Hatutan.com, (01 Marsu 2023), Díli—Klubu Primeira divizaun Emanuel FC, rekolla pontu tolu dahuluk iha Liga Timorense époka 2022-2023 hafoin halakon adversáriu Karketu Díli FC ho skore 1-0.

Klubu Primeira divizaun Emanuel FC, rekolla pontu tolu dahuluk iha Liga Timorense époka 2022-2023 hafoin halakon adversáriu Karketu Díli FC ho skore 1-0. Foto/LFTL.

Jogu kontinuasaun Liga Timorense époka 2022-2023 entre Karketu Díli FC ho Emanuel FC, harame tebes estádiu munisipál Díli tanba klubu rua iha ambisaun hakarak rekolla vitória hafoin iha primeiru jogu derrota ho adversáriu sira.

Lee Mós: Assalam FC Rekolla Pontu Tolu Dahuluk Iha Liga Timorense époka 2022-2023

Tama ba minutu dahuluk jogu, ekipa Emanuel FC hahú halo jogu hosi ain ba ain ho pasazen bola badak atu bele buka oportunidade domina bola no posibilidade halo golu, maibé ekipa adversáriu Karketu Díli FC mós halo esforsu hodi halo kontra atake liu hosi Jogadór estrela Paulo Gally Freitas (21) ne’ebé joga iha liña avansadu.

Ekipa rua mantein ho tátika jogu ne’ebé ida-idak iha no Emanuel FC domina liu bola kompara ho Karketu Díli FC.

Emanuel FC ne’ebé maioria reforsa hosi Jogadór selesaun nasionál iha ekipa sub-19 halo jogu ida rápidu no sempre fó ameasa ba Karketu Díli FC liu hosi kontra atake ne’ebé lais.

Jogadór avansadu Emanuel FC Sandro Quintão (14) no Edit Sávio (10) sempre halo barullu iha liña defeza Karketu Díli FC.

Emanuel FC hetan oportunidade osan me’an ida liu hosi penalidade hafoin jogadór defeza Karketu Díli FC halo falta hasoru avansadu Edit Sávio (10) iha área gradeál laran maibé Jogadór Emanuel FC Zinedine Lopes (6) falla ezekuta penalidade ne’e ba golu tanba baliza Karketu Díli FC Georgino da Silva (31) antesipa ho di’ak no salva nia rede hosi bola. Hosi ne’e ekipa Emanuel FC kontinua halo jogu no atake barak ba Karketu Díli FC.

Tama ba minutu 35, defeza Karketu Díli FC Zacarias Cabral (32) obrigadu tenke simu kartaun kinur hafoin halo falta hasoru Jogadór Emanuel FC ne’ebé tenta halo kontra atake.

Ekipa Karketu Díli FC mós iha oportunidade lubuk ida liu hosi kontra atake ne’ebé iha liu hosi kombinasaun entre jogadór Gelvanio Alberto (10) ne’ebé servisu hamutuk ho Paulo Gally Freitas (21) maibé baliza adversáriu sei bele antesipa ho di’ak.

Tama ba minutu 42, Karketu Díli FC tenke hasai nia Jogadór Zacarias Cabral (32) tanba sofre aleiza no hatama José Silva (24) no jogu primeira parte termina ekipa rua laiha ida mak lidera uluk tanba rezultadu sei mantein ho 0-0.

Tama ba segunda parte, ekipa rua mantein ho ritmu jogu ne’ebé iha no hosi observasaun Hatutan.com haree katak, Karketu Díli FC falla iha liña klaran tanba maioria Jogadór meiu kampu ne’ebé Karketu Díli FC iha, la konsege halo jogu nune’e avansadu sira difísil hetan bola no halo kontra atake ba adversáriu.

Emanuel FC mantein ho ritmu ne’ebé iha, maibé hasa’e intensidade jogu no halo presaun ba defeza adversáriu liu hosi kombinasaun entre Jogadór sira iha meiu kampu no avansadu.

Emanuel FC halo substituisaun ba nia Jogadór iha minutu 51 hodi hasai Zinedine Lopes (6) no hatama Jonatas Pereira (7).

Defeza Karketu Díli FC Pedro Vicente (4) simu kartaun kinur iha minutu 55 hafoin halo falta hasoru Jogadór Emanuel FC.

