Hatutan.com, (16 Fevereiru 2026), Díli-Polísia Nasionál Timor-Leste (PNTL) liuhusi Diresaun Nasionál Tránzitu Seguransa no Rodaviaria (DNTSR)  ho Diresaun Nasionál Transporte no Terrestre (DNTT) asina ona nota kooperasaun hodi kontrola  no atua  movimentu  motór elétriku (Scooter),  liuliu ba minoridade  ne’ebé livremente kondus laiha karta kondusaun.

Motór elétiku (scooter). Foto/Google

Xefe Departamentu Koodenasaun Jestaun Risku, Formasaun Edukasaun Sivíka husi Diresaun Nasionál Tránzitu Seguransa Rodaviaria, Superintendente Asistete Polísia, Domingos Sarmento Gama, Segunda (16/02/2026), informa dadaun ne’e mosu preokupasaun barak kona-bá movimentu motór elétriku iha estrada públiku,  tanba dala barak liu labarik mak kondus, alaruma tula ema  rua ka tolu no la kumpre  ba iha Kódigu Lei Estrada númeru 6/2003 liu-liu la uza kapasete no la respeita sinál tránzitu.

“Bazeia ba preukupasaun ida-ne’e, foin lalais,  parte Tránzitu Seguransa Rodaviariu ho Diresaun Nasionál Transporte Terrestre halo enkontru konjunta ida atu oinsá mak foti medida ba motór kiik sira,” Polísia Domingos Sarmento Gama, ba jornalista sira iha nia kna’ar fatin iha Díli.

Nia dehan, motór scooter ne’e la kategoria hanesan bisikleta, maibé ida ne’e  konsidera iha artigu kodigu estrada numeru 6/2003 iha artigu 101° motór siklu ne’ebé kategoria roda-rua no roda -tolu.

 “Sidadaun sira ne’ebé mak atu utiliza motór scooter ne’e tenke ser iha dokumentu no tenke ser mós iha karta kodusaun para sira-nia movimentu envolve iha asidente ruma ka ou envolve violasaun sinais ou kontra ordinatoriu ruma ita bele hola medida tuir lei kodigu estrada,” Domingos Gama esplika.

Nia dehan, Leí kódigu estrada artigu  120° ko’alia  kona-ba sidadaun ne’ebe mak direitu atu hetan  karta kondusaun ne’e ema hotu hatene iha ne’ebá menus liu para atu hetan karta kondusaun kategória A1 ne’e  tinan 16 ba leten, sé karta kondusaun AB ka C ka  kategoria E  ne’e tenke tinan  18 ba leten.

“Maibe motór ki’ik sira ne’ebé mak oras ne’e dadaun ita dehan kuaze iha kapitál Dili ita haree no observa labarik sira minoridade sira tinan 10 no tinan 11 sira mak komesa domina. motór escuter, ida ne’e hakarak ka lakohi estadu  liuhusi parte Diresaun Tánzitu Seguransa Rodaviaria serbisu hamutuk  ho Diresaun Nasionál Transporte Terrestre (DNTT) hola medidas bazeia ba artigu 101°, tanba motor scuter ne’e nia velosidade ne’e kuase mais ou menus hanesan motor bain-bain,” Domingos Gama informa.

Motór scooter ne’e kuandu envolve asidente soke ema ne’e bele mate, entaun  Diresaun Tránzitu Seguransa Rodaviaria no DNTT deskute ona atu hasai avizu ba públiku liu-liu ba inan-aman sira ne’ebé mak sosa motór scooter ne’e, atu sosa karik, ba oan sira ne’ebé mak ho idade adultu,  tinan  16 ba leten  bele utiliza.

Ba sira ne’ebé  minoridade,  parte Polísia husu ba  inan-aman sira labele autoriza para utiliza motór scooter,  tanba sé bainhira  aviza ona ba oin sei halo atuasaun, entre diresaun rua tranzitu seguransa rodaviaria no DNTT  halo ona konkordansia para halo operasaun ba motór scooter sira iha kapital Díli.

Jornalista: Juvinal Cabral dos Santos