Hatutan.com, (01 Dezembru 2025), Díli— Komisaun Anti-Korrupsaun (CAC- sigla portugél) liuhosi Diresaun Prevensaun no Sensibilizasaun prepara ona ajenda hodi halo inspensaun bá  projetu konstrusaun  edifísiu sentrál  Rádiu Televizaun Timor-Leste, Empreza Públiku (RTTL,E.P) ne’ebé paradu ona.

Lee Mós: Projetu Edifísiu Sentrál RTTL, UNDP Hapara PT Aulia Multi Sarana

Projetu konstrusuan edifísiu sentral foun RTTL,E.P paradu. Foto/Dok.

Adjuntu  Komisáriu Komisaun Anti-Korrupsaun  bá Asuntu Prevensaun, Rosário Salinha de Araújo bá Hatutan.com  iha nia kna’ar fatin, Segunda (01/12/2025), katak fulan kotuk liubá iha hanoin ida,  atu koloka ekipa inspesaun CAC nian bá halo inspensaun bá projetu konstrusaun Edifisiu Sentrál RTTL,E.P, maibé  ekipa sira  bá  tiha terenu, tanba   ténke finaliza inspensaun  iha fatin hotu-hotu ne’ebé la’o tanba projetu abandonadu sira dezde kedas lansamentu hatuur fatuk-inan iha loron 19 fulan-Dezembru 2024 mai to’o ohin loron.

Adjuntu Komisáriu  CAC ne’e fó hanoin katak prezensa sira iha terenu essensial hodi asegura katak projetu sira kontinua ka entrega fila fali ba Governu, inklui osan hotu-hotu ne’ebé kompañia simu tiha ona hodi devolve fali ba Estadu.

“Ida-ne’e maka halo ami okupadu bá prosesu sira ne’e, entaun ami  seidauk tun  halo inspensaun  bá konstrusaun Edifisiu Sentrál RTTL,E.P, maibé ami  ajenda ona, ha’u informa ona diretór jerál no xefe unidade sira  hodi prepara ekipa, depois relatóroiu ne’e ami finaliza tiha  projetu  sira iha terenu, maka ami foku bá konstrusaun Edfisiu RTTL,EP nian,” Adjuntu  Komisáriu CAC, Rosário Salinha de Araújo hateten.

Adjuntu Komisáriu CAC ne’e afirma katak sei fó fokus ba konstrusaun Edifisiu RTTL no halo prosesu hotu-hotu husi inspesaun.

“Ita la bele promete, maibé ami hateten katak ami sei foku ba ida-ne’e, no prosesu hotu-hotu ba konstrusaun Edifisiu RTTL sei hala’o husi inspesaun,” Adjuntu CAC ne’e afirma.

Fó hanoin fila fali katak, projetu konstrusaun edifisiu sentrál Radiu Televizaun Timor-Leste, Empreza Públika (RTTL,E.P) ho kustu total US$3,760,405.00 neʼebé ezekuta husi kompañia internasionál PT Aulia Multi Sarana husi Indonézia  abandona tiha ona.

Edifísiu sentrál RTTL,E.P nian ne’e tau naran Francisco Borja da Costa iha andar haat (4) kompletu ho estudiu rádiu ho televizaun, fatin servisu ho ezekutivu, ho totál administrasaun no jornalista na’in-600.

Iha andar da-haat leten ne’e fatin sorumutuk ho naran auditóriu Nino Konis Santana ho kapasidade akomula ema na’in-1000.

Iha fulan-Outubru tinan 2023, UNDP lansa konkursu dezeñu ho site assessment no hafoin iha fulan-Jullu tinan 2024 no fulan-Agustu 2024 hetan aprovasaun bá dezeñu husi Ministériu Obras Públika (MOP) depois lansa kedan bá konsursu internasionál hodi hetan kompañia internasionál husi Indonézia PT Aulia Multi Sarana hanesan manan na’in ba konkursu internasionál ne’e ho totál kustu ba projetu ne’e $3,760,405.00.

Iha akordu neʼebé estabelese ho parte sira, liuliu UNDP no Governu Timor-Leste liuhusi Sekretáriu Estadu Komunikasaun Sosiál (SEKOMS) iha mandatu Governu da-sia (9) nian ne’e, kompañia PT Aulia Multi Sarana kompromete atu hatama nia ekipamentu rasik, modernu no sufisiente, maibé realidade PT Aulia Multi Sarana aluga de’it eskavadora ida ho karreta baskulante rua (2) ka tolu (3) husi empreza nasionál TINOLINA, Lda, maibé to’o agora fasilidade sira ne’e la estasiona ona iha fatin projetu, inklui terrenu projetu nian la hatudu progresu no paradu totál.

Jornalista: Marcelino Tomae