Hatutan.com, (30 Janeiru 2026) Díli – Governu da-sia (9) aloka orsamentu ho montante US$2,988,290 hodi halo manutensaun  bá edifisiu Ministériu Finansas (MF).

Anin ho intensidade forte iha Kinta, 29 Janeiru 2026, halo plafon edifisiu MF nian monu. Foto/Marcelino Tomae

Diretór Nasionál Lojistika, Manutensaun no Jestaun Projetu Ministériu Finansas, Domingos Marques, hateten Ministériu  Finansas estabelese  ho kontratu ho  empreza konjunta EUREKA JV PT. SEMENT INDONENSIA ho montante US$2,988,290. Ho nune’e, empreza konjunta refere maka halo hela manutensaun.

“Manutensaun ne’e bá edifisiu Ministériu Finansas tomak ho  orsamentu hamutuk US$2,988,290. Manutensaun ne’e husi andár leten tuun mai iha andár okos liu. Prosesu  manutensaun ne’e la’o hela, maka anin-boot sobu plafon,” Domingos Marques informa ba jornalista sira iha Ministériu Finansas, Sesta (30/01/2026).

Anin ho intensidade husi moderadu ba forte ne’ebé akontese iha Díli,   Kinta,  29  fulan-Janeiru 2026, halo plafon balun iha Edifísiu Ministériu Finansas naksobu no namtate tuun mai rai.

Mézmu plafon sira balun monu, maibé la rezulta ema ruma kanek no empreza konjunta EUREKA JV PT. SEMENT INDONENSIA kontinua halo hela ba prosesu manutensaun nian.

Observasaun Hatutan.com iha  iha resintu Edifisiu Ministériu Finansas, nota plafon ne’ebé sobu mak iha parte husi  veranda oin.

Jornalista: Marcelino Tomae