Hatutan.com, (09 Outubru 2021), Díli-Lider Karizmátiku no Komandante Ein-Xefe FALINTIL, Kay Rala Xanana Gusmão, Sábadu (09/10/2021), inaugura Monumentu 4 Setembru 1999  iha Aldeia Au-hun, Suku Becora, Postu Administrativu Cristo Rei, Munisípiu Díli.

Plaka Monumentu Au-hun, Becora, Díli, ne’ebé asina hosi Kay Rala Xanana Gusmão. Foto/Hatutan.com

Inaugurasaun monumentu ne’e hetan bensaun hosi Padre Domingos Soares ‘Maubere’ no asiste mós hosi  família martires sira-nian ho komunidade Au-hun.

Monumentu ne’ebé konstrui hosi Kay Rala Xanana Gusmão ne’e hodi fó onra   ba asua’in na’in sia (9) ne’ebé mate  iha loron 4 fulan-Setembru 1999 tanba defende prinsípiu  “mate ka moris, ukun rasik an”.

Iha loron 20 Agostu 2021, bainhira Xanana lidera komemorasaun aniversáriu FALINTIL ba dala- 46, iha Au-hun, Xanana rasik promete konstroi monumentu ba martires na’in sia (9) ne’e. Komunidade Au-hun entuziazmu no agradese ba Kay Rala Xanana Gusmão kontínua serve povu ida-ne’e.

Asua’in hirak ne’ebé tropa Indonézia sira hamutuk ho milísia pro-Indonézia  sira oho iha masakre ne’e maka hanesan, Saudozu Andre de Araújo,  Saudozu Carlos Martins Oliveira, Saudozu Cristovão da Costa Silva “Tokadór”, Saudozu Domingos Martins da Silva, Saudozu Filipe dos Santos, Saudozu Joaquim da Costa, Saudozu Lay Oi Tsung “Asan”, Saudozu Luciano Siquera “L. Sakunar” ho Saudozu Mercelo Augusto.   

Kay Rala Xanana Gusmão iha nia mensajen inaugurasaun monumentu ne’e hateten,  monumentu sira ne’ebé harii ba eroi no asua’in sira-ne’e atu fó lembra ba Timoroan sira no jerasaun foun sira, kona-ba sakrifisiu hotu iha prosesu luta to’o ukun rasik an.

Xanana hateten, monumentu sira-ne’e hanesan mós fatin ida fó onra ba eroi  sira no ba ita hotu ne’ebé moris bele mi tau ai-funan no sunu-lilin iha monumentu sira-ne’e hodi hanoin hikas sira no fó onra ba sira.    

“Istória ita-nia luta nian, istória sira-ne’e, sei rai hela iha ita-nia suku, ita-nia aldeia. Tinan 22 liu ona sira-nia ruin iha hela kraik, sira-nia ruin foin ba hasai, sira kontente tanba ita presta omenajen ba sira, ita la’ós haluha sira, maibé ita sai hosi triste nia laran, ita fó rekoñesimentu ba sira,” Xanana hateten.

 Xanana mós hamutuk ho komunidade harii monumentu balun iha Oé-Cusse nu’udar símbolu fó omenajen nafatin ba eroi sira-nia sakrifísiu no respeita nafatin sira mézmu sira la hamutuk ona iha tempu ukun rasik an ne’e. (bit)