Hatutan.com, (26 Fevereiru 2026), Díli-Diresaun Nasionál Transporte no Terrestre (DNTT) hamutuk Diresaun Tránzitu Seguransa Rodoviaria Nasionál (DTSRN) hasai ona  sirkular konjunta ba públiku hodi regula ema ne’ebé kondús motór elétrika  ka scooter tenke ho idade tinan 16 no tenke iha karta kondisaun ho kategoria A1.

Lee Mós: PNTL Sei Atua Minoridade Utiliza Motór Elétriku

Minoridade sira kontinua kondús motór elétriku. Foto/Juvinal Cabral dos Santos

Ba labarik sira ne’ebé kontinua utiliza motór elétriku ka scooter sei prende no aplika lei ka regra tránzitu nian.

Dadaun ne’e labarik barak mak kondús scooter iha estrada públiku ne’ebe bele fo ameasa ba sira nia vida no mós perturba movimentasaun rodoviária. Ho nune’e, Diresaun Nasional Transportes Terestres hamutuk ho Diresaun Tránzitu Seguransa Rodoviária fó hatene ba komunidade tomak,  liu-liu ba inan-aman sira katak, labele autoriza oan sira ho minoridade kondús scooter iha Estrada públiku.

“Komunikadu konjunta mós ami fó sai tiha ona atu nune’e husu ba komunidade no labarik sira labele kondús Scooter iha estrada públiku,” Diretora Nasionál Transporte no Terrestre (DNTT), Maria Antónia Vitór da Costa, informa ba jornalista sira iha nia knaar fatin, Balide, Kinta (26/02/2026).

Nia afirma, labarik sira kondús scooter ne’e  fó ameasa ba sira-nia vida, aleinde ne’e mós sira halo perturbasaun movimentasaun rodoviária.

“Ami sei halo pasa revista (sweeping) no mós operasaun konjunta, tanba baibain ita haree iha plenária Deputadu sira sempre foti ida-ne’e, ita haree katak minoridade sira ne’ebé mak kondús Scooter ne’ebé fó risku ba sira-nia vida no perturba mós movimentu transporte iha Estrada públiku,”  nia afirma.

DNTT iha ona planu bazeia ba Dekretu Leí 64  kona-bá importasaun sei  kona-bá scooter sira ne’e  no depois bele implementa atu motorista sira utiliza kapasete, karta kondusaun, no dokumentu.

Nia rekoñese iha Munisípiu barak, mak liu-liu iha Covalima no  Bobonaro iha parte Atabae nian haree katak  motór elétriku sira ne’e barak halo movimentu iha estra públiku.

“Ita sei koordenasaun ho polísia tránzitu ninian sei halo atuasaun to’o ba munisípiu sira,” nia afirma tan.

Iha sorin seluk Diretór Tránzitu Seguransa Rodoviaria Nasionál (DTSRN) Superintendente -Xefe Polísia António Mauluta ba jornalista sira, iha nia knaar fatin Komandu jeral PNTL, haktuir, foin lalais sira halo sosializasaun hamutuk ho DNTT iha Manatuto alerta katak tuir artigu Leí tránzitu nian 120° bandu minoridade utiliza motór.

“Oras ne’e daudaun sirkular la’o dadauk ami sei determina tan loron para oinsá ami halo operasaun, maibé kalan balun ita halo ona  no balun ita prende ona,” Superintendente -Xefe Polísia António Mauluta hateten.

Atu uza kondús scooter tuir DNTT ba ema ne’ebé adultu  no  tenke iha karta kondusaun no trata dokumentus hanesan motór baibain.

Jornalista: Juvinal Cabral dos Santos