Hatutan.com, (17 Juñu 2025), Díli— Tribunál Judisiál Primeira Instánsia Dili (TJPID), Segunda  (16/06/2025), deside presede prosede ka kontinua ba julgamentu arguido na’in-13 ne’ebé envolve iha kazu droga iha tinan 2022.

Lee Mós: Iha Relasaun ho Arguido Na’in-Sia Kazu Droga, Suspeitu FA Submete bá PI

PCIC lori arguidu sira kazu ilísitiu bá droga bá TDD, Segunda (15/08/2022). Foto/Dok.Hatutan.com

Tribunál prosede arguido na’in-13 ne’e bá julgamentu  ho  razaun tanba  hafoin Tribunál verifika tiha  faktu no provas sira ne’ebé Ministériu Públiku aprezenta iha  akuzasaun   nune’e Tribunál haree katak arguidu na’in-13 iha indísiu sufisiente  envolve iha kazu droga.

Juis José Quintão afirma bá ariguidu sira  ho Defensoria  Públiku inklui advogadu privadu sira katak,  debate instrusaun ida ne’e ninian objetivu mak atu verifika faktu no prova sira ne’ebé Ministériu Públiku konsta iha akuzasaun atu haree ida ne’ebé mak prienxe hodi Tribunál bele avansa ba julgamentu, tanba ne’e Tribunál pronúnsia katak faktu no prova sira ne’ebé konsta iha akuzasaun Ministériu Públiku nian ne’e maioria valida  no iha balun mak nulu.

Tribunál pronúnsia katak ba arguidu na’in-13 ne’ebé konsta iha akuzasaun ne’e iha  indísiu sufisiente komete bá iha krime droga nune’e Tribunál deklara kazu ida ne’e kontinua ba julgamentu.

Juis Quintão fundamenta  iha nia desizaun hodi  afirma katak só iha faktu balun mak Tribunál konsidera la provadu ka nulu mak momentu Servisu Nasionál Intelijénsia (SNI) ba halo apreensaun buska domisiliariu bá arguidu  MA nia rezidénsia no Ev nia rezidénsia iha área Fomento, Díli.

Tribunál konsidera katak momentu ekipa SNI ba halo apreensaun no buska domisiliariu iha arguidu na’in-rua nia rezidénsia ne’e la ho mandadu judisiál. Kuandu atu halo  apreensaun buska iha dominusiariu ba ema nia rezidénsia autormatikamente tenke bazeia ba mandadu Judisiária, maibé momentu ne’e, ekipa SNI ba halo apreesun no buska iha arguidu na’in-rua nia rezidénsia la ho mandadu.

Hafoin Tribunál verifika tiha faktu no prova sira ne’e, Trubunál konsidera nulu no Tribunál haree tiha faktu sira no prova sira liuliu objetu krime sira ne’ebé momentu ne’e SNI  foti iha arguidu na’in-rua nia rezidénsia iha altura  Tribunál halo Primeiru Interrogatóriu liuhusi Juis turnu ne’ebé prezide kazu ne’e la haree di’ak hodi omóloga tiha objetu aprendidu ne’ebé mak foti iha arguidu na’in-rua nia rezidénsia. Tanba ne’e liuhusi desizaun ba debate instrusaun ida Tribunál deside prosesu apreensaun no buska iha arguidu na’in-rua nia rezidénsia ne’e nulu.

Tribunál mós pronúnsia liuhusi desizaun ba debate instrusaun, ida ne’e katak, husu ba Ministériu Públiku labele utiliza  faktu ida ne’e  ba iha produsaun prova bainhira aban-bain rua kazu ne’e avansa ba  iha julgamentu. Tanba Tribunál konsidera katak faktu no prova ne’ebé Ministériu Públiku konsta iha akuzasaun ne’e nulu, inklui objetu krime sira ne’ebé mak autoridade sira foti iha arguidu MA no EV nia rezidénsia ne’e nulu.

Maibé iha  faktu no prova  ida de’it mak Tribunál konsidera nulu. Enkuantu faktu no prova sira seluk ne’ebé Ministériu Públiku halibur iha akuzasaun ne’e iha indísiu ba krime droga.

Faktu no prova sira ne’ebé  Tribunál lee ne’e la signifika  arguidu sira sala no hetan ona kondenasaun. Maibé faktu no prova sira ne’e hatudu katak kazu ida ne’e avansa ba julgamentu.

Tuir Tribunál  nia  hanoin ida ne’e desizaun husi Tribunál ba debate instrusaun ba kazu ida, karik la konkora bá desizaun ne’e bele rekursu.

Iha sala julgamentu bainhira Tribunál liuhusi Juis José Quintão fó sai tiha desizaun ba debate  instrumentu ba kazu droga ne’e  parte Defeza husi arguidu sira laiha kontestasaun ba  desizaun refere.

Jornalista: Marcelino Tomae