Hatutan.com, (27 Juñu 2025), Díli-Tempu badak Governu kria  Dekretu-Lei hodi aplika selu lixu no kobra fatin estasionamentu sira iha área turizmu no espasu públiku.

Lee Mós: Nomeasaun PAM Díli Hein Rezultadu Auditória

Atividade rekolla taxa iha Estasionamentu iha área Banco Nacionál Ultramarinho (BNU) nian. Foto/Dok

“Pesoál kontrola lixu na’n-200 ita seidauk selu ,ne’e mak agora prepara lei ida loja boot sira, otél sira tenke selu inklui komunidade sira mós tenke selu, ita tau masa boot sira ema sunu hotu ne’e,” Ministru Administrasaun Estatál, Tomás do Rosário Cabral hateten ba jornalista sira iha Sentru Konvensaun Díli (CCD, sigla portugés), Sesta (27/06/2025).

Ministru Tomas do Rosário Cabral esplika prosesu iha jestaun lixu ne’e ho osan lubun boot ida ho sira nia jestaun la di’ak, nune’e  Governu  da-sia hapara no sei loke fali konkursu ba ema hodi jere lixu.

“Masa boot  sira ne’e sai resiklajen agora tau hela iha estrada ibun, entaun ida ne’e tenke haree didi’ak ne’e mak jestaun lixu hahú selu. Lixu ne’e estadu hasai osan kuaze millaun $9 kada tinan, kompostu husi millaun $2 gasta ba Munisípiu Dili, millaun  $1.5 ba  kamioneta 200 ne’e no orsamentu  $500 ne’e ba ekipamentu, depois iha tan projetu kontroladu Tibar ne’e orsamentu iha fundu infraestrutura  ida ne’e mak ita haree hela,” Tomas Cabral hateten.

Nia informa kontrolu lixu ne’e ema hotu bele kontrola maibé razaun la kohi  kontrola mak governu prepara dekretu ida atu nune’e tenke selu  lixu.

“Uma-kain sira sei entrega ba Xefe Aldeia no Xefe suku sira mak kontrola, ba loja ho restaurante boot sira ne’e Administrasaun Munisipiu Dili mak kontrola, ita sei lansa iha tempu badak inklui mós parajen iha sidade laran iha sentru turizmu  sira folin ketak, parajen estrada públiku folin ketak,” nia hateten.

MAE prepara hela sei lansa antes loron 28 fulan-Novembru 2025 no ne’e tenke iha baze legál ida atu regula para oinsá reseita sira ne’e fila fali ba kofre Estadu liu-liu iha munisípiu sira.

Jornalista: Juvinal Cabral dos Santos