Hatutan.com (23 Juñu 2025), Díli—Projetu konstrusaun  edifisiu sentrál Radiu Televizaun Timor-Leste, Empreza Públika (RTTL,E.P) ho kustu total US$3,760,405.00 ne’ebé ezekuta husi kompañia internasionál PT Aulia Multi Sarana husi Indonézia la’o atraza.

Lee Mós: Intervensaun SEKOMS Ba RTTL ho Tatoli Kontribui Hamonu Índise Liberdade Imprensa Timor-Leste

Eskavadór ida mak hala’o hela servisu iha projetu Edifisiu foun RTTL,E.P ne’ebé la’o atraza. Foto/supply

Projetu ne’ebé sai hanesan legacy husi Governu da-ualu (8) liuhusi Ministériu Asuntu Parlamentár no Komunikasaun Sosiál (MAPKOMS) no ezersísiu estra-ordináriu husi Prezidente Konsellu Administrasaun RTTL,E.P altura ne’ebá José António Belo “Taraleu”, konsege hala’o nia lansamentu, hatuur fatuk-inan, husi  Primeiru-Ministru (PM), Kay Rala Xanana Gusmão iha loron 19 fulan-Dezembru tinan 2024.

Konstrusaun ba edifísiu foun RTTL,E.P ne’e previstu atu remata ka termina  iha fulan-Marsu 2026, reprezenta investimentu ida  US$5,970659,11 ne’ebé finansiamentu hetan hosi parseria ida entre Governu Timor-Leste, Governu Japaun no Programa Nasoins Unidas ba Dezenvolvimentu (UNDP, sigla inglés). Aleinde konstrusaun, projetu ne’e inklui formasaun téknika ba jornalista sira no profisionál RTTL sira seluk, ho objetivu atu hametin abilidade ekipa nian enfrenta  ezijénsia komunikasaun modernu no efetivu.

Sura husi loron serimónia hatuur fatuk-inan to’o agora empreza internasionál  husi Indonézia, PT Aulia Multi Sarana, seidauk hatuur nia fundasaun ka fondasi no seidauk hatudu esforsu ba mobilizasaun ekipamentu iha terrenu konstrusaun tanba empreza enfrenta difikuldade uitoan no prejudika progresu konstrusaun ne’e atraza.

Edifísiu sentrál RTTL,E.P   nian ne’e tau naran Francisco Borja da Costa iha andar haat (4) kompletu ho estudiu rádiu ho televizaun, fatin servisu ho ezekutivu, ho totál administrasaun  no jornalista na’in-600.

Iha andar da-haat leten ne’e  fatin sorumutuk ho naran auditóriu Nino Konis Santana ho kapasidade akomula ema na’in-1000. Osan bá edifisiu ne’e apoiu hosi Governu Japaun liuhosi ezersísiu   negosiasaun husi  eis-prezidente Konsellu Administrasaun RTTL, E.P, José António Belo “Taraleu”  iha inisiu 2023 no hetan tulun husi husi MAPKOMS hodi haruka karta pedidu bá  Governu Japaun no mós koñesimentu   mós bá UNDP  nia reprezentante iha Díli  iha loron 23 fulan Maiu 2023, hodi husu apoiu orsamentu ho totál US$5,970659,11, hodi ajuda konstrui edifisiu  sentrál RTTL,E.P nune’e Governu Japaun apoiu montante orsamentu ne’e  iha loron 11 fulan-Juñu 2023.

Iha fulan-Outubru tinan 2023, UNDP lansa konkursu  dezeñu ho site assessment no hafoin iha fulan-Jullu tinan 2024 no fulan-Agustu 2024 hetan aprovasaun  bá dezeñu husi Ministériu Obras Públika (MOP) depois lansa kedan  bá konsursu internasionál  hodi hetan kompañia internasionál husi Indonézia PT Aulia Multi Sarana hanesan manan na’in ba konkursu internasionál ne’e ho total kustu ba projetu ne’e $3,760,405.00.

