Hatutan.com, (07 Agostu 2025), Díli-Polísia Nasionál Timor-Leste (PNTL), liuhosi Diresaun Servisu Investigasaun Kriminál (DSIK) kontíni buska no halo apreensaun iha rezidénsia arguido na’in-neen nian bazeia ba mandadu husi Tribunál Judisiál Primeira Instánsia Dili (TJPID).

Lee Mós: Polísia Halo Buska no Apreensaun iha Gabinete Reitór no Pro-Reitór Sira UNTL

Polísia halo buska ba rezidésia direjente balu UNTL nian. Foto/Juvinal Cabral dos Santos

Iha Kurta loro-kraik, órgaun Polísia  halo buska no apreensaun iha rezidénsia  adjuntu reitór UNTL ida nian iha área balun iha Dili laran no konsege rekolla dokumentu relevante sira, inklui  dokumentu karreta marka Ranger númeru matrikula A.16.2xx, motór rua  ho marka Genio númeru matrikula  Y.16.xx TL, Beat N.44.xx TL.  

“Órgaun Polisiál  implementa mandadu buska no apreensaun ne’ebé Tribunál fó hodi halo buska no apreensaun ba parte reitoria UNTL no Polísia konsege dezenvolve nia investigasaun hodi koleta sasán sira ne’ebé mak Polísia buka,” Portavós   PNTL Superintendente Xefe Polísia João  Belo dos Reis informa  ba Jornalista sira iha sala enkontru Ministériu Interiór iha Vila-Verde, Díli, Kinta (07/08/2025).

Superintendente Xefe Polísia João  Belo dos Reis hateten investigasaun lao hela ba buska no apreensaun iha UNTL  no Polísia iha oras 72 nia laran atu halo investigasaun molok aprezenta bá Ministériu Públiku (MP).

“Tuir mandadu ne’ebé mak ami halo no ezekuta de’it buska no apreensaun la inklui detensaun, ami sei submete de’it ba buat ne’ebé mak mandadu fó ba ami. Prosesu identifikasaun la’o hela iha tempu oras 72 nia laran atu  bele aprezenta ba Ministériu Públiku ho  kazu  nia Númeru Úniku Krime (NUC) 0186/2025-PNSIK,”  Superintendente Xefe Polísia João  Belo dos Reis hateten.

Buska no apreensaun iha arguido sira-nia eskritóriu servisu iha UNTL,  autoridade Polísia sira prende dokumentu relativa inklui prova osan balun.

Autoridade Polísia kontínua halo investigasaun, buska no apreensaun ba rezidénsia arguido sira seluk nian hodi rekolla prova relevante sira ho kazu ne’ebé deskonfia parte sira komete.

Jornalista: Juvinal Cabral dos Santos