Hatutan.com, (05 Novembru 2025), Díli-Xefe Estadu Maiór Jenerál FALINTIL-Forsa Defesa Timor-Leste (F-FDTL), Tenente Jenerál Domingos Raúl “Falur Rate Laek” triste rona membru F-FDTL baku populasaun.

Tenente Jenerál Falur Rate Laek hirus no kondena membru F-FDTL balun baku populasaun. Foto/Juvinal Cabral dos Santos

“Imi ida baku fali populasaun ne’e mak halo ita laran taridu oituan, ha’u ohin ne’e hirus la di’ak imi mak ne’e, kuidadu ita-nia komportamentu sira ne’e ho di’ak liu, ultimamente ne’e ita haree forsa mak ida be lanu ne’e, lanu ne’e sai duvida boot, lanu ne’e ema malae sira tur ne’e hemu tua kalan to’o dader mais kontrola an hariis ba servisu oin moos. Mais Timor nia ne’e lae, hemu tiha tua ne’e nia mak jagoan liu fali ona, nia mak asuwain liu, nia mak bonitu liu, nia mak riku liu depois sai tiha lekirauk ne’ebé bidu ba bidu mai hotu tiha ne’e sai fali fahi, ita tenke eduka ita nia an” Tenente Jenerál Domingos Raúl “Falur Rate Laek” hateten iha nia diskursu iha missa solene loron Mahein F-FDTL São Miguel Arcanjo iha Kuartel Jenerál F-FDTL, Fatuhada, Kuarta (05/11/2025).

Falur Rate Laek hatutan, ema ida moris husi família sira la’ós moris mesak, ema ida mak fó o moris naruk, ema ida mak hanorin o eskola, ema ida mak  dada o influensia o sai ema boot, sai kabenain, o mate mós ema seluk mak hakoi o, ne’ebé kuidadu ida ne’e.

“O bele halo buat hotu mais o nia komportamentu iha ninia limitasaun, buat halo liu mak estraga sasan ne’e, ha’u ko’alia nu’udár imi nia komadante, ita labele repete beibeik mak ita-nia sala ne’e, ita bosok ita nia an. Ita halo sala dala ida, ita arepende dala ida, deskuidu fali ohin halo sala, aban sala, ohin mai missa konfesa tiha, komunga tiha, aban halo sala nafatin de’it ne’e ita bulak ema dehan ita la normal,” Tenente Jenerá Falur Rate Laek afirma.

Tenente Jenerál F-FDTL ne’e dehan, ema bele halo buat hotu mais ida ne’ebé halo di’ak ne’e tenke halo di’ak nia presiza.

“Tanba saida  buat hotu ita halo ne’e, buat tolu de’it Deus, Patria no Família ne’e mak ohin ita halo ne’e, ita fiar iha Maromak leten aas ba ne’e  depois mak ita serví ita nia nasaun. Depois ita nia família suporta ita sai servidor no sai ema ne’ebé mak di’ak, ida famozu halo krime ne’e la di’ak,  famozu halo buat ne’ebé mak di’ak,” nia hateten.

Jornalista: Juvinal Cabral dos Santos