Dezeñu Edifisiu foun RTTL,E.P nu’udár legacy husi Governu da-ualu (8) no eis-prezidente Konsellu Administrasaun RTTL,E.P, José António Belo “Taraleu”. Foto/Espesiál

Iha akordu ne’ebé estabelese ho parte sira, liuliu UNDP no Governu Timor-Leste liuhusi Sekretáriu Estadu Komunikasaun Sosiál (SEKOMS) iha mandatu Governu da-sia (9) nian ne’e,   kompañia PT Aulia Multi Sarana kompromete atu hatama nia ekipamentu rasik, modernu no sufisiente, maibé  realidade PT Aulia Multi Sarana  aluga de’it eskavadora  ida ho karreta baskulante rua (2) ka tolu (3) husi empreza nasionál TINOLIN, Lda.

Bá  kestaun ne’e,  Hatutan.com komfirma Sekretáriu Estadu Komunikasaun Sosiál (SEKOMS)  Expedito Dias Ximenes, Segunda (23/06/2025), iha Palásiu Governu,   rekoñese projetu konstusaun ne’e la’o tarde, tanba kompñia PT Aulia Multi Sarana husi Indonézia  laiha kapasidade hodi rezolve servisu ne’ebé sai probemetiku iha área ka resintu RTTL,E.P iha Caicoli, Dili.

“Konstrusaun ne’e la’o tarde tanba sira dehan empreza ne’e ke’e bee iha kraik, konserteza empreza ne’e tenke hein tan fulan-tolu  atu  bele  halakon tiha bee iha kraik  atu hametin nia fondasi ne’e tenke metin makaas liu, ne’ebé tenke  metin atu aban-bainrua sira halo andar haat ne’e,”  SEKOMS Expedito Dias Ximenes   argumenta.

Kona-bá  kompañia internasionál PT Aulian Multi Sarana la iha ekipamentu rasik no aluga ekipamentu husi kompañia TINOLINA, SEKOMS Expedito Dias Ximenes  hateten, nia parte  rasik la hatene,  maibé nia hateten katak  prosesu  bá konstrusaun ne’e  la’o hela.

“Ida ne’e ha’u ladún hatene maibé ha’u hatene katak prosesu ne’e la’o hela, ida kleur ne’e tanba prezidente RTTL ohin fó  relatóriu bá ha’u  dehan katak  tanba iha nia  kle’an ne’e bee barak iha okos, presiza tempu hasai bee atu ele hahú konstrusaun báziku ka uma nia fundasaun,”  Expedito Dias Ximenes klarifika.

Informasaun ne’ebé Hatutan.com asesu husi fontes importante balun ne’ebé ladún kontente ho intervensaun  husi SEKOMS ba projetu ne’ebé responsabiliza  UNDP ne’e, Expedito Dias Ximenes afirma dehan ne’e husi UNDP maka halo, la’ós husi Governu maka halo.

Dezeñu edifisiu foun RTTL,E.P. Foto/Espesiál

Nia esplika konskursu ne’e halo tenderizasaun   internasionál, ne’ebé konkursu ne’e husi UNDP, tanba osan husi Governu Japaun ne’e fó direita bá UNDP husi parte Governu tau matan de’it, Governu la tama sidik uotan  tama iha tederizasaun ne’e Governu la hatene ida.

Hatutan.com tenta atu konfirma prezidente RTTL,EP Eliziu Issac Fernandes hodi  bele hetan esplikasaun detallu ba atrazu projetu ne’e,  maibé husi parte Gabinte prezidente RTTL,E.P nian dehan prezidente RTTL,E.P okupadu hela ho servisu balun . Nune’e, parte gabinete foti de’it   Jornalista Hatuan.com númeru kontaktu hodi dehan  hein kontaktu hodi maka foin entrevista.

Hatutan.com buka konfirma ho tékniku sira PT  Aulia  Multi Sarana   iha lokál ka terrenu projetu, maibé sira la bele fó informasaun tanba informasaun hotu submete ona ba prezidente RTTL,E.P no tanba razaun mós tenke hetan autorizasaun husi lideransa másimu iha RTTL,E.P.

Observasaun Hatutan.com iha terenu nota katak projetu konstrusaun uma nia fundasaun seidauk harii tanba foin faze ke’e-rai.

Jornalista: Marcelino Tomae