Hatutan.com, (27 Novembru 2025), Díli-Polisia Nasionál Timor-Leste (PNTL) halo ona identifikasaun ba nain fatin komu-isin ho mós kolaboradora ka traballadora na’in-tolu relasiona ho kazu abitante ida ho inisiál AS hakotu iis iha fatin kumu-isin refere, Tersa (25/11/2025).

Lee Mós: Polísia Konfirma Abitante Ne’ebé Mate iha Fatin Kumu-Isin Kauza Husi Moras Fuan

Porta-vós interinu PNTL, Superintendente Asistente Polísia Mouzinho T. Correia (klaran) lidera konferénsia imprensa iha sala Ministériu Interiór, Vila-Verde, Díli, Kinta (27/11/2025). Foto/Juvinal dos Santos

“Kazu abitante ida ho inisiál AS ne’ebé mate iha fatin kumu-isin iha área Fatuhada, Polísia bolu ona salon nia nain ho traballadora (kolaboradora) na’in-tolu hodi halo identifikasaun,” porta-vós interinu PNTL, Superintendente Asistente Polísia Mouzinho T. Correia,  informa ba jornalista iha konferénsia imprensa, Kinta (27/11/2025).

Porta-vós seguransa ne’e afirma, mate -isin mós submete ba mortuáriu Ospitál Nasionál Guido Valadares (HNGV) hodi exame externa katak la iha indisiu krimi ruma. Maibé, espesialista  sira deside katak nia kauza mate ne’e tanba sofre kurasaun, no mate-isin mós entrega ona ba familia hodi halo haloot tuir lisan no tradisaun família nian. 

Jornalista: Juvinal Cabral dos Santos