Hatutan.com, (21 Setembru 2022), Díli-Governu liuhosi Konsellu Ministru (KM) diskute ona atu redús remunerasaun kargu xefia sira ne’ebé lidera Instituisaun Públiku (I.P) ho Empreza Públiku (E.P).

Lee Mós : Lei Númeru 07/2007, Bandu Órgaun Estadu Seluk Nia Saláriu Boot Liu Prezidente Repúblika

Ministru Prezidénsia Konsellu Ministru (MPKM), Fidelis Manuel Leite Magalhães. Foto/Elio dos Santos da Costa

Ministru Prezidensia Konsellu Ministru (MPKM), Fidelis Manuel Leita Magalhães, hateten vontade no kompromísiu sira Governu nian ne’ebé atu halo redusaun bá montante remunerasaun sira ne’e sei deside liuhosi reuniaun Konsellu Ministru, tanba mosu preukupasaun maka’as hosi públiku nian no ezíje mós katak, presija duni halo redusaun.

“Sé ita laiha mudansa ruma, ita atu halo proposta ne’e halo saida. Propósta sira ne’e atu fiksa didi’aik rekézitu sira, no atu halo para iha level ida ne’ebé, referénsia nivel ne’e klaru, para ita organiza klaru. Tanba ida ne’e maka, posivilmente iha implikasoins balu ne’ebé maka hanesan oras ne’e kaer kna’ar sira, ita iha mudansa balu, mudansa bá leten, balu mudansa mai kraik. Ne’e mak ita halo diskusaun hela,” Ministru Prezidensia Konsellu Ministru (MPKM), Fidelis Manuel Leita Magalhães, hatán hodi responde  Hatutan.com. hafoin reuniaun ordináriu Konsellu Ministru nian iha Palásiu Governu, Díli, Kuarta (21/09/2022).

Portavós Governu ne’e dehan, hahú agora ba oin, governu tenke haree ona iha kesatun sira kona-bá sustentábilidade finanseira ka fiskál nian, tenke diskute no asegura halo di’ak orsamentu sira Estadu nian.

“Ne’ebé parte politika institusionál nian, ita mós tenke kontinua nafatin rona opiniaun sira hosi ministériu sira ne’ebé mak implementa, hanesan na’in ka tutela bá ajénsia sira ka ne’ebé mak hanesan orgaun sira administrasaun indireta Estadu nian,” Ministru Fidelis Magalhães haktuir.

Hatán kona-bá, karik montante remunerasaun ne’ebé atribui ba kargu xefia sira iha I.P ho E.P refleta duni bá tabela salárial sira hatuur iha Lei, Ministru Fidelis, dehan, buat ka asuntu ne’ebé mak Estadu atu deside ne’e, tenke tuir duni regra sira Estadu nian ne’ebé mak halo ona. Maibé, diskusaun sira kona-bá asuntu ne’e parte Governu sei kontinua nafatin bá oin.

Lee Mós : Remunerasaun Kargu Xefia I.P ho E.P Baze bá Dekretu-Lei Hosi Governu

“Ohin iha diskusaun, Konsellu Ministru halo diskusaun ne’ebé naruk, maibé tékniku nian, sira tenke halo ona ajustamentu sira, verifikasaun legál ho téknika sira atu bele iha desizaun ida ne’ebé maka di’ak. Desizaun ne’ebé maka di’ak, haree bá parte ida mak parte poupansa nian, parte ida seluk maka, atu evita ema halai hosi kargu sira ne’ebé maka sira okupa, tanba sei iha implikasaun bá ema nian saláriu sira ka rendimentu sira,” Fidelis Manuel Leita Magalhães, hateten.

Fidelis dehan, desizaun sira ne’ebé mak parte Governu liuhosi Konsellu Ministru sei halo maka, koko atu halo ‘regra ka lei’ ida ne’ebé mak justu bá ema hotu-hotu.

“Ita tenke sura hotu preukupasaun sira hotu, halo diskusaun ho klean, no hakarak mós atu iha mekanizmu ida ne’ebé maka di’ak,  para ita bele define fiksa ema nian nivel remunerasaun ne’e, ho forma ne’ebé maka loloos, klaru, ho regra ne’ebé mak klaru, regra ne’ebé maka justu bá ema hotu, la’os ita halo hanesan halo pur halo de’it, depois laiha efeitu ne’ebé di’ak bá aplikasaun,” nia tenik.

Portavós Governu ne’e kompromete katak, Governu sei diskute nafatin asuntu ne’e, no parte tékniku sira hosi Prezidénsia Konsellu Ministrus nian kontinua halo diskusaun ho Ministériu relevante sira, hodi diskute kona-bá asuntu montante remunerasaun bá kargu xefia sira iha Instituisaun Públiku ho Empréza Públika sira.

“Tanba asuntu hirak ne’e, la’os asuntu ki’ik ka lae, ne’e tanba iha iha EP barak, ita iha IP barak, ita iha administrasaun indireta sira Estadu nian lubun boot ida. Ne’ebé kuandu ita halo desizaun liu-liu ida ne’e, ita presija iha tán konsertasaun. Mezmu  iha diskusaun ona, diskusaun la’o ho di’ak, ne’ebé, presija atu aprofunda liután, para nune’e, iha tempu badak, bele iha desizaun finál ba ida-ne’e,” Ministru Fidelis Manuel Leita Magalhães esplika tenik.

Jornalista: Rogério Pereira Cárceres