Hatutan.com, (11 Marsu 2026), Díli– Komisaun F Parlamentu Nasionál ne’ebé trata asuntu Saúde, Igualdade Jéneru no Seguransa Sosiál liu husi fiskalizasaun, Kinta (11/03/2026), nota katak Instituisaun Nasionál Farmásia Produtu Médiku (INFPM siglá portugés) enfrenta stock out ai-moruk hoi presentajen 32 (%).

Lee Mós: Armazén Sentrál INFPM Rejista Total Reajente Atinje 88%

Kuadru Armazén Sentral INFPM iha Kampu Alor, Díli. Foto/Dok.Hatutan.com

Prezidente komisaun F PN, Maria Gorumali haktuir foin primeira-vez iha tinan 2026 Komisaun F halo  vizita fiskalizasaun ba INFPM  hodi haree l stock ai-moruk ne’ebé mak disponivél no mós la disponivél.

“Husi dadus ne’ebé ami hetan katak item ai-moruk ne’ebé iha hamutuk 1.407, ai-moruk ne’ebé mak disponivél  hamutuk 68% no ai-moruk la disponivél stock out hamutuk 32% signifika katak persentajen stock out mós aas,” Deputada Maria Gorumali Barreto informa ba jornalista sira iha edifisiu INFPM, Kampu Alor, Díli.

Membru Parlamentu Nasionál ne’e afirma  husi esplikasaun INFPM katak durante ne’e INFPM  simu ai-moruk mai depois kontinua halo distribuisaun ba INFPM iha regionál sira hanesan iha Baucau, Bobonaro no Covalima tanba ne’e afeta mós ba iha   persentajen stock out ai-moruk hamutuk 32%.

Iha fatin hanesan Diretora Ezekutiva INFPM, Paulina Mendonça hateten kona-bá stock out ai-moruk 32% ne’e tama iha kategoria normal no  bele garante to’o fulan hira ba oin.

“Agora ami halo hela ezérsisiu, aban ka bainrua, ai-moruk sira no sasan tama ona mai hodi responde ba ai-moruk agora daudaun stock out  ne’ebé akumula husi  laboratóriu item konsumavél no item espesialista sira seluk,” Paulina Mendonça haktuir.

Nia afirma katak akizasaun ai-morik ba tinan 2026 nian INFPM daudaun ne’e prepara ona atu lokekonkursu públiku iha tempu badak.

Jornalista : Zita Menezes