Hatutan.com, (20 Janeiru 2026), Díli– Polísia Nasionál Timor-Leste (PNTL) Munisípiu Díli asegura ona suspeitu ka  autór na’in-haat ba kazu abuzu  seksual hasoru vitíma  ho inisiál FCL ne’ebé virál iha média sosial.

Suspeitu sira ba kazu violasaun seksual ne’ebé viral iha média sosiál. Foto/Polísia

Suspeitu ka autór na’in-haat ne’e ho  naran inisiál CON, JMPA, JGFPS, GAAG inklui suspeitu JGPR maibé  ba tiha eskola iha Indonézia.

“Iha video ida ita foin hetan dadauk video ne’e komesa virál iha média sosial, labarik minoridade sira halo asaun abuzu seksual iha ne’ebá. Ami sei prosesu autór sira ne’ebé involve,”  portavós Polísia Nasionál Timor-Leste (PNTL) Superintendente Polísia, João Belo dos Reis, ba jornalista sira iha sala konferénsia Komandu Jerál PNTL, Tersa (20/01/2026).

Portavós PNTL hateten, Polísia Diresaun Servisu Investigasaun Kriminál Nasionál (DIKN) servisu hamutuk ho servisu informasaun Komandu Polísia Munisípiu Díli halo esforsu hotu kaptura suspeitu ka autór sira atu bele loke prosesu hasoru sira.

Maske família husi vitíma no vitíma ne’e rasik seidauk hato’o keixa iha autoridade Polísia, maibé kazu sira hanesan ne’e krimi públiku, maka Polísia bele halo inisiativa hodi halo prosesu.

Hafoin portavós PNTL remata konferénsia imprensa parte autoridade seguransa ne’e konfirma katak, suspeitu ka autór sira ne’ebé halo asaun video abuzu seksuál ne’ebé espalla iha média sosial ne’e PNTL Munisípiu Díli asegura ona hein prosesu tuir mai.

Iha Tersa (20/01/2026), Hatutan.com asesu informasaun husi ekipa sekreta balun haktuir,  video ne’e mosu no espalla iha  Domingu (11/01/2026) hale’u 21:50 Otl, autoridade seguransa Munisípiu Díli hetan informasaun husi fontes sekreta katak  video ida  joven na’in-tolu ba leten halo violasaun seksual  ka abuzu seksual hasoru vitíma.

Hafoin  hetan faktus ka evidensia video husi fontes sekreta, autoridade seguransa  iha Sesta (16/01/2026), tuku 14:00 Otl, kontaktu kedas vitíma ba iha edifisiu Vulnerable Polísia Unit (VPU) Munisípiu Díli hodi buka tuir autór sira ne’e.

Relasiona kazu ne’e mós sasin ida ho naran inisial  TBCX mós ba presta ona deklarasaun no bainhira vitima mós kolabora ho PNTL Munisípiu Díli parte VPU hodi junta hamutuk ekipa SIP Makikit Ministériu Defeza (MD) ho Komandante SIP Ministériu Interior (MI) buka tuir autór konsege asegura sira suspeitu ka autór nain-haat ho  inisiál CON, JMPA, JGFPS, GAAG inklui JGPR maibé  ba tiha eskola iha Indonesia.

Jornalista: Juvinal Cabral dos Santos