Hatutan.com, (7 outubru 2026), Atambua — Tentara Nasionál Indonézia (TNI) ne’ebé koloka iha postu fronteira terestre Indonézia ho Timor-Leste, asegura kombustivel tonelada rua ne’ebé ema deskoñesidu tenta hatama ilegalmente mai Timor-Leste.

TNI asegura kombustivel tonelada rua ne’ebé ata hatama ilegal mai Timor-Leste. Foto/supply

Kontribuidór Hatutan.com husi Atambua-Indonézia, relata katak forsa armada Indonézia nian husi Satgas Pamtas RI-RDTL Yonarhanud 14 konsege asegura atividade kontrabandu  hanesan mina-rai ho gazóleu illegal ho kuantidade tonelada rua.

Kombustivel sira-ne’e atu hatama mai territóriu Timor-Leste liuhosi dalan ilegál (iha Suku Silawan, Postu Administrativu Tasifeto Timur, Munisípiu Belu, Provínsia Nusa Tenggara Timur (NTT).

Komandante Satgas Pamtas RI-RDTL Setór Leste, Tenente Koronel (Letkol) Arh Rudi Afrika, konfirma katak nia parte konsege asegura  asaun kontrabandu  kombustivel (gazóleu ho mina-rai) ne’ebé ho intensaun atu hatama mai Timor-Leste.

“Loos duni, evidénsia kombustivel hanesan gazóleu no mina-rai ne’e, asegura ona hodi hein aprezenta ba autoridade Polísia hodi prosesa tuir lei mak vigora,” Tenente Koronel Arh Rudi Afrika informa.

Nia hatutan sira-nia parte mós asegura sasán seluk hanesan bebida iha lata (fanta, coca-cola ho  sprite), inklui roupa uzadu (obralan).

TNI la konsega kaptura suspeitu sira ne’ebé envolve iha atividade ilísitu ne’e tanba halai lakon  no husik hela de’it mak sasán evidénsia sira-ne’e. (*)