Hatutan.com, (19 Setembru 2026), Díli—Julgamentu interogatóriu dahuluk ba kazu ilísitu droga ne’ebé suspita Australianu ida inisiál HMP, Sábadu-kalan (19/09/2026), la’o ho “dramátiku” no “tentativa” oioin.

Arguidu ba krime ilísitu droga ho inisiál HMP nu’udar sidadaun Australianu konversa ho nia maluk sira ne’ebé marka mós prezensa iha julgamentu  interogatóriu dahuluk iha TJPID, Sábadu (19/09/2026). Foto/Hatutan.com

Natureza julgamentu ne’ebé prezide husi Juiza Ana Paula Fonseca, la’o la hanesan ho julgmanetu interogatóriu dahuluk sira seluk ne’ebé durante ne’e la’o iha Tribunál Judisiál Primeira Instánsia Díli (TJPID).

Iha julgamentu ne’e, Juiza Ana Paula Fonseca tenke suspende  prosesu dala rua; primeiru suspende ho durasaun tempu minutu 30 hodi solisita ba Prokuradór Matias Soares ne’ebé reprezenta Ministériu Públiku atu aprezenta prova iha autos.

Iha fali suspensaun tempu ba dala-rua nian han oras rua nia laran, tanba Juiza Ana Paula Fonseca simu telefone husi Juis balun atu halo substituisaun emidiata ba Juiza Ana Paula Fonseca. Mézmu nune’e, Juiza Ana Paula Fonseca insiste hodi kontinua prezide prosesu interogatóriu dahuluk ne’e.

Fonte Hatutan.com ne’ebé akompaña besik prosesu juglamentu interogatóriu ba kazu ilísitu droga ne’ebé sidadaun Australianu ho inisiál HMP sai suspeitu ne’e, informa prosesu kapturasaun no detensaun, inklui krime ne’ebéimputa ba argiudu ho inisiál HMP ne’e la kompre prosedur legál no la iha prova sufiente atu akuza krime tráfiku ilísitu droga ba arguidu HMP hanesan sidadaun Australianu.

Ho komplikasaun ba prosesu inklui prova iha auto la sufisiente, Juiza Ana Paula Fonseca deside suspende audénsia ne’e dala rua tuituir malu.

Durante audensia interrogatóriu dahuluk ne’e, arguidu HMP ho nasionalidade Austrália ne’e deklara ba Tribunál katak, ai-moruk   ne’ebé iha, la’ós droga,  maibé nia sofre  moras komplikadu tanba ne’e presiza ai-moruk atu hemu rutina.

HMP mós  deklara  ba  Tribunál katak, laptop no komputador, ho aparellu Starlink  ne’ebé autoridade sira halo apreensaun ne’e nia uza hodi halao servisu peskiza nian.

Minitériu Públiku ne’ebé reprezenta husi Prokuradór Matias Soares akuza arguidu ho krime  trafiku droga. Maibé,  Prokuradór Matias Soares mós duvida ho karta mandadu    Buska domisiláariu  no apreensaun husi Tribunál nian ho NUC. 0053/26-PGGCC.

Advogadu privadu Olivio Barros Afonso ne’ebé fasilita asisténsia legál bá arguidu konsidera   provas ne’ebé kontempla iha autos la sufiente atu akuza arguidu ho krime tráfiku ilísitu droga.

Rona tiha parte hotu iha audensia interogatóriu dahuluk ne’e, Juiza prosesu Ana Paula Fonseca, deside liberta arguidu tanba  laiha prova sufisiente hodi akuza arguidu.

Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK), ezekuta mandadu Tribunál hodi halo buska, apreensaun no kapturasaun  ba arguidu  iha Munisípiu Aileu iha  loron 17 fulan-Setembru, foin lalais ne’e. (*)