Hatutan.com, (20 Janeiru 2026), Díli–Dezde fulan-Setembru tinan 2025, Komisaun Anti Kooperasaun (CAC-sigla Portugés) submete ona bá Ministériu Públiku (MP) kazu  projetu fornesimentu kombustivel no manutensaun karreta iha Rádiu Televizaun Timor-Leste Empreza Públiku (RTTL,E.P).

Lee Mós: MP Tenke Verifika Prova ho Sériu Bá Kazu Fornesimentu Kombustivél no Manutensaun Karreta iha RTTL.E.P

Logotipu RTTL,E.P. Foto/Espesiál Repro 

Diretór Ivestigasaun Kriminál CAC, José Verdial, informa andamentu bá kazu fornesimentu kombustivel no manutensaun karreta bá RTTL,E.P iha ona Ministériu Públiku.

“Prosesu ida-ne’e  ita haruka ona bá Ministériu Públiku,  ekipa CAC halo averiguasaun ,ita  halibur informasaun rekolla dokumentu balu, ita halo analizé ita halo ona partisipasaun iha   Ministériu Públiku iha  fulan-Setembru tinan 2025,” Direitor Ivestigasaun Kriminál CAC, José Verdial  informa ba Hatutan.com iha nia servisu fatin, Tersa (20/01/2026).

Nia afirma prosesu  bá kazu  RTTL,E.P ne’e nia andamentu oinsá, Ministériu Públiku maka hatene, tanba  CAC halo ona autopartisipasaun  bá Ministériu Públiku, nune’e  prosesu inkeritu  iha Ministériu Públiku,

“Kazu RTTL ne’e Ministeriu Públiku seidauk delega fali mai CAC atu nune’e ami bele halo investigasaun,” José Verdial hateten.

Iha  fatin hanesan Komisáriu Adjuntu Komisaun Anti Korrupsaun (CAC-sigla portugés) bá asuntu Investigasaun Kriminal, Alvaro Maria Freitas hateten, kazu  RTTL,E.P,  CAC halibur informasaun rekolla dadus, hodi prense bá autos, hato’o ona Ministériu Públiku.

“Dadus balun ami foti husi ita-boot sira Hatutan.com  nia públikasaun, imi ajuda  tebes ami nia servisu,  ami mós  rekolla  bá sira nia fatin, nune’e  tanba ita haree katak iha inddisius nune’e, ita aprezenta ona bá Ministériu Públiku,” Komisáriu Adjuntu Ivestigasaun CAC ne’e hateten.

Hatutan.com  halo ona   konfirmaasaun  bá Prokuradór Jerál Repúblika (PGR),  Nelson de Carvahlo,  iha resintu Parlamentu Nasionál, hafoin audensia  ho  Komisaun F, Segunda (19/01/2026), kona-bá andamentu kazu fornesimentu kombustivel no manutensaun karreta RTTL,E.P ne’e, maibé  PGR informa katak kestaun ne’e nia seidauk ne’e ko’alia ho razaun kole.

Lee Mós: AJAR Husu SEKOMS Ezonera Elizeu Isaac no Suzere MP Aselera Kazu Fornesimentu Kombustivél no Manutensaun Karreta RTTL,E.P

Maske  kazu projetu  Fornesimentu Kombustivel no Manutensaun Karreta iha Rádiu Televizaun Timor-Leste, Empreza Públiku (RTTL, E.P) ne’ebé Ministeriu Públiku bolu ona arguidu no sasin sira iha fulan-Outubru  tinan 2025, maibé PGR Nelson de Carvalho afirma katak nia laiha koñesimentu.

PGR Nelson afirma,  kestaun bá kazu fornesimentu kombustivel no manutensaun karreta iha RTTL, E.P  nia seidauk  bele ko’alia sai, maske ne’e kazu Públiku

“Ne’e ha’u seidauk bele ko’alia,  signifika  atu iha koñesimentu  ka laiha koñesientu, ha’u la halo komentariu bá ida-ne’e,  ha’u mós la taka ibun, maibé ha’u sei kole hela, buka tempu  uitoan maka ita ko’alia,” nia hateten.

