Hatutan.com, (28 Jullu 2025), Díli—Komisaun Anti-Korrupsaun (CAC, sigla portugés) liu-husi servisu prevensaun kriminál nian, Segunda (28/07/2025), hala’o inspesaun urjenti  iha edifisiu Ministériu Solidariedade, Sosiál no Inkluzaun (MSSI), Caicoli, Dili, hodi hatan ba keixa balun ne’ebé tama iha CAC katak, rejultadu kompra veíkulu Estadu nian hamutuk unidade ualu 8 iha MSSI  deskonfia la refleta ba dokumentu espesifikasaun nian.

Lee Mós: SEKOMS Lahatene Buat Ida Kona-bá PT Aulia Multi Sarana iha Konkursu Bá Projetu Edifísiu Foun RTTL,E.P

Veíkulu Estadu nian hamutuk unidade ualu (8) iha MSSI kompras deskonfia la refleta ba dokumentu espesifikasaun nian. Foto Repro/Média CAC

Komunikadu imprensa ne’ebé Hatutan.com asesu husi CAC relata  asaun inspesaun ne’e lidera husi Komisariu Adjuntu Prevensaun no Sensibilizasaun (PS), Rosario Araújo no Komisariu Adjuntu Servisu Apóiu no Kooperasaun (SAK) Miguel Faria akompaña husi Espesialista Anti-Korrupsaun (EAK) sira iha Unidade Inspesaun no Monitorizasaun (UIM) nian.

Komisariu Adjuntu na’in rua ho EAK sira to’o iha edifisiu MSSI dader  hodi hasoru malu ho Ministra MSSI, Verónica das Dores, ho nia Vise, Céu Brites, maibé sira nia parte la iha fatin no atende asuntu servisu seluk. Nune’e, ekipa konsege hasoru malu de’it ho Diretór Jerál MSSI nian no tékniku sira hodi halibur informasaun no dokumentus sira prosesu tenderizasaun nian, inklui inspesaun direta ba veikulu sira.

Durante inspesaun iha terenu, Komisariu Adjuntu Rosario no Faria informa, asaun inspesaun ne’e halo parte servisu prevensaun nian hodi halo verifikasaun loloos ba verdade informasaun ne’ebé tama iha CAC. Asaun ne’e halo atu prevene poténsia iregularidade ruma ne’ebé bele akontese, liu-liu prevene poténsia sira prejuiju Estadu nian.

“Inspesaun ne’e la’ós de’it atu buka sala, maibé hanesan forma prevensaun ida atu instituisaun públika sira, liu-liu ba ita boot sira atu bele hadi’a sistema prevensaun ne’ebé efetivu. Inspesaun ne’e mós atu tau matan didi’ak mós ba ita boot sira hodi evita estadu lakon,”  Adjuntu Rosario esplika.

Komisariu Adjuntu Faria afirma, asaun inspesaun ida-ne’e reflete aprosimasaun prevensaun kolaborativu ida, la’ós atu husik violasaun sira akontese, maibé atu enkoraja mudansa sistémiku, atu nune’e ofisiál públiku sira bele prátika tuir prinsipiu sira boa governasaun nian no responsavel iha instituisaun Estadu.

Hafoin termina inspesaun iha terenu, oras ne’e daudaun, ekipa tékniku sira kontinua analiza hela dadus ne’ebé hetan hodi identifika risku potensiál sira korrupsaun nian. Rezultadu sira hosi inspesaun ne’e sei trasa iha relatóriu deskobrimentu no rekomendasaun estratéjiku sira, ne’ebé sei submete fila-fali ba MSSI hodi halo avaliasaun no hadi’a sistema sira prevensaun korrupsaun nian.

Jornalista: Zita Menezes