Hatutan.com, (04  Fevereiru 2026) Díli– Membru Conselho de Imprensa  de Timor-Leste, Konselleiru Benevides Correia  Barros,  triste no konsidera atitude  Ofisiál Mídia Sekretáriu Estadu Komunikasaun Sosiál (SEKOMS), Tito Livio,  impede Jornalista Hatutan.com iha espasu públiku iha  Rádiu Televizaun Timor-Leste, Empreza Públiku (RTTL,E.P), ne’e violasaun grave hasoru Konstituisaun RDTL artigu 40 ho 41 kona-ba Liberdade Espresaun no Liberdade Imprensa.

Lee Mós: Impede Jornalista Hatutan.com, AJAR Konsidera SEKOMS ho Nia Subordináriu Prátika Rejime Ditadura Soeharto

Jornalista Hatutan.com halo entrevista ho membru Konsellu Imprensa, Benevides Coreia Barros iha edifisiu Konsellu Imprensa iha Kintal-Boot, Díli, Sesta (16/01/2026). Foto/Dok.Média KI

Membru Conselho de Imprensa de Timor-Leste ne’ebé nomeia husi Parlamentu Nasionál ho koñesimentu legal ka jurista,  Benevides Coreia Barros,  Kuarta (04/02/2026), responde Hatutan,com liuhosi telefoneka  esplika  iha artigu 11 Lei Komunikasaun Sosiál    númeru 15/2014,  define no regula klaru katak liberdade imprensa no liberdade espresaun só limete de’it bá hanesan ema nia naran di’ak, reputasaun, prezunsaun inosénsia, segredu justisa no segredu Estadu.

Nia  esplika tan, fora husi  artigu 11  lei Komunikasaun Sosiál  númeru 15/2024, jornalista  sira no públiku  iha direitu bá kualker situasaun,  iha kontestu atu halo kobertura. Tanba iha lei Komunikasaun  Sosiál define no regula katak, kualker  entidade tantu  husi membru Governu sira,  instituisaun públiku Estadu nian iha kada  liña ministériu sira tenke fó espasu públiku ba jornalista sira atu halo kobertura  hodi  fó informasaun bá públiku.

Konselleiru Benevides Coreia Barros dehan direitu  públiku tuir lei Komunikasaun Sosiál, atu livre asesu  bá kualker notísia no informasaun. Tanba lei Komunikasaun Sosiál bandu no pruibidu,  interferénsia husi podér polítiku no podér autonomiku sira  bá liberdade imprensa, independénsia editoriál no liberdade espresaun.

“Lei Komunikasaun define no regula,  katak públiku no membru Governu sira, labele halo impedimentu no  la bandu Jornalista sira atu halo kobertura iha espasu públiku,  ne’e maka ita dehan iha ministériu sira, iha Palásiu Governu,  iha Palásiu Prezidente, Parlamentu Nasionál, inklui instituisaun públiku nia edifisiu,  ka kualker fatin públiku hanensan RTTL.E.P ne’e institusaun Estadu, labele  iha impedimentu husi membru Governu ida ba jornalista sira halo nia atividade kobertura,” Benevides Corea Barros afirma tan.

Nia esplika, papél jornalista ne’e labele iha interferénsia poder polítika no  poder ekonómia bá ema nia direitu atu halo espresaun,  no direitu públiku atu hatene informasaun ne’ebé  órgaun komunikasaun sosiál liuhusi mídia no jornalista sira fó sai bá  públiku.

Liga ho  atitude ne’ebé Sekretáriu Estadu Komunikasaun Sosiál  (SEKOMS) nia ofisiál mídia  Tito Livio halo hasoru  Jornalista Hatutan.com,  Konselleiru Benevides Coreia Barros, kondena no dehan tan ne’e  la’ós  de’it  viola lei Komunikasaun Sosiál, maibé viola mós Konstitusaun RDTL  iha artigu 40 no 41.

“Ne’e SEKOMS ho nia subordináriu sira halo violasaun gravee bá konstitusaun RDTL kona-ba direitu públiku atu hetan informasaun no viola mós liberdade Imprensa no liberdade espresaun,” nia hateten.

Nia afirma, tanba espiritu liberdade imprensa no liberdade espresaun, liberdade asembleia, liberdade manifestasaun no liberdade petisaun ne’e define klaru iha artigu 40 no 41.

“Iha ita nia lei Komunikasaun Sosiál mós bandu atu halo sensura, atu halo sensura bá kualker Mídia,  no bá Jornalista sira ne’ebé servisu iha mídia  ne’ebá,  labele halo sensura, tanba sensura ne’e viola lei no mós viola konstitusaun,” Konsaelleiru Benevides Coreia Barros afirma tan.

Konselleiru Benevides Barros  mós fó hanoin no fó ezemplu kona-ba  iha tinan kotuk,  UNDP ka UNESCO halo atividade iha espasu RTTL.E.P, banhira Sekretáriu Estadu Komunikasaun Sosiál (SEKOMS), Expedito Dias Ximenes  haruka tiha Jornalista sira  sai atu la bele kobertura, maka Conselho de Imprensa de Timor-Leste  halo kedas pozisaun,  no haruka karta bá SEKOMS  katak labele halo intervensaun  bá kualker mídia no jornalista iha espasu Públiku.