Iha  Sesta  03  fulan-Outubru tinan 2025,   dirijente masímu iha RTTL,E.P, arguidu  EIF hosi   ba hatan ona iha Miministeriu Públiku  kona-bá kazu   ho NUK: 0015/25.CACTL kona-bá  fornesimentu kombustivel no servisu manutensaun karreta iha RTTL, E.P ne’ebé deskonfia abuzu poder, korrupsaun no hamosu prezuiju bá Estadu.

Iha Kuarta, 01 fulan-Outubru tinan 2025, Ministeriu Públiku  (MP) hasai ona notifikasaun ba dirijente sira iha RTTL,E.P hodi presta deklarasaun iha MP relativa ho kazu fornesimentu kombustivel no servisu manutensaun karreta ba RTTL,E.P ne’ebé deskonfia abuzu poder, korrupsaun no hamosu prezuiju ba Estadu.

Iha Tersa 14 fulan-Outubru 2025, dirijente RTTL,E.P na’in-tolu, presta deklarasaun iha Ministériu Públiku (MP) bá kazu projetu fornesimentu kombustivél  iha instituisaun média estatál ne’e.

Iha  loron hanesan mós na’in bá empreza Mãe da Graça Unipesoal Lda,  presta ona deklarasaun  iha Ministériu Públiku (MP) liga ho kazu fornesitmentu kobustivél iha Rádio Televizaun Timor-Leste Empreza Públiku (RTTL,E.P).

Fó hanoin fila katak Prezidente Konsellu Administrasaun RTTL,E.P, Elizeu Isaac Fernandes, deskonfia halo abuzu podér no hamosu prejuízu ba Estadu iha foti desizaun ba projetu  servisu fornesimentu kombustivel ho servisu manutensaun karreta iha RTTL,E.P.

Prezidente Konsellu Administrasaun RTTL,E.P, Elizeu Isaac Fernandes, uza nia kompeténsia hodi hatún despaxu fó projetu servisu fornesimentu kombustivel ho servisu manutensaun karreta ba kompañia rua (2) ne’ebé la prienxe rekizitu iha selesaun dokumentu no aprezenta presu boot ka la razoavel.

Tuir dokumentu  relatóriu avaliasaun servisu fornesimentu kombustivel ho klasifikasaun importante no númeru referénsia 07/Ekipa Juri/RTTL,E.P/IV/2025 ne’ebe    Hatutan.com  asesu hatudu, katak ekipa juri ho nia kompozisaun ema na’in-tolu mak hanesan;

Tuir dokumentu  relatóriu avaliasaun servisu fornesimentu kombustivel ho klasifikasaun importante no númeru referénsia 07/Ekipa Juri/RTTL,E.P/IV/2025 ne’ebe    Hatutan.com  asesu hatudu, katak ekipa juri ho nia kompozisaun ema na’in-tolu mak hanesan;

-Marcelino Osorio (prezidente juri)

-Lenia de Fátima Moreira (juri)

-Melchior Tino Ribeiro Rodrigues (juri).

Sira halo enkontru iha loron 25 fulan-Abríl 2025, deside  kompañia Aitula Fuel’s Unipessoal, Lda, hodi fornese kombustivel ba RTTL,E.P ho razaun presu razoavel no dokumentu ne’ebé kompañia submete kompletu tuir duni rekizitu ne’ebé RTTL,E.P mensiona.

Tabela avaliasaun dokumentu ba projetu servisu fornesimentu kombustivel ho nia kustu ka presu $40,000.00, hatudu kompañia Aitula Fuel’s Unipessoal, Lda hetan valor 130 no aprezenta montante orsamentu ki’ik $34,39 kompara ho kompañia Mãe da Graça Unipessoal, Lda, ne’ebé prezidente  Konsellu Administrativu RTTL,E.P, Elizeu Isaac Fernandes, indika hodi manan fali servisu fornesimentu kombustivel ba RTTL,E.P ho kustu $35,78 no hetan valor iha avaliasaun dokumentu 115 de’it.

