho kapasidade atu kompete iha merkadu,” Gregorio Saldanha tenik.

Nu’udár na’in ba empreza nasional KAPSTAAD Unipessoal Lda, Gregorio Saldanha  hato’o Obrigadu ba Governu da-ualu tamba lisensa ne’e hahú hetan kedas iha ne’ebá no mós Governu da-sia ne’ebé autoriza no lisensa operasaun offshore no onshore online game no mós agradesementu hanesan ba kompaiña internasional ne’ebé hakarak halo parseira ho Timor oan hodi lori mudansa mai Timor-Leste liu husi online game.

Jornalista: Elio dos Santos da Costa