Hatutan.com, (21 Fevereiru 2026), Díli-Advogadu privadu Octávio Cardoso, lamenta ekipa konjunta Polísia Nasionál Timor-Leste (PNTL) nia maneira atuasaun halo buska no apreensaun ba nia kliente  sidadaun Xinan na’in-18 iha rezidénsia ida  iha Fomento, Comoro, Díli, tanba la kumpre prosedimentu no la aprezenta mandadu buska no apreensaun husi Tribunál.

Lee Mós: PNTL Halo Buska no Apreensaun Ba Xinés Na’in-18 iha Fomento I

Advogadu privadu, Octávio Cardoso. Foto/Juvinal Cabral dos Santos

Iha Sesta (20/02/2026), hale’u tuku 18:00 Otl, ekipa konjunta husi PNTL halo buska no apreensaun ba rezidénsia privadu ida iha Fomento, Díli, tanba deskonfia halo instalasaun ba atividade jogu ilísitu online scamming.

Iha buska ne’e, autoridade Polísia halo idenitifkasaun ba sidadaun estranjeiru ho nasionalidade Xina na’in-18, inklui halo apreensaun ba ekimpamentu sira hanesan ekipamentu safety Box (brankas tau osan 1), modem wireless  ida (1),  Komputador PC hamutuk 12, meza desktop rua (2), meja kik tolu  (3), kama andár 10, spring bed 20 ne’ebé tau iha kuartu neen (6) nia laran.

“Iha akontesimentu ida ne’ebé mak ita hotu asiste Sesta-kalan (20/02/2026), primeiru hanesan advogadu ba iha prosesu ne’e, liu-liu haree ba iha parte prosesual ne’ebé mak ha’u sente duvida ba iha maneira atuasaun halo husi ekipa Polísia mai iha ita nia rezidénsia,” Octávio Cardoso hateten ba jornalista sira liuhusi konferénsia imprensa iha Fomento, Sábadu (21/02/2026).

Nia afirma, primeiru atu hateten katak ida ne’e rezidénsia, portantu iha oras ka tempu ema ida atu ba tama iha uma laran atu passa revista, asegura sasán, halo apreensaun, iha Kódigu prosesu penál iha ne’ebá prevé katak tenke iha mandadu buska apreensaun ne’ebé mak husi Tribunál.

“Ekipa sira mai ho razaun katak ne’e hanesan flagante de litu, atu ko’alia flagante de litu maibé ita boot sira rasik akompaña katak sasán sira ne’ebé mak halo apreensaun atuál ida ne’e la iha evidénsia balun ne’ebé mak iha indikasaun katak atividade ne’e la’o hela ka halo hela instalasaun,” Advogadu privadu Octávio Cardoso hateten.

Tuir nia haree la iha indisiu ne’ebé mak bele halo sira atu ultrapassa ka tama iha rezidénsia abitante ida nain tanba la iha mandadu tribunal hodi halo uma-na’in sira mós la satisfas.

“Pelumenus ita amostra, ita nia maneira atuasaun liu-liu hanesan reprezenta instituisaun Estadu Timor-Leste tenke hatudu ita nia profesionálismu hodi  servisu tuir Kódigu ne’ebé mak regula,” Octávio Cardoso  hateten.

“Sasán ema nia na’in mós seidauk loke, tantu atu  instala mós seidauk nia sei arma hamutuk hela. Sé mak lakohi atu koopera sé uma-ves katak ita iha ona deskonfia, mais ha’u nafatin dehan labele tanba buat hotu-hotu ita labele konsidera katak  ida ne’e nia faktu ne’ebé mak atu kabe ba krimi imputa ba sira la iha ne’e ita labele analojia, ne’e Leí bandu ita labele hateten katak ema ida komete krime,” Octávio Cardoso hatutan.

Hanesan advogadu abitualmente prosesu normál ne’ebé mak akompaña aleinde halo defeza ba kliente nafatin fó pareser informalmente liuhusi Konferensia Imprensa ne’e atu loke no fó hanoin bá pesoal ho dirijente sira ne’ebé mak lidera ekipa halo atuasaun iha terenu.

Jornalista: Juvinal Cabral dos Santos