Hatutan.com, (20 Setembru 2022), Díli—Papa Francisco iha esperansa katak, Sede Nunsiatura Apostólika foun ne’ebé foin inaugura iha Igreja Motael nia sorin, sei serbi povu no Uma-Kreda  Timor Leste (TL) ho domin.

Vise Primeiru-Ministru Vatikanu, Arsebispu Edgar Peña Parra ho Prezidente Repúblika, José Ramos-Horta inaugura Sede Nunsiatura Apostólika iha Motael, Tersa (20/09/2022).

“Iha uma foun Papa nian ne’e, reprezentante pontífisiu bele servisu hodi dezempeña nia misaun iha Timor-Leste ho di’ak hamutuk  ho Igreja lokál,” Vise Primeiru-Ministru Vatikanu,  Arsebispu Edgar Peña Parra hateten iha serimónia inaugurasaun Sede Nunsiatura Apostólika iha Motael,  Tersa (20/09/2022).

Lee Mós: Vise-PM Vatikanu Sei Inaugura Sede Santa-Sé iha Díli

Inaugurasaun ba Sede Nunsiatura Apostólika ne’e lori ema hotu-hotu ba hanoin hikas memória vizita Santu Padre João Paulo II nian mai TL iha tinan 1989.

Iha fatin hanesan, Prezidente Repúblika, José Ramos-Horta konsidera Inaugurasaun ba Sede Nunsiatura Apostólika iha Timor-Leste ne’e nu’udár istória foun iha tinan 500 nia laran.

Tinan ne’e mós Timor-Leste hetan Kardeál ida no ne’e pela primeira vez iha istória timor nian no nomeasaun ba Arsebispu Arkedioseze Metropolitana Díli nian ba Kardeál sai notísia bo’ot.

Vise Primeiru-Ministru Vatikanu, Arsebispu Edgar Peña Parra ho Prezidente Repúblika, José Ramos-Horta inaugura Sede Nunsiatura Apostólika iha Motael, Tersa (20/09/2022).

Sede nunsiatura Apostólika ne’e nia prosesu preparasaun iha tinan rua ikus to’o ohin loron hetan inaugurasaun.

“To’o agora Timor-Leste seidauk iha Nunsiu Apostóliku no monseñr Marco Sprizi hanesan enkarregadu negósiu Vatikanu nian no hein katak tempu badak sei iha núnsiu ida hanesan Embaixadór Santa Sé nian,” José Ramos-Horta hateten.

Relasaun entre Timor-Leste no Santa Sé di’ak desde uluk kedan molok restaurasaun indepedénsia no prezensa Amu Papa João Paulo II nian halo Timor-Leste ho Santa Sé iha kedan relasaun amigáveis ida di’ak.

Jornalista: Vito Salvadór