Iha dokumentu karta akompañamentu ne’ebé Diretora Nasionál Administrasaun no Finansas RTTL,E.P, Noviana de Fátima Nahak, asina iha loron 29 fulan-Abríl 2025, hato’o ba Diretór Ezekutivu RTTL,E.P, João Guterres da Silva, reiteira tan katak bazeia ba rezultadu enkontru ekipa juri iha loron 25 fulan-Abríl 2025, hodi foti desizaun ba servisu fornesimentu kombustivel deside ba Aitula Fuel’s Unipessoal, Lda mak sai nu’udár manan na’in, ho razaun presu ne’ebé razoavel no dokumentu ne’ebé kompañia submete ho kompletu.

Iha fali loron 30 fulan-Abríl 2025, Diretór Ezekutivu RTTL,E.P, João Guterres da Silva, hato’o pedidu aprovasaun relatóriu avaliasaun servisu fornesimentu kombustivel ho númeru referénsia 31/D.E/RTTL,E.P/IV/2025, ba Prezidente Konsellu Administrasaun RTTL,E.P, Elizeu Isaac Fernandes,  atu aprova pedidu relatóriu avaliasaun servisu fornesimentu kombustivel.

Iha loron 13 fulan-Maiu 2025, Prezente Konsellu Administrasaun RTTL,E.P, Elizeu Isaac Fernandes,  hatún despaxu husu favór Diresaun Nasionál Administrasaun no Finansas (DNAF) trata asuntu ne’e fó oportunidade ba kompañia Mãe da Graça Unipessoal, Lda, ho razaun iha esperiénsia servisu hamutuk ne’ebé ho kometimentu ba servisu kualkér tempu.

Iha fali dokumentu seluk kona-bá servisu fornesimentu manutensaun karreta RTTL,E.P nian ho montante orsamentu $20,000.00, ekipa juri ho nia kompozisaun  juri mak hanesan, Marcelino Osorio (prezidente juri), Lenia de Fátima Moreira (juri), ho Melchior Tino Ribeiro Rodrigues (juri) halo enkontru hodi foti desizaun ba servisu fornesimentu manutensaun ba karreta  deside ba kompañia Fe Loog Unipessoal, Lda hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete ho kompletu tuir rekizitu ne’ebé RTTL,E.P husu.

Iha avaliasaun dokumentu ba projetu fornesimentu manutensaun ba karreta RTTL,E.P, kompañia Fe Loog Unipessoal, Lda hetan valor 130 no kompañia Fastep, Lda ne’ebé Prezidente RTTL,E.P Elizeu Isaac Fernandes, indika hetan de’it valor 110 tanba rekizitu sira hanesan TIN laiha no estatutu kompañia nian laiha.

Iha loron 29 fulan-Abríl 2025, Diretora Nasionál Administrasaun no Finansas RTTL,E.P, Noviana de Fátima Nahak submete karta akompañamentu ba Diretór Ezekutivu RTTL,E.P, João Guterres da Silva, ho númeru referénsia 98/DNAF-RTTL,EP/IV/2025, hodi solisita ba Diretór Ezekutivu RTTL,E.P, João Guterres da Silva,  atu bele hetan aprovasaun ba relatóriu ida ne’ebé ekipa juri deside kompañia Fe Loog Unipessoal, Lda maka manan hodi halo manutensaun ba karreta RTTL,E.P ho razaun presu razoavel no dokumentu ne’ebé kompañia submete kompletu.

Iha loron 13 fulan-Maiu 2025, prezidente RTTL,E.P, Elizeu Isaac Fernandes hatún despaxu husu favor ba DNAF atu trata asuntu ne’e no fó oportunidade ba kompañia Fastep, Lda tanba bazeia bá esperiénsia servisu hamutuk  ne’ebé profisionál no prontu ba RTTL,E.P

Jornalista: Marcelino Tomae