Hatutan.com, (22 Janeiru 2026), Díli – Polísia Sientífiku Ivestigasaun Kriminál (PCIC-sigla portugés)  seidauk konkui  ezaminasaun bá objetu sira husi kazu  krime partisipasaun ekonómiku no negósiu ne’ebé deskonfia envolve husi dirijente ida iha empreza estatál Timor GAP,E.P ho inisiál AC.

Lee Mós: CAC Rekolla Komputadór, Telemovel ho Karreta Rua iha Rezidénsia Direjente Timor Gap ho Inisiál AC

Portavós PCIC, Mário Tavares. Foto/Marcelino Tomae

Portavós PCIC, Mário  Tavares bá Hatutan.com  iha edifisiu PCIC, Kinta (22/01/2026), informa,   Ministériu Públiku haruka ona  objetu sira  husi Timor GAP, E.P hanesan telemovel, Uiversál Serial Bus (USB) no objetu  seluk tan bá laboratóriu  PCIC hodi halo ezaminasaun, maibé seidauk konklui.

“Kona-bá prosesu ezaminasaun tuir regra prosesuál, autoridade judisiál haruka mai iha laboratóriu PCIC atu halo ezaminasaun. Depois kuandu termina  ezaminasaun ne’e haruka fila-fali bá autoridade judisiál hanesan Ministériu Públiku,”  Mário Tavares hateten.

Nia afirma, prazu atu termina ezaminasaun bá objetu sira ne’e to’o agora  nia  seidauk hetan relatóriu bá ida-ne’e,  tanba ne’e,  nia seidauk iha informasaun kona-bá rezultadu ezaminasaun ne’e remata tiha ona  ka seidauk.

Nia esplika kualker  prosesu investigasaun prazu bá prosesu ezaminasaun  bá objetu  ne’e,  prosesu prosesuál, katak dentru bá  prazu  refere ezame ne’e tenke halo hotu.

“Ha’u hanoin ezaminasaun ne’e ekipa laboratóriu halo hela,  tanba ita atu halo ezame bá objetu  telemovel no USB ho buat ne’ebé liga ho informátiku ne’e,  la hanesan halo ezame bá falsifikasaun dokumentu,  ita halo lalais de’it,  tenke haree neneik presiza  mós despozitivu balun atu suporta  bá ezame ne’e,” nia afirma.

Tuir nia hanoin katak, prosesu ezame   ekipa laboratóriu PCIC halo hela,   bainhira maka  hotu,  depende bá prazu  ne’ebé    Ministériu Públiku orienta bá PCIC hodi  análize bá objetus sira ne’e.

Husi sorin seluk Diretór Investigasaun Kriminál Komisaun Anti-Korrupsaun (CAC-sigla portugés), José Verdial hateten,  liga bá kazu krime ne’ebé deskonfia envolve dirijeten Timor GAP, E.P ho inisiál AC iha hela prosseus investigasaun.

Nia esplika,  orientasaun Ministériu Públiku nian, CAC servisu hamutuk ho PCIC agora parte Laboratóriu iha PCIC halo hela ezaminasaun bá objetu sira husi Timor GAP,E.P.

“Sasan ne’ebé maka ita prende  no buska  no apreensaun ita tenke haruka  bá Ministériu Públiku,  hodi haruka bá Tribunál atu valida,  entaun  sasán sira ne’e ita haruka ona bá Ministériu Públiku, inklui karreta ida,” nia dehan.

Fó hanoin fali katak iha Kuarta, 17 fulan-Dezembru 2025,  Komisaun Anti-Korrupsaun (CAC), liuhosi Servisu Investigasaun Kriminál, halo buska no apreensaun ba direjente Timor GAP,E.P, ho inisiál AC iha ninia rezidénsia privadu ne’ebé lokaliza pertense iha área jurizdisaun Munisípiu Díli.

Lee Mós: CAC Halo Buska Bá Dirijente Timor Gap ho Inisiál AC

Jornalista: Marcelino Tomae