Hatutan.com, (20 Fevereiru 2026), Díli– iha fulan-Janeiru 2026, Komisaun Anti-Korrupsaun (CAC-sigla Portugés) rijistu kazu krime korrupsaun 27 no husi númeru kazu ne’e, CAC sumete ona kazu neen (6) ba Ministériu Públiku (MP).

Lee Mós: CAC Halo Averiguasaun Bá Kazu Deskonfia Abuzu Poder no Korrupsaun iha Fundasaun Fundu Media

Komisáriu CAC, Rui Pereira dos Santos. Foto/Dok

“Ita espera katak prosesu kriminál  bá krime korrupsaun sira bainhira maka Ministériu Públiku  atu delega mai fali CAC,” Komisáriu CAC, Rui Pereira dos Santos, informa ba jornalista sira, Sesta (20/02/2026).

Maske Rui Pereira infroma kazu krime korrupsaun neen mak haruka ba MP, maibé nia la esplika detallu kazu krime korrupsaun saida deit. 

Nia hateten iha problema servisu sira iha CAC ho Ministériu Públiku ne’e normál,  tanba kada tinan,  halo avaliasaun, maka foin hatene frákeza sira ne’e, hanesan mós iha Ministériu Públiku, tanba ne’e  Komisáriu Rui Pereira dos Santos, afirma laiha dezetendimentu  entre Komisaun Anti-Korrupsaun ho Ministériu Públiku.

Nia afirma,  tanba kompeténsia kriminál bá kazu korrupsaun iha tuir  lei ne’e hateten  klaru, iha CAC maka tenke halo investigasaun.

Molok ne’e, iha loron 11 fulan- Fevereiru  2026,  Jornalista sira konfirma ona Prokuradór Jerál Repúblika (PGR), Nelson de Carvalho, kona-bá MP halo intereferénsia ka avoka no bandu CAC la bele halo buska no apreensaun iha públiku ba suspeitu kazu krime  korrupsaun sira, maibé  lakohi fó komentáriu no nia dehan de’it husik públiku maka analizé rasik, tanba saída maka MP remite fila prosesu krime korrupsaun ne’ebé CAC aprezenta.

“Ita boot sira maka halo analizé bá kazu ida-ne’e, kestaun ne’e tanba saída, ha’u laiha resposta bá ida-ne’e,  maibé andamentu ne’e maka avoka, fila fali bá,  ne’e kada prokuradór jerál iha  Primeiru Instánsia sira,  avoka hotu kedas,” PGR Nelson Carvalho hateten.

Jornalista: Marcelino Tomae