Hatutan.com, (22 Novembru 2025), Díli-Sorumutu Estraordináriu Konsellu Ministru, Sábadu (22/11/ 2025), aprova  projetu Rezolusaun Governu ne’ebé aprezenta hosi Primeiru-Ministru, Kay Rala Xanana Gusmão, hodi estende mandatu hosi Prezidente no Dirijente sira Autoridade Rejiaun Administrativa Espesiál Oé-Cusse Ambenu (RAEOA) to’o loron 31 fulan-Dezembru tinan 2025.

Lee Mós: PA RAEOA Régio Salu Suspende Investimentu Ne’ebé Oé-Cusse Simu Ona Kontratu Arrendamentu Millaun $4

Prezidente Autoridade Rejaun Administrativu Espesial Oe-Cusse Ambeno (RAEOA), Regio da Cruz.

Vise-Ministru ba Asuntu Parlamentar, Aderito Hugo da Costa,  ba jornalista sira hafoin sorumutu Konsellu Ministru  extraordinariu, iha resintu Palásiu Governu hateten, konsellu administrasaun  Fundu Espesiál Dezenvolvimentu Ataúro (FEDA) nian, dezenvolvimentu RAEOA nia ne’e iha konsellu administrasaun sira nia membru nain rua mandatu hotu, tenke estende to’o loron 31 fulan-Dezembru tinan 2025  ne’ebé aprezenta husi Primeiru-Ministru (PM), Kay Rala Xanana Gusmão.

“RAEOA  tutela direta ba Primeiru-Ministru nian, entaun ohin aprezenta ba para fó funsionamentu ba dileberasaun sira, hala’o husi konsellu administrasaun ba Fundu Espesial Dezenvolvimentu Atauro (FEDA) nian,” Vise-Ministru ba Asuntu Parlamentar, Aderito Hugo da Costa haktuir.

“Ema hotu hatene katak hanesan debate orsamentu RAEOA ninian semana rua ikus ne’e,  estatistika dezempeñu servisu hatudu sira nia  di’ak tebe-tebes, liu-liu infraestrutura báziku sira estrada ba postu ba suku até aldeia sira kuaze kobre hotu ona iha RAEOA nian durante governsaun RAEOA iha Rogeiro Lobato ninian to’o atual prezidente autoridade RAEOA. Ita espera katak sira nia servisu to’o mandatu sira nia iha sei hotu iha 31 fulan Dezembru tinan ida ne’e bele iha progresu liután,” Aderito Hugo afirma.

Nia argumenta, governu iha espetativa katak ekipa foun ida ne’e ho mandatu fulan tolu de’it maibé ita bele haree katak sira nia dezempeñu di’ak tebe-tebes.

Jornalista: Juvinal Cabral dos Santos