Hatutan.com, (25 Fevereiru 2023), Díli-Prezidente Partidu Libertasaun Populár (PLP), Taur Matan Ruak, reafirma katak, plataforma entnedimentu partidu Frente Revolusionáriu Timor-Leste Independente (FRETILIN), PLP ho partidu Kmanek Haburas Unidade Nasionál Timor Oan (KHUNTO) tenke hamutuk nafatin, hodi nune’e, kontinua forma IX Governu hafoin eleisaun parlamentár 2023.

Lee Mós : FRETILIN Tenke Hateke Bá Oin ho Objetividade

Sekretáriu Jerál FRETILIN, Mari Alkatiri dere-gong hodi halo abertura bá konferénsia nasionál PLP iha Salaun OKA, Osindo, Díli, Sabadu (25/02/2023). Foto/Mídia FRETILIN

Taur Matan Ruak atuál Primeiru-Ministru VIII Governu Konstitusionál afirma lia hirak ne’e iha nia intervensaun  konferénsia nasionál PLP nian ne’ebé hala’o iha Salaun OKA, Osindo, Díli, Sábadu, 25 fulan-Fevereiru 2023

Konferénsia nasionál PLP  ho tema “Hamutuk Ita Refleta Passadu, Afirma Ita-nia Konsolidasaun no Serbisu Maka’as bá Povu Nia Moris Di’ak” ne’e partisipa direta hosi Sekretáriu Jerál partidu FRETILIN, Mari Bin Amude Alkatiri, reprezentante sira hosi partidu KHUNTO, Partidu Demokrátiku  ho Frenti-Mudansa. 

Taur Matan Ruak, lori lideransa nasionál, munisípiu sira, konferensista sira, fó saudasaun espesial bá nia bainaka sira.

“Ita iha señor sekretáriu jerál partidu FRETILIN nian, ne’ebé ita-boot sira rasik, ohin rona ninia mensajen. Mensajen ida fó esperansa bá ita-boot sira, mais mensajen ida mós hatudu bá ita boot sira katak, ita-boot sira iha responsábilidade boot. Esperansa, tanba saida? Esperansa tanba, fó garantia bá PLP, katak plataforma entendimentu ida-ne’e, la to’o iha ne’e de’it, nia sei bá oin no ne’e kondisaun ida ita-nia nasaun presiza,” Taur Matan Ruak, hateten.

Taur dehan, sé haree kedan hosi tinan 2002, Povu Timor-Leste  restaura nia independénsia mai to’o ohin ne’e, fatór ida dezestabilizadór iha bá nasaun, maka fatór politiku. Estabilidade Governativa laiha, estabilidade politika laiha.

“Partidu boot ida kuandu reafirma no afirma katak, nia prontu para mantein plataforma ida-ne’e, signifika katak, IX Governu, ita mak sei harii, plataforma ida-ne’e, PLP, FRETILIN ho KHUNTO  mak harii, laiha seluk ida. Tanba ne’e, ha’u konkorda ita-nia na’i sekretáriu jerál FRETILIN nia hanoin, katak, ita tenke loke aan,” Taur Matan Ruak hateten.

Partidu Libertasaun Populár tenke nakloke, no tenke haku’ak ema hotu. PLP iha ezemplu ida, mak nia maun-alin sira iha Partidu Demokrátiku (PD). Sira la halo parte plataforma, mas sira nunka nega sira nia votus, bá VIII Governu nia programa no  planu sira.

“Ita halo pergunta, saida mak sira hatudu tán, para ita konfia sira. Sé sira la partisipa iha Governasaun, sira fó sira-nia votu, ne’e signifika, ha’u hanoin, ne’e ita-nia istória Timor, oitoan mak hanesan ne’e karik. Tanba ne’e, ita tenke loke aan,” Matan Ruak subliña.

Prezidente PLP ne’e, agradese mós bá reprezentante sira hosi partidu Frenti-Mudança nian. Obrigadu bá sira, no husu atu transmite bá lideransa sira hotu. Taur dehan, hanesan Primeiru -inistru (PM) iha VIII Governu ne’e, nia rasik Frenti-Mudança nia solidariedade, tanba iha momentu ne’ebé sira seluk halo nia hakneak, sira ajuda foti.

“Ne’e la haluha, rai iha ne’e. No ha’u hakarak uza, abuza oitoan, liafuan maun (Mari) nian. Ita tenke hamutuk. Agora, tanba saida mak ita hamutuk? Ita haree ita-nia rai, ita mai hosi ne’ebé, ita atu bá ne’ebé,” Taur hateten.

Taur dehan, Timor nia ukun-aan, ema la fó iha bandeiza. Ema sira ohin loron sei moris no tuur iha ne’e, no sira ne’ebé laiha ne’e, ninia família sira hotu, rahun, mate, bá rai ida ne’e ukun-an.

Jenerál Reformadu ne’e konta, uluk, malae ida koalia bá nia, kona-bá demokraisa, kona-bá direitus umanus. Maibé, nia hatán bá malae ne’e katak, labele hanorin nia kona-bá direitus umanus no demokrásia.

“Tanba saida? Kuandu ha’u defende demokrásia no direitus umanus, ita-boot, no ita-boot nia rain, ajuda ditadór sira. Demokrásia direitus umanus, demokrásia timor nia, ita konkista rasik,” Taur hateten.

Iha okaziaun ne’e, TMR hato’o nia saudasaun bá konferensista sira, tanba nia hatene katak, foin lalais, iha konferensia munisípiu sira, iha lider balu sai, balu tama, balu foun. Agradese bá sira ne’ebé remata tiha sira nian mandatu, lori sira mak fó PLP kadeira ualu (8) no fó oportunidade bá PLP hodi partisipa iha plataforma ida ne’ebé dadaun ne’e lidera hosi Sekjer FRETILIN, Mari Alkatiri.

Taur mós hato’o nia agredisimentu boot bá prezidente interinu PLP nian, tanba durante ninia aujénsia bele lidera sira-nia partidu ho aguenta to’o agora, no sira hotu hamutuk atu bá fali oin.

Koligasaun Hafoin ElPar 

Sekretáriu jerál FRETILIN, Mari Alkatiri dehan, plataforma intendementu PLP, KHUNTO, FRETILIN ne’ebé asegura estabilidade VIII Governu Konstitusionál sei kontinua hamutuk depois eleisaun Parlamentar ne’ebé sei realiza iha loron 21 fulan-Maiu 2023.

Bainhira partisipa iha abertura koferensia nasional PLP  nian, Sekretáriu Jerál FRETILIN, Mari Alkatiri afirma plataforma entendimentu PLP, FRETILIN no KHUNTO sei kontinua, sei kontinua agora no depois eleisoens.

Maske sai alvu no tentativa oioin atu sobu, Alkatiri hateten, plataforma entedementu ne’ebé agora lidera VIII Governu Konstitusionál sei la nakdoko.

“Hosi parte FRETILIN nian, ami bele garante katak plataforma ida-ne’e sei la nakdoko,” Mari Alkatiri afirma tán.

Alkatiri dehan, plataforma entendementu sei la taka an, plataforma intedementu PLP, KHUNTO ho FRETILIN) sai bazé bá harii inkluzaun oioin, depois eleisaun parlamentár 2023.

“Ha’u fiar katak kompaiñeru Taur Matan Ruak aseita ida-ne’e, ita tenki hakuak ema hotu,” Mari  Alkatiri afirma.

Jornalista: Rogério Pereira Cárceres