Hatutan.com, (05 Janeiru 2026), Díli-  Selebrasaun loron natal 2025 no simu tinan foun 2026, Polísia Nasional Timor-Leste (PNTL) rezista insidente iha munisipiu tolu, Ainaro, Ermera, Baucau no asidente fatal ema mate iha munisipiu rua Covalima ho Díli.

Lee Mós: 31 Dezembru 2025-01 Janeiru 2026, PNTL Detein Ema Na’in-18 no Prende Motór 31

Portavós PNTL, Superintendente Polísia João Belo dos Reis. Foto/Juvinal Cabral dos Santos

Portavós PNTL, Superintendente Polísia João Belo dos Reis, ba jornalista sira  iha sala konferénsia Komadu Jerál PNTL, Segunda (05/01/2026),  informa durante selebrasaun loron natal no simu tinan foun, rezista kazu insidente iha Munisípiu tolu,  membru PNTL na’in tolu husi Komandu Munisípiu Ainaro hetan kanek tanba hetan tiru husi arma branka, no iha Ermera identifika katak vitíma na’in-neen  hetan kanek tanba kauza husi sasan balun maka rabenta.

Kazu parte Baucau perturbasaun Ordem Públika, joven sira asaltu malu, Polísia atúa,hafahe sira no tiru  gas   rebenta kona sidadaun ida nia ain.

Portavós Komandu PNTL ne’e relata iha primeiru insidente balun ne’ebé maka presiza públiku nia atensaun katak iha operasaun boot rua ne’ebé maka Polísia halo liu-liu hasoru Insidente iha Munisipiu Ainaro, Ermera inklui Baucau ninian.

“Atuasaun ba insidente ne’ebe akontese iha Ainaro, identifika katak membru PNTL na’in-tolu husi Komandu Munisípiu Ainaro hetan kanek tanba hetan tiru husi arma branka, segundu suspeitu na’in-10 husi parte Ainaro nian mós identifikadu no kazu ne’e aprezenta ona ba Ministeriu Públiku (MP) Suai nian ho NUC: 0002/2026-PNSIK,”  Portavós PNTL Superintendente Polísia João Belo dos Reis hateten.

Motivu husi kazu ne’e tanba problema pasadu ne’ebé la konsege rezolve no la iha ligasaun Arte marsiais, iha kazu ne’e vitima  husi  joven ida mos hetan kanek tanba hetan atuasaun husi Polísia.

“Depois parte sira ne’ebé involve ita aprezenta ba MP iha semana kotuk no rezultadu Primeiru Interogatoriu (PI) sira hetan aprezentasaun periódika ne’ebé prosesu hotu-hotu ami hein delegasaun  kompetensia husi MP. Xefe suku nia naran mos tama hotu suspeitu nain sanulu  ne’e,” nia hateten.

Membru PNTL na’in-tolu ne’ebé  hetan kanek ne’e deskonfia tiru husi arma branka, balun alta ona husi tratamentu no balun mak iha hela Hospital Nasionál Guido Valadares (HNGV) hein prosesu operasaun.

Superintendente Polísia ne’e hatutan,  kazu insidente seluk ne’ebe maka akontese iha Munisípiu Ermera nian, vitima identifikadu hamutuk ema na’in-ne’en (6) no suspeitu sei iha faze investigasaun hela, identifika katak vitíma sira hetan kanek tanba kauza husi sasan balun maka rebenta, tanba ne’e investigasaun sei lao hela, atu define katak ne’e gas maka nakfera ka fugetes hodi rezulta ema sira ne’e kanek.

“Kazu seluk ne’ebe ankotese iha Munisípiu Baucau, bainhira iha perturbasaun Ordem Públika joven sira asaltu malu, Polísia atúa, hafahe sira no tiru gas no gas ne’e rasik rebenta kona alin ida nia ain, tanba ne’e prosesu ba kazu ne’e mós sei lao hela, identifikasaun lao hela no kazu ne’e ami aprezenta ona ba Ministeriu Públiku (MP),” Superintendente Polísia ne’e hateten.

Portavós PNTL João Belo, hateten, kona-bá kazu Baucau kuandu identifika nelizensia ka infrasaun husi membru Polísia ruma provas konkreta asei aprezenta ba Komadu. Ema nain hira mak asegura ne’e sei hein investigasaun PNTL Komadu PNTL Munisípiu Baucau tempu badak sei fó sai.

Autoridade seguransa afirma, kazu asidente ida akontese iha Munisípiu Covalima parte Suai  iha ne’eba joven na’in-rua ho kondisaun lanu todan, halai motór ho velosidade  no konsege soke malu ikus mai joven na’in-rua ne’e mate iha fatin akontesimentu. Mate isin entrega ona ba família hodi hala’o prosesu funebre.

Iha kazu ne’ebé hanesan asidente iha Munisípiu Díli,  Diretur Diresaun Tranzitu Seguransa Rodoviaria Nasionál nia oan rasik mate tanba asidente mesak ne’ebe akontese iha parte Manleu nian.

Jornalista: Juvinal Cabral dos Santos