Hatutan.com, (21 Fevereiru 2023), Díli- Prezidente Repúblika (PR), José Ramos-Horta, husu atu Ministériu Defeza (MD) kontinua tau matan bá sustentabilidade FALINTIL-Forsa Defeza Timor-Leste (F-FDTL) liga ho disiplina no bem estar.

Lee Mós : Membru F-FDTL Tenke Dezempeña Funsaun Ho Profisionál no Tuir Lei

FALINTIL-Forsa Defeza Timor-Leste (F-FDTL). Foto/Elio dos Santos da Costa

Ministru Defeza, Filomeno da Paixão de Jesus, hateten durante soru-mutu ho Xefe Estadu hodi aprezenta kona-bá dokumentu estratéjiku dezenvolvimentu no dokumentu estrutura Forsa Armada, Xefe Estadu husu atu oinsá mak haree liu kona-bá integridade dezenvolvimentu instituisaun Defeza iha Timor-Leste atu garante servisu defeza nasionál bá asegura soberania  Timor-Leste.

“Prezidente Repúblika fó diretiva no fó orientasaun oinsá iha planeamentu F-FDTL nian  bá oin liu-liu haree bá sustentabilidade no kuidadu bá manutensaun no haree bá disiplina Forsa nia no haree bá Forsa sira nia bem estar ida ne’e mak prezidente bolu atensaun,” Ministru Defeza Filomeno da Paixão de Jesus, bá jornalista sira iha Palásiu Prezidensiál, Tersa (21/02/2023).

Aproveita oportunidade ne’e Ministru Filomeno da Paixão de Jesus, informa mós ba Xefe Estadu kona-bá dezenvolvimentu ne’ebé halo durante ne’e halo iha Ministériu Defeza no F-FDTL durante tinan 2018 t’oo agora iha Governasaun oitavu ne’e.

Nia subliña durante kaer pasta hanesan Ministériu Defeza dezde mandatu too ohin loron kontinua halo servisu sira ne’ebé iha hodi halo planeamentu no hasai diretiva foun bá halo planeamentu estratéjiku Militár F-FDTL hodi define misaun halo estudu bá sistema forsa.

“Ha’u informa de’it ba imi, ohin Prezidente bolu ha’u espesialmente hodi relata informasaun sira kona-bá dokumentu estratéjiku dezenvolvimentu no dokumentu estrutura forsa armada,  no dokumentu sira ne’e ha’u sempre hateten fila-fila bá imi kona-bá oinsá mak atu haree bá dezenvolvimentu forsa armada no buat seluk ne’ebé iha ligasaun ho planu estratéjiku ministériu nian atu lori instituisaun Defeza bá oin,” Nia afirma.

Brigadeiru Jenerál Reformadu ne’e informa mós katak kona-bá rekrutamentu espesiál bá membru foun F-FDTL iha dunik ho númeru kuaze na’in-80 atu bele okupa pozisaun ofisiál, no ne’e la’ós rekruta bá soldadu ka kabu ka sarjentu, maibé ba ofisiál para okupa espesialidade téknika ne’ebé iha F-FDTL nia laran.

Jornalista: Vito Salvadór