Hatutuan.com, (22 Outubru 2025), Dili– Lider opozisaun iha Parlamentu Nasionál husi Bankada PLP preokupa kazu ne’ebé empreza internasionál Lighthouse Corporation Pty Ltd submeter ba Tribunál Supremu Victória kontra Govenru Timor-Leste ho ejizénsia husu indemnizasaun entre millaun US$329- millaun US$600.

Lee Mós: Governu Vs Lighthouse iha Tribunál Supremu Victória, MJ Sérgio Hornai: Estadu Timor-Leste Prontu Enfrenta

Xefe Bankada PLP iha PN, Maria Angelina Sarmento. Foto/Dok

Xefe Bankada PLP Maria Angelina Sarmento, Kuarta (22/10/2025), haktuir   Komisaun C PN ne’ebé trata asuntu Finansa Publiká halo audiénsia públika bá OJE 2026 ho Ministériu Planeamentu Investimentu Estratejikú (MPIE), Ministériu Transporte no Telekomunikasaun (MTK) nomós Ministériu Obras Públiku (MOP) iha sala plenária  hodi husu esklaresimentu Governu nian liga kazu Lighthouse Corporation Pty Ltd ho Governu Timor-Leste ne’ebé la’o hela iha Tribunál Supremu Victória.

“Agora dau-daun iha kazu ida ne’ebé Timor-Leste tenke hasoru Tribunál bá kazu Lighthouse ne’ebé sira lori kazu ne’e hasoru Governu Timor-Leste bá projetu fornesimentu  mina  no jeradór bá EDTL akontese dezde 2010 tanba ita hapara derepenti kontratu ho Lighthouse, Timor-Leste tenke selu multa entre millaun $329  to’o millaun $600,” Deputada Maria Angelina Sarmento  hateten.

Reprezentante povu ne’e afirma kompañia  halo rekursu bá  desizaun primeira instánsia no nia manan. Nune’e, iha 2026 fulan-Fevereiru mak sei hahú  ho julgamentu bá  prosesu rekursu.

“Sé karik kompañia mak manan nafatin, maka Timor-Leste tenke selu multa bá kompañia refere,  maibé ha’u haree iha OJE 2026 nian bá  atividade servisu Legais e Sentença dos Tribunais ne’e total millaun US$12 de’it. Se tinan oin, ita  tenke selu Lighthaouse  millaun US$329 to’o millaun US$600 osan ne’e ita sei foti iha ne’ebé?,” Deputada Maria Angelina Sarmento kontesta.

Iha fatin hanesan Deputada Bankada CNRT  Virginia Ana Belo hateten sé iha duni kauza ka buat ruma ne’ebé maka halo hodi Governu  selu indemnizasaun, hanoin Governu hatene hela pasu sira ne’ebé maka la’o hela.

 “Ha’u husu Governu la presiza fó resposta tauk hatán sala ruma  bá kazu Ligthouse tanba agora daudaun prosesu  la’o hela iha tribunál,” Deputada Virginia Ana Belo hateren.

Hatán bá preokupasaun ne’e Ministru Planeamentu Investimentu Estratejikú (MPIE),  Gastão de Sousa hateten, kona-bá kazu lighthouse nia labele halo komentáriu.  

“Ha’u hanoin Ministériu Finansa mai iha PN mak bele esplika klaru bá ita-boot (Deputadu-red) sira oinsá OJE 2026 responde bá iha ne’ebá ne’e hira, orsamentu alokadu iha ne’ebá,” nia tenik.

Lee Mós: Lighthouse Ezije Governu Timor-Leste Selu Prejuízu Millaun US$600

Jornalista: Zita Menezes