Ekipa Karketu Díli FC kontinua halo presaun ba adversáriu liu hosi Jogadór José Silva (24) ne’ebé halo overlap hosi parte direita no servisu hamutuk ho Paulo Gally Freitas (21) maibé defeza Emanuel FC mantein disiplina no halo antesipasaun ho diak.

Jogadór Emanuel FC Alexandre Moreira (9) simu kartaun kinur iha minutu 61 hafoin halo falta hasoru Jogadór Karketu Díli FC Paulo Gally Freitas (10) no Karketu Díli FC hetan oportunidade liu hosi bola falta maibé Jogadór Mauricio Gonzales (11) falla ezekuta oportunidade ne’e.

Ekipa Karketu Díli FC kontinua halo esforsu no Jogadór Paulo Gally Freitas kontinua halo presaun ba Jogadór Emanuel FC liu hosi nia jogu indivídu ne’ebé kapas maibé ekipa adversáriu sempre halo antesipasaun ho diak. Karketu Díli FC kontinua halo substituisaun hodi hasai Natanael Reis (8) no hatama António Provirio (23) iha minutu 64.

Tama ba minutu 67, Jogadór Emanuel FC Alexandre Moreira (9) obrigadu simu kartaun mean hafoin halo falta hasoru avansadu Karketu Díli FC Paulo Gally Freitas (10) ne’ebé halo atake liu hosi nia asaun individu ne’ebé iha.

Joga ho Jogadór 10 lahamate motovasaun no espiritu ne’ebé Emanuel FC iha, ekipa Emanuel FC kontinua halo atake liu hosi avansadu Sandro Quintão (14) no Edit Savio (10) no ikus mai Jogadór avansadu Edit Savio (10) konsege farka golu ida liu hosi kontra atake lais ne’ebé iha hodi muda skor ba 1-0 iha minutu 73.

Hafoin golu ne’e ekipa Emanuel FC iha liutan motivasaun atu mantein disiplina no hatudu jogu hodi defende vitóri ne’ebé iha. Tama ba minutu 75 Emanuel FC halo substituisaun ba nia Jogadór Edit Savio (10) no hatama Carlos Soares (23) hodi hametin lina klaran atu bele asegura pontus ne’ebé iha.

Karketu Díli FC kontinua halo substituisaun hodi hasai Celcio Escurial (16) no Pedro Vicente (4) hodi hatama avansadu Gaudencio Monteiro (7) no Henrique da Cruz (27) iha minutu 79 no 87 ho objetivu atu bele halo atake ba ekipa Emanuel FC hodi bele halo impata no buka vitóri maibé laiha rezultadu ruma too jogu termina.

Hafoin jogo, Manajer Klubu Karketu Díli FC, Eliseu Isaac hateten parabéns ba ekipa adversáriu no kondisaun hotu ekipa Karketu Díli FC halo ona no teknikamente treinador sira mos halo esforsu no rezultadu hatudu katak Karketu Díli FC tenke simu derrota ba daruak nian iha jogu ohin.

“Ami simu ho fuan bo’ot, ami tenke ser hadia para hadoru jogu sira tuir mai no espera katak sei iha mudansa,” Eliseu Isaac hateten.

Jestór ne’e mos rekoñese katak Karketu Díli FC nia jogu monu iha liña klaran tamba ne’e sei halo esforsu hotu atu iha jogu tuir mai bele iha harmonizasaun ba kompozisaun jogu sira nune’e bele ganha vitória.

Iha sorin seluk, treinadór Emanuel FC Emiliano Ribeiro hateten parabéns ba nia Jogadór sira tamba halo ona esforsu, maske iha oportunidade barak atu marka golu maibé lakonsege no ikus mai tenke joga ho Jogadór 10 iha kampu laran maibé bele hetan vitóri hafoin Jogadór sira aproveita oportunidade ne’ebé iha hodi marka golu.

Eis avansadu selesaun nasionál ne’e hatutan iha jogu tuir mai nia ekipa sei hasoru servisu todan tamba Jogadór estrela Alexandre Moreira (9) hetan kartaun mean maibé sei halo esforsu atu ekipa bele halo preparasaun diak ba jogu sira tuir mai.

Jornalista: Vito Salvadór