Hatutan.com, (14 Fevereiru 2023), Díli—Durante fulan fevereiru 2023 Polisia Nasionál Timor-Leste (PNTL) rejista tipu kazu tuda-malu mak domina liu iha iha territóriu nasionál.

Dadus ne’e relata hosi Portavós Komandu Jerál PNTL, Superintendente Xefe Polísia Arnaldo de Araújo, liu hosi konferénsia imprénsa, Tersa (14/02/2023).

Lee Mós: Kazu Omesídiu Elemloi, PNTL Bolu no Halo Ona Identifikasaun bá Sidadaun 23

Totál kazu ne’ebé akontese iha fevereiru hamutuk 108. Hosi númeru ne’e kazu asidente hamutuk 79, no insidente 29. Hosi kazu hirak ne’e tipu kazu konfrontu ka asalta no tuda-malu mak domina liu.

“Kazus aas liu iha fulan ida ne’e nia laran maka ema tuda-malu, tuir fali Ofensas Integridade Simples, ikus liu maka kazu Violénsia Doméstika,” Superintendente Xefe Polísia, Arnaldo de Araújo hateten.

Orientasaun bá OPS

Komandu PNTL mós fó ona orientasaun bá membru sira iha Komandu munisípiu no eskuadra sira, liu-liu Ofisiál Polísia Suku (OPS) atu halo aprosimasaun ho lider lokál sira hanesan Xefe Suku, Aldeia no Juventude hodi ko’alia ho joven sira katak, para ona ho asaun krime ne’ebé kontra lei seguransa nasionál.

Durante ne’e, komandu PNTL sempre ho ninia meiu no estratejia rasik liuhosi atividade passa revista, inklui hala’o patrullamentu rutina bá iha fatin hotu-hotu, liu-liu iha área sira ne’ebé deskonfia katak, iha problema.

Jornalista: Rogério Pereira Cárceres