Hatutan.com, (04 Agostu  2025), Díli– Membru Parlamentu Nasionál sira konsidera kritika husi sosiedade sivíl hanesan Programa Monitorizasaun Sistema Judisiál (JSMP-sigla ingles) hanesan xamada atensaun bá Parlamentu Nasionál hodi servisu hadi’a di’ak liután. 

Lee Mós: JSMP Konsidera PN Prátika Insulta Barak Liu Duké Prodús Lejizlasaun sira

Debate Konta Jerál Estadu 2023 iha PN, Segunda (27/01/2025). Foto/Dok

Prezidente Komisaun A trata asuntu justisa no lejizlasaun Deputadu Patrocínio Fernandes, hateten normal bá sosiedade sivíl fó nia observasaun no fó sira-nia hanoin, maibé dala barak liu ema hotu-hotu kontinua hateke negativu bá iha órgaun soberanu Parlamentu Nasionál.  Maibé, haluha tiha dehan katak, estadu direitu demokrátiku ne’e estadu ne’ebé atua ho lei.

“Imajina sé Parlamentu Nasionál la halo lei, to’o ohin loron estadu bele eziste, signifika estadu ne’e sei la’o to’o ohin 2025, ne’e tanba servisu Parlamentu Nasionál  prodús lei sira fó dalan bá ita nian estadu no prosesu dezenvolvimentu sira,” hateten Deputadu Patrocínio Fernandes bá jornalista sira iha PN, Segunda (04/08/2025).

Nu’udár Deputadu  nia simu kritiku sira ne’e ho di’ak, maibé labele iha moris tomak ne’e tau perspetiva negativa bá órgaun estadu sira.

“Agradese bá JSMP nia kontribuisaun liuhosi hanoin sira ne’e hanesan xamada atensaun ida para JSMP no Parlamentu Nasionál bele hadi’a aan, tanba estadu ne’e ita hotu fó hanoin bá malu para hadi’a rai ne’e,” nia tenik.

Iha fatin hanesan Xefe Bankada KHUNTO Deputadu António Verdial hateten, nia sempre hatete no husu bá Deputadu/a atu sai defensór bá povu no tenke  defende povu, liuliu evita gasta tempu bá insulta malu.

Sorin seluk Xefe Bankada PLP Deputada Maria Angelina Sarmento hateten, kritika ne’ebé JSMP halo no observa prosesu iha Parlamentu Nasionál durante iha lejislatura ida-ne’e iha razaun.

“Ha’u aseita tebes ho ida-ne’e, tanba saida maka ambiente ida-ne’e akontese tanba primeiru laiha sinerjia entre Parlamentu Nasionál ho Governu atu ko’alia kona-bá tinan ida lei saida maka prioridade bá Governu ida-ne’e atu tau atensaun hodi lori PN halo diskusaun no debate iha sesaun plenária sira,” Deputada Maria Angelina Sarmento hateten.

Nia afirma tuir loos Bankada Governu maka husu bá Governu lei sira ne’ebé maka prioridade iha mandatu IX Governu no bele ajuda iha prosesu  implementasaun sira.

Nia hatutan kauza husi ambiente insulta akontese iha  Parlamentu Nasionál depende bá ema ne’ebé lidera  meza. “Ambiente ne’e akontese iha PN,  ne’e tuir loloos  Prezidente Parlamentu Nasionál tau nia aan hanesan moderadór, tuir loos nia hanesan lidér ida nia la monu bá deputadu sira nian lasu bainhira halo barullu iha Plenária, no labele tempra  bumbu lae  ikus mai  PN ninian produtividade la iha tiha,” nia tenik.

Tuir relatóriu no dadus ne’ebé Hatutan.com asesu iha komisaun A trata asuntu justisa no lejizlasaun katak husi  mandatu  sesta lejislatura halo ona projetu lei ualu  (8) no proposta lei 10 inklui lei foun  ida (1).

1. Projetu lei n.º 6/VI (1″) – Mandatu Titulares no membru  órgaun  designadu husi  Parlamento Nacional.
2. Projetu lei n.º 11/ VI (2″) – Autorizasaun Lejizlativa iha matéria fixação limita bá idade servisu,  funsionáriu  públiku  no ajente administrativu.
3. Projetu Lei n.º 5/VI (1″) Segunda alterasaun estatutu majistratura judisiáriu.
4. Projetu lei n.º 03/VI (1″) – Regime jurídiku ezersísiu no direitu petisaun
5. Projetu lei n.º 2/VI(1″), Terceira altersaun lei n.º 5/2004, 5 Maiu, Estatutu dos Deputadu/a.
6. Projetu lei n.º 4/VI(1″), Terceira alterasaun lei n.º 5/2004, 5 de Maiu , estatutu dos Deputadu/a.
7. Projetu lei n.º 1/VI(1″), Prosedimentu konsesaun Indultu no komutasaun  Pena.
8. Projetu lei n.º 11/ VI (2*) , autorizasaun legislative matéria  fixasaun  limite  idade ne’ebé iha  relasaun  servisu  funsionáriu públiku no  ajente administrativu.

Proposta Lei

1. Proposta lei n.º 15 /VI (2″), primeira alterasaun lei n.º 1/2007, 18 janeiru, Regime tranzitóriu  rekrutamentu  majistradu  no defensór públiku  não timorense, segundu altersaun  lei n.º 9/2011, 17 agostu , aprova orgánika  kámara konta iha tribunal superior administrativu, fiskál no kontas.
2. PPL n°. 10/VI (1″), Regime jurídiku garantia mobiliáriu, (lei foun)
3. PPL n°. 16/VI (2) – segundu alterasaun lei n.º 25/2021, Dezembru, lei Organizasaun Judisiária.
4. a PPL n°. 17/VI (2″) – segundu alterasaun lei n.º 7/2022, 19 Maiu , Estatutu Ministériu Publikú.
5. PPL n°. 10/VI (1″) -Regime jurídiku garantia mobiliáriu.
6. PPL n.º 6/VI (1*) -segundu alterasaun lei nº 8/2009, 15 Jullu , kona-bá Komisaun Anti-Korrupsaun.
7. PPL n.º 6/VI (1″) – Mandatu Titulares no membru  órgaun  designadu husi  Parlamentu Nasionál.
8. PPL n°. 16/VI (2″) – Segunda Alterasaun a Lei n.º 25/2021, Dezembru , lei organizasaun Judisiária.
9. PPL n°. 17/VI (2) segundu alterasaun lei n.º 7/2022, 19 Maiu, estatutu ministériu públiku
10. PPL n.º 13/V (2″) kona-bá kodigu rekuperasaun  insolvéncia (iha hela  fase diskusaun no espesialidade).

Iha loron 01 fulan-Agostu  ne’e, Programa  Monitorizasaun Sistema Judisiál (JSMP-sigla ingles) hato’o nia observasaun katak durante  VI lejizlativa Parlamentu Nasionál nian ne’ebé lidera husi Prezidente Parlamentu  Nasionál, Maria Fernanda Lay, prátika insulta maka barak liu iha diskusaun sira iha plenária duké prodús lejizlasaun ka  lei hodi implementa iha rai-laran.

 Jornalista : Zita Menezes