Lee Mós: Ofisiál Mídia SEKOMS Impede Jornalista Hatutan.com Halo Kobertura iha RTTL,E.P

“Ami haruka karta  botifikasaun bá SEKOMS, tanba ne’e viola lei no konstitusaun, tanba ne’e sei ida-ne’e maka SEKOMS kontinua halo bá imi  Hatutan.com, imi halo karta bá Conselho de Imprensa hola nia pozisaun,” Konselleiru Benevides Barros enkoraja jornalista Hatutan.com.

Esklaresimentu Ofisiál hosi SEKOMS

Sekretária Estadu Komunikasaun Sosiál (SEKOMS) fó sai komunikadu ofisiál hodi esklarese informasaun ne’ebé publika husi Mídia HATUTAN.com ho nia títulu kona-bá Ofisiál Mídia SEKOMS Impede Jornalista Hatutan.com Halo Kobertura iha RTTL,E.P, relasiona ho kobertura jornalístika ba serimónia Hand Over Prezidente Konsellu Administrasaun Rádiu Televizaun TimorLeste Empreza Públiku (RTTL.E.P) foun, Rosário da Grasa Maia, iha loron 3 fulan-Fevereiru tinan 2026.

Komunikadu ne’e subliña katak alegasaun kona-ba bandu jornalista sira laiha baze faktuál no la reflete baze faktuál no situasaun iha terenu.

Tuir esplikasaun Sekretaria Estadu Komunikasaun Sosiál (SEKOMS) katak, organizasaun mídia hotu-hotu, inklui HATUTAN, iha direitu no oportunidade hanesan atu halo kobertura ba eventu ne’e. Laiha polítika, diretiva, ka instrusaun hosi SEKOMS ne’ebé ho objetivu atu restrinje asesu ba imprensa ka impede dezempeñu kna’ar jornalístiku nian. Tanba ne’e. SEKOMS subliña importánsia ba ezatidaun no verifikasaun informasaun nian molok habelar ba públiku.

SEKOMS husu ba publika atu lalika fiar informasaun ne’ebé la bazeia ba faktu verifikável. Kompromisu ba liberdade imprensa, no asesu garantidu ba informasaun kona-ba atividade ofisiál estadu nian subliña nu’udar prinsípiu ne’ebé SEKOMS kontinua kaer metin iha ninia prátika komunikasaun públika. REMATA

 Konolójia Ofisiál Mídia SEKOMS Tito Livio Impede Jornalista Hatutan.com

 Baze ba informasaun ka ajenda SEKOMS nian ne’ebé asesor SEKOMS, Augusto Sarmento “Turky Reis” partilla iha grupu WhatsApp, ho nia konteudu orijinál “Agenda – Ohin 3 fevereiru 2026 SECOMS aprezenta Prezidente rttl foun ba iha RTTL Oras 10:00”  Nune’e, jornalista Hatutan.com, Marcelino Tomae partilla tutuan ba redasaun Hatutan.com hosi hetan autorizasaun halo kobertura ba atividade SEKOMS nian ne’e. Ho nune’e,  hale’u  tuku 10:25  dadeer, jornalista Hatutan.com, Marcelino Tomae, haka tba to’o iha resintu RTTL,E.P no bianhira nia hakat tama ba nia haree Jornalista  husi média seluk hanesan SMnewes T.L Media Demokrásia ho Jornalista sira iha RTTL,E.P halo ona  kobertura  ba atividade ka serimonia Hand Over Prezidente Konsellu Administrasaun Rádiu Televizaun TimorLeste Empreza Públiku (RTTL.E.P) foun, Rosário da Grasa Maia ho prezidente RTTL,E.P sesante Elizeu Isaac Fernandes ne’ebé akompaña husi SEKOMS, Expedito Dias Ximenes, no konvidadu sira seluk tan.   

Banhira jornalista Hatutan.com, Marcelino Tomae  tama bá no  hamriik  hela seidauk to’o minutu ida,  Ofisiál Mídia SEKOMS,  Tito Livio husik kameran  hodi mai dereita kedas hasoru Marcelino Tomae lia-tun dehan, “sé maka haruka ó mai.”

Marcelino Tomae nu’udár jornalista Hatutan.com hatán Ofisiál Mídia SEKOMS,   Tito Livio hodi dehan, “ha’u mai kobertura eventu ne’e.”

Rona tiha lia hirak ne’e,  ofisiál mídia SEKOMS,   Tito Livio mós fila-fali bá foti nia kamera  hodi kontinua foti video bá serimonia ne’e

Banhira serimonia ne’e remata, Marcelino Tomae hasé   ofisiál mídia SEKOMS Tito Livio hodi dehan, “Ita hase ha’u hanesan foin ne’e intensaun saída?”. Nune’e, Tito Livio lia-tun fali dehan, “Sé  maka komvida ó mai, sei maka haruka ó mai,  SEKOMS la fó ajenda bá  ita-boot.”

Ho ida ne’e, jornalista Marcelino Tomae simu malu ka diskuti malu kedas ho ofisiál mídia SEKOMS,   Tito Livio iha ema lubun sira nia oin, liuliu iha ema hotu ne’ebé paritispa iha serimonia ne’e, ho    nune’e, diretór ezekutivu RTTL,E.P, João Guterres no Xefe Redasaun RTTL,E.P  Jeronimo Amaral da Silva, hakat mai hodi hakalma sira dezentendimentu entre jornalista Hatutan.com, Marcelino Tomae ho ofisiál mídia SEKOMS,   Tito Livio. **Hatutan.com