Hatutan.com, (14 Maiu 2026), Díli– Prokuradór Jerál Repúblika (PGR- sigla-portugés), Nelson de Carvalho, promete  husu tuir bá Prokuradór titulár ne’ebé responsavel bá kazu  fujitivu Kalumban Malia ne’ebé halai husi justisa iha Timor Osidental ka Nusa Tenggara Timur (NTT)-Indonézia mai subar iha Timor-Leste to’o hetan nasionalidade Timoroan.

Lee Mós: FONGTIL Preokupa ‘Korruptór’ Kalumban Mali, Fujitivu Husi Indonézia Hetan Protesaun iha Timor-Leste

Fujitivu Kalumban Mali ne’ebé uluk sai mós hanesan kandidatu ida ba membru DPRD NTT-Indonézia. Foto/Dok.Repro

Prokuradór Jerál Repúblika Nelson de Carvalho hateten, katak karik kazu fujitivu Kalumban Mali ne’e parte Polísia Sientífiku Ivestigasaun Kriminál (PCIC- sigla-portugés), submete ona bá Ministériu Públiku, signifika prosesu investigasaun sei la’o hela.

“Ne’ebé kazu ita haree hela prosesu ne’e, iha faze investigasaun ita haree hela. Ha’u sei husu tuir ba prokuradór titulár atu haree fali kazu ne’e,” PGR Nelson de Carvalho hateten ba jornalista sira iha Díli, Kinta (14/05/2026).

PGR afirma,  Ministériu Públiku sei haree fila-fali kazu Fujitivu Kalumban Mali ne’ebé oras ne’e sei iha hela faze investigasaun no Ministériu Públiku  kontinua akompaña no avalia dezenvolvimentu investigasaun atu asegura prosesu ne’e lao tuir lei no prosedimentu legál sira ne’ebé vigóra.

Fó hanoin fali katak, Kazu fujitivu Kalumban Mali ne’ebé deskonfia falsifika dokumentu hodi hetan nasionalidade Timor ho naran Leonardo Benigno Tilman, sai sensitivu no dilemátiku ba Polísia Sientifiku Investigasaun Krminál (PCIC, sigla portugés)  tanba ema ho podér politíku no ema balun tan  ho pozisaun boot mak proteze no fó hela kondisaun ba Kalumban Mali hodi la’o livre iha Timor-Leste.

Kalumban Mali, envolve kazu fornesimentu adubu ka pupuk ho kuantidade tonelada  575 ho valor orsamentu millaun Rp. 976.

Kalumban Mali nu’udár Diretór CV Eka Cipta Persada ne’ebé hetan detensaun dezde loron 28 fulan-Fevereiru 2014. Molok ne’e, iha fulan-Jullu tinan 2013, Kalumban Mali sai hanesan kandidatu membru lejislativu husi  Partidu  Amat Nasonal (PAN) bá DPRD-NTT.

Iha Kuarta, 05 fulan-Juñu tinan 2023,  hale’u tuku 16:00 Otl, PCIC halo kapturasaun no detensaun ba  fujitivu Kalumban Mali  iha nia rezidénsia iha Fomento, Díli.

Autoridade PCIC kaptura no detein fujitivu Kalumban Mali relasiona ho informasaun katak  dekonfia nia kaer ilegalmente dokumentu sidadania Timor nian  hodi troka nia naran ba  Leonardo Benigno Tilman husi Munisípiu Bobonaro.

Iha detensaun no kapturasaun ne’e, PCIC asegura dokumentu importante sira hosi Kalumban Mali alias Leonardo Benigno Tilman, hanesan sertidaun Nascimento ne’ebé deskonfia atribui  husi indivíduu ida iha Ministériu Justisa Timor-Leste, Billete Identidade Timor-Leste no sertidaun kazamentu husi Parókia ida ne’ebé hola parte iha Arkidioseze Metropolitana Díli.

Fujitivu Kalumban Mali nia orijen husi Lamaknen, Postu Administrativu Atambua, Provínsia Kupang, Timor Osidentál ka NTT (Nusa Tengara Timur).

Jornalista: Marcelino Tomae