Hatutan.com, (20 Janeiru 2026), Díli– Komisaun Anti Kooperasaun (CAC-sigla Portugés) halo ona averiguasaun bá  kazu projetu fornesimentu karreta bucket truck unidade tolu (3) ba Eletrisidade Timor-Leste, Empreza Públika (EDTL,E.P)  ne’ebé la tuir nia espesifikasaun ne’ebé kontempla iha fatura kuantidade nian ka BoQ (Bill of Quantity) deskonfia iha inddisius korrupsaun.

Lee Mós: Dirijénte EDTL,E.P Kontínua Nonook ho Kazu Karreta Bucket Truck ho Kustu US$216,000.00

Diretór Ivestigasaun Kriminál CAC, José Verdial. Foto/Marcelina Tomae

Diretór Ivestigasaun Kriminál CAC, José Verdial, Tersa (20/01/2026), informa  CAC simu informasaun iha inisiu fulan-Janeiru  2026, maibé   konsidera seidauk iha  evidensia forte, tanba  ne’e  sei halo averiguasaun.

“Tanba informasaun mamuk de’it,  tanba ne’e  asuntu  kooperasaun, ita la bele lori informasaun  mamuk  ka ema seluk  nia istória, atu halo buat ruma,” nia hateten hateten.

Ekipa ivestigadór sira sei halo averiguasaun,  atu buka tuir informasaun ne’e  loos ka lae,  iha dokumentu ruma iha  ka lae, sá  dokumentu mak  presiza atu suporta ida-ne’e, sese maka envolve atu partisipa, nune’e maka CAC foin  halo auto partisipasaun bá Ministériu Públiku.

Nia informa daudaun ne’e ekipa ivestigadór sira sei halo averiguasaun   hodi rekolla dokumentu no prova  sufisiente,   atu prienese iha autos, molok halo autó partisipasaun bá Ministériu Públiku.

Nia afirma,  rejistu inkeritu no desizaun ikus ne’e iha Ministériu Públiku, atu delega fali CAC ka lae depende bá rezultadu apresiasaun.

Fó hanoin fali katak, projetu fornesimentu karreta bucket truck   unidade tolu (3) ho kustu US$216,000.00 ne’ebé manan husi empreza fornesidór Haksolok Group la kumpre rekizu balun iha BoQ tanba karreta  bucket truck   ne’ebé sitada iha kontratu ne’e karreta ho marka Isuzu, maibé  Haksolok Group fonese fali karreta ho marka Triton.

La’ós ne’e deit, tuir avaliasaun tékniku sira-nian katak bucket ne’ebé hatuur iha karreta triton ne’e la seguru bainhira funsionáriu ka pesoál traballadór sira utiliza ba servisu fatin aas ba manutensaun ai-riin eletrisidade nian, tesi ai-horis, inklui halo manutensaun ba liña distribuisaun eletrisidade nian iha área sira ne’ebé difisil.

Tuir fontes balun iha EDTL,E.P ne’ebé husu atu la bele públika nia identidade hateten, karreta bucket truck    ne’e la tuir ona espsifikasaun, maibé tékniku sira ne’ebé envolve iha projetu ne’e asina tiha ona P.O, maske nune’e, Prezidente Konsellu Administrasaun EDTL,E.P, Paulo da Silva, husu parte sira atu haruka fila karreta ne’e ba empreza fornesidór.

 Jornalista: Marcelino Tomae