Hatutan.com, (09 Fevereiru 2023), Díli- Ministériu Solidariedade Sosiál no Inkluzaun (MSSI) iha tempu badak sei halo pagamentu fila-fali subsídiu “fim do ano” ho montante $200 bá reklamante sira 8812.

Lee Mós : CAC Seidauk Hetan Infrasaun iha Pagamentu Subsídiu $200

Vise Ministra Solidariedade Sosiál no Inkluzaun (MSSI), Signi Verdial. Foto/Elio dos Santos da Costa

Totál reklamante hirak ne’e mai hosi família ka uma-kain sira ne’ebé mak antes ne’e halo reklamasaun, tanba seidauk ka la konsege hetan direitu hosi Governu, no tuir lei sira tenke submete karta reklamasaun bá ministériu kompetente hodi reklama no kontesta kona-bá sira-ninia direitu bá subsídiu ne’e.

“Ita tama ona bá faze halo pagamentu bá reklamasaun sira, purvolta 8812 reklamante sira mak ita sei selu iha tempu badak. Reklamasaun hamutuk 8812, purlvolta  millaun $1.8. Ida ne’e mak ita prevee, Konsellu Ministru aprova ona, tempu badak, benefisiáriu sira ne’e sei hetan sira nia direitu,” Vise Ministra Solidariedade Sosiál no Inkluzaun (MSSI), Signi Verdial hateten durante enkontru trimestrál ho liña ministériu sira iha Salaun MSSI, Caicoli, Díli, Kinta (09/02/2023).

Advertisement

Signi Verdial informa, enkontru trimestrál ida ne’e organiza hosi gabinete Vise Primeira Ministra (VPM) liga liubá área sira asuntu sosiál nian, ne’ebé mak tutela iha vise primeiru ministra, inklui MSSI, Ministériu Edukasaun Juventude no Desportu (MEDJ), Ministériu Ensinu Superiór Siénsia no Kultura (MESK) ho Ministériu Saúde (MS).

Iha sorumutuk ne’e, kada liña ministériu, relata ninia rezultadu iha trimestre ikus nian, hosi fulan-Outubru to’o Dezembru. Ohin, tékniku sira halo aprezentasaun kona-bá rezultadu no mós sira-ninia obstákulu saida, no rekomendasaun saida maka fó bá oin, atu mellora sira-ninia serbisu di’ak liután.

MSSI enfrenta mós dezafiu iha alokasaun Orsamentu Jerál Estadu (OJE) 2022, inisiál ne’e ho millaun $25. To’o iha tinan klaran, sira-nia osan ne’e, aumenta bá millaun $92. Entaun, osan ne’e sa’e, purvolta millaun $67.

“Ho rekursu ida ne’ebé mak ita iha, rekursu nafatin, orsamentu ida sa’e purvolta de empat-kali-lipat, entaun, ita-boot sira mak imajina, iha difikuldade iha implementasaun. Maibé, ita jere ho di’ak, rezultadu sira ita atinje subsídiu Uma-kain, ita atinje ho di’ak,” Vise MSSI, Signi Verdial informa. 

Alende ne’e, iha mós rezultadu sira seluk hosi institutu tutela sira, ne’ebé mak ohin nia relata katak, sira foku bá Institutu Nasionál Seguransa Sosiál (INSS) nian importante ida maka, oinsá halo investimentu bá fundu rezerva Seguransa Sosiál, no mós mellora sira-nia sistema informátika, jestaun finanseiru nian.

Advertisement

Hirak ne’e hotu hanesan sasán importante iha INSS, no mós iha institutu sira seluk, hanesan HIV-SIDA, ne’ebé foka hela bá oinsá hadi’a sira nia planu estratéjiku institutu nian, no iha biban hanesan, kontinua halo sosializasaun kona-bá kombate moras HIV-SIDA.

Kona-bá Institutu Nasionál dos Direitos das Cianças (INDC) sira realiza ona mós semináriu boot ida, hodi análize situasaun labarik sira iha TL, no mós sira fó input balu, kona-bá oinsá lei protesaun labarik nian ne’ebé mak parlamentu oras ne’e diskute hela iha semana kotuk.

Iha CNR kontinua presta atendimentu bá ita-nia maluk defisiénsia fízika sira, no mós fó ekipamentu sira ne’ebé mak bá iha maluk defisiénsia sira ne’e. Ida ne’e maka sasán importante iha trimester ikus nian.

Oras ne’e  MSSI serbisu hela ho Ministériu Justisa (MJ), Ministériu Administrasaun Estatál (MAE), atu iha tempu badak, ministériu tolu ne’e sei asina akordu interministeriál atu bele atribui billete identidade bá benefisiáriu sira ne’ebé mak hetan benefísiu hosi Prestasaun Sosiál sira ne’e.

Jornalista: Rogério Pereira Cárceres

Advertisement