Hatutan.com, (22 Novembru 2025), Díli– Governu liuhusi Ministru Petróliu Rekursu Minarál (MPRM), Francisco da Costa Monteiro, sei asina kooperasaun ho empreza internasionál Woodside Energy, Ltd, kona-bá projetu dezenvolvimentu kampu Greater Sunrise.

Lee Mós: Povu Dezafia Xanana- Horta Lori Kadoras Greater Sunrice Mai Timor-Leste

Ministru Petróleu no Rekursus Minerál, Francisco da Costa Monteiro. Foto/Marcelino Tomae

Iha sorumutu estraordináriu Konsellu Ministru iha Palásiu  Governu,  Dili,  Sabádu (22/11/2025), delibera hodi fó poder tomak ba Ministru Petróleu no Rekursus Minerál, Francisco da Costa Monteiro, atu  lori Governu nia naran, asina Akordu Kooperasaun ho Woodside Energy, Ltd kona-bá projetu TLNG1 (Timor-Leste Liquefied Naturál Gás – Gás Naturál Likifeitu Timor-Leste) no Gazodutu  no Dezenvolvimentu Kampu Greater Sunrise. 

“Ami husu hela Konsellu Ministru Estraordináriu ida,  bele aprova projetu deliberasaun   ida  atu fó podér  bá  Ministru Petróliu no Rekursu Minarál, Francisco da Costa Monteiro,   hodi bele asina akordu kooperasaun ida ho Woodside Energy, Ltd kona-bá  projetu Gazodutu  no Dezenvolvimentu Kampu Greater Sunrise, ne’ebé sé akontese iha Segunda, 24 Novembru 2025,” Ministru Francisco da Costa Monteiro informa ba jornalista sira.

Akordu ida-ne’e aliña ho Governu nia esforsu estratéjiku sira atu valoriza rekursu natural nasionál  nian, tuir Planu Estratéjiku Dezenvolvimentu 2011-2030 nian, no hatudu pasu importante ida bá avaliasaun téknika, komersiál, no regulatória konjunta kona-bá futuru unidade LNG ida iha territóriu Timor-Leste.

Negosiasaun sira ne’ebé hala’o hosi Ministériu Petróleu no Rekursus Minerais ho Woodside Energy, ne’ebé na’in ba parte husi kampu Greater Sunrise nian, kria ona kondisaun nesesária hodi formaliza kooperasaun ida-ne’e, ne’ebé fó dalan hodi halo estudu kle’an ne’ebé esensiál ba dezenvolvimentu projetu ne’e.

Ho desizaun ida-ne’e, Governu avansa iha prosesu implementasaun ba vizaun ida ne’ebé buka atu reforsa industrializasaun enerjétika nasionál, promove diversifikasaun ekonómika, no garante katak benefísiu husi rekursus Greater Sunrise nian sei kontribui direta ba dezenvolvimentu nasionál.

KM Aprova Mós Rezolusaun  Termu  Referénsia Konkursu Públiku

Ministru Francisco da Costa Monteiro, informa mós katak  Konsellu Ministru mós halo deliberasaun ida aprova  termu bá diferensia  segunda ronda tenderizasaun  internasionál  bá bloku Minarál nian  iha territóriu Timor laran tomak.

“Iha bloku 39 maka  sei lansa iha Segunda-feira  bá Konferensia simera internasionál  minerál no mós bá enerjia nian  ne’ebé sei akontese loron tolu iha Díli,” Ministru Francisco da Costa Monteiro informa.

Konsellu Ministru aprova projetu Rezolusaun Governu, ne’ebé aprezenta mós husi Ministru Francisco da Costa Monteiro, ne’ebé aprova Termu Referénsia ba Konkursu Mineiru Públiku ba Konsesaun Lisensa Prospesaun no Peskiza ba Minerál Metáliku, Gemas, Minerál Industriál, Minerál Radioativu no Minéiru no Rai Raru (ne’ebé ladún barak).

Termu referénsia sira ne’ebé agora aprova, estabelese enkuadramentu nesesáriu hodi hala’o konkursu públiku iha setór rekursu minerál, tuir Kódigu Mineiru nian, garante regras ne’ebé klaru no transparente no aliña ho prátika internasionál sira ne’ebé di’ak-liu. Hafoin loke área sira ne’ebé destina ba atividade mineiru, ne’ebé deside hosi Governu iha fulan-marsu tinan 2023, desizaun ida-ne’e atu promove oportunidade foun kona-ba investimentu no kria kondisaun ba dezenvolvimentu sustentável iha setór ne’e.

Konkursu públiku ne’e tenke lansa iha semana ikus fulan-novembru nian. Avaliasaun ba proposta sira sei hala’o hosi fulan-juñu to’o jullu tinan 2026, ho anúnsiu rezultadu sira ne’ebé prevee ba fulan-jullu no emisaun ba lisensa sira ne’ebé marka ona ba fulan-agostu tinan 2026.

Jornalista: Marcelino Tomae