Hatutan.com, (21 Juñu 2025), Díli– Asosiasaun Jornalista Timor Lorosa’e  (AJTL) kolabora ho UNESCO  fasilita formasaun kona-bá  kobertura kle’an  asuntu klimátika no ambientál ba jornalista Timor-oan na’in-19.

Lee Mós: Index Liberdade Imprensa iha TL husi Top 10 Tun bá 20, AJTL Konsidera Liberdade Imprensa iha TL Ameasadu

AJTL ho UNESCO fasilita formasaun kona-bá kobertura kle’an asuntu klimátika no ambientál ba jornalista Timor-oan na’in-19, Sesta-Sábadu (20-21/06/2025). Foto/Zita Menezes

Iha abertura formasaun ne’ebé hala’o iha salaun Asosiasaun HAK, Farol, Díli, Sesta (19/06/2025), Prezidente AJTL, Zevonia Viera, hateten iha fulan-Juñu nian laran, mundu tomak inklui Timor-Leste komemora loron mundiál bá ambientál, nune’e UNESCO kolabora ho AJTL hodi kontinua haforsa jornalista sira nia koñesimentu  oinsá halo reportajen kle’an ba kestaun  klimátika ho nia efeitu sira iha Timor-Leste.

“Formasaun ida-ne’e nia intensaun, oinsá enkoraja nafatin jornalista sira halo kobertura bá asuntu klimátika ne’ebé maka fó risku barak bá iha ita-nia sosiedade, liu-liu ema vulneravel  sira, feto to’o labarik no mós ema ho defisiénsia sira ne’ebé maka hela iha área remota,” prezidente AJTL Zevonia Viera fundamenta.

UNESCO hakarak apoiu AJTL hodi nune’e bele hasa’e númeru reportajen jornalista sira nian iha Timor-Leste kona-bá klimátika tanba monitorizasaun ne’ebé UNESCO halo hatudu katak reportajen sira kona-bá klimátika ho ambientál sei menus tebes sei publikasaun órgaun komunikasaun sosiál Timor-Leste nian.

Zevonia Viera hateten formasaun ba jornalista sira hamutuk na’in-19 ne’e hanesan meiu ida atu enkoraja jornalista Timor-oan sira hakerek istória kona-bá ambientál atu hakonu públiku nia informasaun kona-ba mudansa klimátika ho ambientál.

Iha sorin seluk, Harry Surjadi  formador no peritu iha asuntu kobertura mudansa klimátika no ambiental husi Indonézia, hateten daudaun ne’e mundu tomak, inklui Timor-Leste enfrenta  hela problema klimátika ambientál tanba populasaun ne’ebé aumenta barak ba bei-beik, ema sira-nia nesesidade barak no  soe lixu hodi fó efeitu bá ekonomia, sosiál no ambientál.

Jornalista na’in-19  ne’ebé hetan oportunidade partisipa iha formasaun ne’e husi mídia online, televizaun streaming, rádiu komunidade no jornál sira ne’ebé eziste iha Timor-Leste. Formasaun ne’e hala’o durante loron rua; husi loron 20 to’o loron 21 fulan-Juñu 2025.

Jornalista: Zita Menezes