Hatutan.com, (21 Janeiru 2026), Díli– Ministru Justisa  (MJ), Sérgio da Costa Hornai, husu bá Diretór Nasionál Polísia Sientífiku Ivestigasaun Kriminál (PCIC-sigla portugés), Vicente Fernandes e Brito, kumpri orientasaun atu halo  averiguasaun bá membru  PCIC  ho inisial OdCA   ne’ebé utiliza  pistlola halo violénsia doméstika iha loron 02 fulan-Janeiru 2026.

Lee Mós: JSMP Husu Diretór Nasionál PCIC Labele “Taka Ibun” ho Kazu Membru PCIC Uza Pistola Halo Violénsia Doméstika

Ministru Justisa Sérgio da Costa Hornai. Foto/Marcelino Tomae

Ministru Justisa Sérgio da Costa Hornai bá Jornalista sira, Tersa (20/01/20026), informa katak dirijente PCIC tenke kumpri orientasaun Ministériu Justisa nian  hodi salva guarda instituisaun ninian.

“Hakarak ka lakohi  nia (Diretór PCIC-red) tenke kumpri orientasaun  ne’ebé hanesan jestor,  Ministériu Justisa.  PCIC tutela iha Ministériu Justisa,  tenke aprezenta relatóriu progrsesu  orden ne’ebé Ministru hatun bá  atu   salva guarda   dirijente iha ne’ebá ho instituisaun,” Ministru  Justisa Sérgio da Costa Hornai hateten.

Membru IX Governu Konstitusionál ne’e hatutan, prosesu averiguasaun bá membru PCIC ho inisiál OdCA tenke la’o  ho tempu ida naton hodi bele  hetan faktusno prova ida ne’ebé  sertu no hetan rezultadu ida di’ak.

Ministru Sérgio  informa, liga ho kazu membru PCIC  ho inisiál OdCA ne’ebé utiliza arma pistlola hal violénsia domestika iha  Segunda 19 fulan-Janeiru 2026, Ministériu Justisa  halo ona reuniaun ho  Diretór Nasionál PCIC, maibé seidauk iha  konkluzaun,  troka de’it informasaun jerál.

Ministru  Sérgio fundamenta katak, iha reuniaun sira tuir mai,  tanba Konsellu  Superiór PCIC ninian  orgaun  ne’ebé boot, atu halo reuniaun   hodi  ko’alia kona-bá situasaun internal iha órgaun polísia kriminál, espesial  bá PCIC nian, nune’e  bele haree bá projesaun polítika ne’ebé atu halo liu-liu  projesaun polítika bá kriminalidade ninian bá kombate  krime ninian.

Ministru Sérgio Hornai husu bá dirijente PCIC katak implementasaun ne’e tenke ho vigór, bá iha medida sira atu bele instituisaun  ne’e internalmente atu konsulida hodi hetan espasu  naton  atu bele lori konfiansa bá iha sosiedade, tantu iha ra- laran mós rai -li’ur.

Liga bá kazu ne’e Hatutan.com tenta beibeik ona  atu komfirma ho Direitor Nasionál PCIC,  Vicente Fernandes e Brito maibé  ho razaun katak tempu laiha.

Iha  loron rua tuituir malu, 07-08  Janeiru 2026, Hatutan.com tenta atu halo konfirmasaun ho Diretor  Nasionál  PCIC, Vicente  Fernandes e Brito, hodi  fó  esplikasaun bá kazu ne’ebé membru PCIC ho divizia investigadór komete, maibé  razaun katak la disponivel hodi fó entrvista bá kazu refere.

Iha  Sesta (09/01/2026)  haleu tuku 14:30  Hatutan.com tenta atu halo konfirmasaun ligasaun ho deklarasaun  Ministru Justisa, Sergio da Costa Hornai katak fó ona orientasaun bá Diretor Nasionál PCIC, Vicente Fernandes e Brito hodi halo prosesu averiguasaun, maibé husi parte gabinete informa tenke submete karta pedidu audénsia.

Fó hanoin fali katak Ministru Jusitisa, Sérgio da Costa Hornai,  fó ona instrusaun bá  iha Diretór Jerál  no mós Diretór Nasionál PCIC  hodi halo averiguasaun ba kazu membru PCIC ho inisiál OdCA ne’ebé deskonfia halo violénsia domestika  hasoru nia ferik-oan nune’e bele foti medida disiplinár.

“Arma Estadu nian ne’e  ita uza bá iha  servisu  no  banhira  ita iha situasaun perigu atu  sai salvasaun, la’ós uza arma hodi fó ameasa bá ema ruma,”  Ministru Sérgio de Jesus Fernandes da Costa Hornai hateten hodi responde Hatutan.com iha Palásiu Governu, Kuarta (07/01/2026).

Ministru Sérgio de Jesus Fernandes da Costa Hornai hateten, prosesu ne’e  tenke sansaun disiplinár no averiguasaun  tenke la’o   tuir tempu, tanba ne’e parte Ministru Justisa la bele   deklara katak loron ida ka rua  fó kedas ponisaun, ida ne’e  sai bele kontrariu  fali  ho proseu inkéritu ne’e rasik.

Kona-bá membru PCIC ho inisiál OdCA deskonfia envolve beibeik iha kazu sira, maibé la iha medida ruma husi superior másimu PCIC nian, Ministru Sérgio da Costa Hornai, hateten se membru PCIC ne’e  komete bebeik aktu krime sira, maka Diretór Jerál PCIC tenke foti medida atu fó supensaun ka  deminsaun bá membru refere.

Informasaun ne’ebé Hatutan.com asesu katak  iha loron 02 fulan-Janeiru 2026, membru PCIC ho inisiál OdCA halo violénsia no uza armas pistola amesa  nia-kaben  ho inisiál DX hanesan mós membru PCIC.

Kazu refere vitíma  nu’udár OdCA nia ferik-oan halo keixa no rezista ona iha Ministériu Publiku ho Nuk:001/26.PCIC.

Membru PCIC OdCA ho kondisaun lanu halo violénsia domestika no amesa ho pistola hasoru nia kaben DX  no oan na’in-rua la ho razaun klaru, depois vítima kontaktu bá Komisáriu PCIC hodi informa no ekipa prevensaun bá foti vítima hodi halo prosesu hasoru membru refere.

Membu PCIC ho inisiál OdCA ne’e iha hela prosesu kriminál antesende no disiplinar husi PCIC no Tribunál, maibé kontinua halo krime doméstika hasoru nia kaben.

Jornalista: Marcelino Tomae