Hatutan.com, (12 Dezembru 2022), Díli—Ministru Petroleum no Mineral (MPM), Victor da Conceição Soares rekoñese involvimentu líder nasionál Kay Rala Xanana Gusmão iha prosesu dezenvolvimentu Greater Sunrise to’o ohin loron no ba futuru.

Ministru Petroleum no Mineral (MPM), Victor da Conceição Soares.

Victor da Conceição Soares esplika katak, planu mestre ba dezenvolvimentu kampu Greater Sunrise mai duni hosi lideransa Kay Rala Xanana Gusmão, tanba ne’e iha servisu sira nível tékniku nian sempre konsulta nafatin ho Xanana no mós ho líder hotu-hotu atu iha solusaun ida di’ak ba dezenvolvimentu greater sunrise ne’ebé sei lori benéfísiu ba Povu no Estadu Timor-Leste.

Lee Mós: Fake News: Governu ‘Hasai’  Xanana Gusmão iha Prosesu Dezenvilvimentu Greater Sunrise

“Ema hotu hatene no jornalista sira mós hatene katak maun boot Xanana Gusmão uluk 2020 depois de governu halo tomada de posse no halo desizaun re-estruturasaun depois nia rasik rejigna-an. Maski nia rejigna an maibé buat hotu-hotu ne’ebé  atu halo ne’e desididu tiha ona ona. Nia duni mak halo tiha tratadu sira ne’e hotu, lei no regra sira ne’e hotu no agora ne’e dadaun governu ida-ne’e servisu tuir saida mak maun boot sira nia produtu ne’ebé halo no tenke halo tuir ida ne’e la inventa ida. Tanba ida ne’e há’u hanoin governu ida ne’e halo buat ne’ebé uluk maun boot sira halo, deside para nia objetivu atu fó benefisiu ba ita nia povu, ita nia Estadu ne’e duni la sees hosi ne’e,” Victor da Conceição Soares hateten iha edifísiu Ministériu Petroleum no Mineral, Mandarin, Segunda (12/12/2022).

Kona-bá dezenvolvimentu Greater Sunrise, Governante ne’e hatutan, bainhira tékniku sira iha nesesidade, sira mak ba mai halo konsulta ho partidu polítiku sira, plataformula, deputadu sira no líder nasionál hotu inklui maun boot Xanana Gusmão.

Tékniku sira halo konsulta ho parte hotu-hotu no ida ne’e iha tékniku sira nia liman no hanesan governu atu asegura enquadramentu legál ne’ebé tratadu bilaterál entre governu Austrália ho Timor Leste halo no ida-ne’e mak governu halo atu asegura.

Atualizasaun Ikus Greater Sunrise

Diskusaun bilaterál entre Timor Leste ho Austrália ba enkuadramentu legais no fiskais iha progresu signifikativu no agora iha hela diskusaun trilaterál ne’ebe involve mós Sunrise Joint Venture (SJV) atu hetan sira nian opiniaun konsolidadu.

“Esbosu enkuadramentu legais maka Petroleum Mining Code (PMC), Production Sharing, Contract (PSsc) no Discussion Paper ba asuntus estrategia balun (Decommissioning, Local Content),” Ministru Petroleum no Mineral, Victor da Conceição Soares hateten.

Esbosu ba enkuadramentu fiscais (Fiscal Regime) Estadu rua desidi no konkorda hodi opta ba 100% Timor Leste nian, Regime Fiskal-Lei Impostu (Lei Tributaria) no Dokumentus kompeténsia juridiksionál mak sei iha diskusaun interna TL.

Jornalista: Vito Salvadór