Hatutan.com, (27 Fevereiru 2023), Dili-Atu hili komisáriu foun bá Komisaun Anti Korrupsaun (CAC, sigla portugés)  presiza konsensu bankada parlamentár sira. Ho nune’e, Prezidente Parlamentu Nasionál (PPN), Aniceto Longuinhos Guterres, husu bá bankada Parlamentár FRETILIN atu iha entendimentu ho bankada opozisaun sira hanesan CNRT, PD, PUDD, UDT no Frenti-Mudança (FM).

Lee Mós : Governu Propoin José Ximenes Lidera CAC

Bankada Sira iha Parlamentu Nasionál. Foto/Dok.Hatutan.com

Komisáriu CAC atuál, Sergio Hornai, eleitu iha 2019, no hetan tomada-de-posse iha loron 21 fulan-Janeiru 2019, bá mandatu tinan-haat (4), no termina nia mandatu iha loron 21 fulan-Janeiru 2023.

Ho mandatu ne’ebé konklui ona ne’e, Kuarta 25 fulan-Janeiru 2023), Governu liuhosi sorumutuk iha Konsellu Ministru, aprova tiha ona projetu proposta rezolusaun Governu nian  hodi propoin eis Prokuradór Jerál Repúblika (PGR-sigla portugés), José Ximenes bá Komisáriu CAC.

Projetu proposta rezolusaun  ida-ne’e aprezenta hosi Primeiru Ministru (PM), Taur Matan Ruak, bá dezignasaun hosi Komisáriu CAC, bá mandatu tinan-haat, tuir rejime eskluzividade no foin lalais, Governu aprezenta ona bá PN hodi bele halo votasaun bá kandidatu ne’ebé Governu rasik propoin tiha ona.

To’o oras ne’e Parlamentu Nasionál seidauk realiza eleisaun  tanba la prienxe kuorum, tanba bankada opozisaun sira maioria mak la partisipa ka abandona plenária.

“Nu’udár prezidente parlamentu, ha’u iha obrigasaun tomak para atu fó biban bá bankada parlamentár sira komunika bá malu, no entendimentu ruma, atu prosesu ne’e labele paradu, no bele kontinua. Sé la konsege ona mak, oras ida ita haree forma seluk, para labele prejudika órgaun estadu,” PPN Aniceto Longuinhos Guterres hateten iha Parlamentu Nasionál, segunda (27/02/2023).

Rekizitu atu hala’o eleisaun bá kandidatu komisáriu Komisaun Anti Korrupsaun (CAC), nesesita deputadu mínimu 49 no másimu 50. Mais iha sala plenária, deputadu sira la prienxe 49, tanba presiza deputadu 49 mak foin halo eleisaun bá kandidatu komisáriu foun CAC nian.

Hatán kona-bá Deputadu sira CNRT nian sempre auzénsia iha eleisaun bá kandidatu foun ne’e, tanba deskonfia José Ximenes ne’ebé Governu propoin, ‘envolve ona mós iha kazu balu nian’,  maibé PPN Aniceto Guterres husu atu kontinua respeita prezunsaun inosénsia.

“Buat sira ne’e hotu, agora, sira rasik maka halo akuzasaun falsa, só de’it tanba la gosta. Akuzasaun, ha’u dehan falsu, tanba nia dalan la’ós hanesan ne’e. La’ós tanba nia atu sai komisáriu ona, depois ita kestiona ona. Mais antes ne’e la kestiona, laiha asaun ida,”  Aniceto Guterres hateten.

Jornalista: Rogério Pereira Cárceres