Hatutan.com, (26 Setembru 2025), Díli– Prezidente Bankada Partidu Libertasaun Populár (PLP), Maria Agelina Sarmento Lopes, lori Bankada PLP nia naran bolu atensaun ba ukun nain sira hotu, liuliu Governu atu atensaun ho atividade jogu online ne’ebé Inspetór Jerál ba Jogu (IGJ)  fó legalizasaun hodi halo operasaun iha Timor-Leste.

Lee Mós: PM Xanana: “Sé iha Membru Governu Envolve Jogu Online Fó Naran Mai Ha’u”

Xefe Bankada PLP, Maria Angelina Sarmento.

Deputada   Maria Agelina Sarmento Lopes bá Jornslita sira iha  uma fukun Parlamentu Nasionál, Sesta (27/09/2025) hateten, jogu online bele sai dalan foun bá krime organizadu, hanesan fase osan no brankamentu kapitál ne’ebé hetan husi korrupsaun no subornu.

“Se ita loke jogu online bá sosiedade Timor-Leste ne’ebé frajil,  no mós liu-liu sosiedade ne’ebé laiha empregu no rendimentu fiksu, entaun ema barak sei hanoin jogu online nu’udár oportunidade atu hetan osan lalais. Maibé,  ida-ne’e iluzaun de’it ne’ebé bele kria dependénsia no moras sosiál iha komunidade,”  Deputada Maria Angelina Sarmento hateten.

Deputada PLP refere katak jogu online sei hamosu problema sosial no mós ligadu ho grupu kriminozu internasionál. Nia relembra kazu Arnolfo Teves Jr, hanesan pontu ida ne’ebé hatudu katak krime organizadu bele buras husi jogu online no subar iha Timor-Leste.

Nia kritika mós Governu tanba blokia rezolusaun ida ne’ebé opozisaun submete antes atu buka investigasaun kona-bá krime transnasionál.

“Relatoriu ONU mós hatudu katak jogu online bele sai entrada bá ema kriminozu ne’ebé akuzu ona iha kazu korrupsaun fase osan. Perigu ida-ne’e tenke ita prevene ona,” nia dehan.

Deputada ne’e mós apresia kontribuisaun publiku husi membru Governu, Agio Parreira, ne’ebé hateten katak governante balun bele  envolve iha  jogu  online.

Ho baze bá evidénsia ne’e, Deputada Maria Agelina husu Polísia Sientífiku, Investigasaun Kriminál (PCIC), no órgaun judisiáriu atu halo investigasaun seriu kona-bá jogu online no envolvimentu krime organizadu.

“Asuntu ne’e la’ós segredu ona, publiku hatene. Agora depende de’it ba institusaun relevante atu halo investiga,” nia hakotu.

Jornalista: Marcelino Tomae