Hatutan.com, (04 Marsu 2023), Díli- Jogu kontinuasaun Liga Futeból Timor-Leste (LFTL) primeira divizaun époka 2022-2023, AD SLB Laulara rekolla pontu tolu (3) dahuluk hafoin halakon nia adversáriu Emanuel FC ho skor 2-0.

Lee Mós : Klubu Primeira Divizaun Academica FC Halakon Aitana FC 3-0

 Maske tenke joga de’it ho Jogadór na’in-sia (9) iha kampu laran tamba Jogadór prinsipál na’in-rua (2) sofre kartaun mean iha minutu 28 no 90.

AD SLB Laulara manan Emanuel FC 2-0 iha kontinuasaun jogu Liga Timor-Leste Époka 2022-2023. Foto/Elio dos Santos da Costa

Ekipa AD SLB Laulara no Emanuel FC hanesan ekipa rua (2) ne’ebé forte iha Liga Timorense époka 2022-2023 tamba maioria Jogadór sira ne’ebé joga bá ekipa rua ne’e mai husi Jogadór selesaun nasionál sub-16 no sub-19 inklui Jogadór selesaun sub-23 no Jogadór Seniór sira ne’ebé kuaze iha esperiénsia joga iha LFTL.

AD SLB Laulara lansa kedas atake ba nia adversáriu Emanuel FC iha minutu uluk jogu hahú liuhosi Jogadór estrela Mouzinho de Lima (10) no ho atake ne’ebé iha halo ekipa rua hahú hasa’e kedan intensidade jogu entre ekipa rua hodi lansa kontra atake ba malu.

Jogadór Emanuel FC Juvito Moniz (3) simu kartaun kinur iha minutu-sia (9) hafoin halo falta hasoru Jogadór avansadu AD SLB Laulara Mouzinho de Lima (10), aproveita bola falta ne’ebé iha Jogadór Mouzinho de Lima (10) lansa kedas atake ida liuhosi suta bola falta maibé bola sai hosi alvu.

Ekipa rua kontinua hatudu jogu ida atrativu no ho táktika ne’ebé iha hodi kontinua halo kontra atake ba malu. Ekipa AD SLB Laulara lidera kedas jogu iha minutu 23 uainhira Jogadór Zenivio Mota (7) marka golu ida hodi muda skor ba 1-0 hafoin simu asisténsia husi Jogadór Jeremias Baptista (69) ne’ebé halo kolaborasaun jogu ho Mouzinho de Lima (10) iha liña avansadu.

Liu tiha golu ne’e, Jogadór AD SLB Laulara Zenivio Mota (7) tenke simu kartaun kinur iha minutu  25 hafoin halo falta ba Jogadór adversáriu. Liu de’it minutu tolu Jogadór Zenivio Mota (7) obrigadu tenke sai hosi kampu tamba deskonfia halo falta bá adversáriu no árbitru Pedro Braga ne’ebé lidera jogu ne’e fó kartaun mean.

Ho kartaun ne’ebé iha halo ekipa Emanuel FC kontinua hasae intensidade jogu hodi halo atake maibé falla atu aproveita oportunidade ne’ebé iha tamba ekipa AD SLB Laulara konsege antesipa ho di’ak hodi asegura sira nia baliza husi atake ne’ebé iha.

Ekipa Emanuel FC kontinua halo esforsu, maibé defeza adversáriu mantein disiplina no sempre halo auto defeza bá sira-nia ekipa liuhosi kombinasaun liña ne’ebé iha.

AD SLB Laulara manan Emanuel FC 2-0 iha kontinuasaun jogu Liga Timor-Leste Époka 2022-2023. Foto/Elio dos Santos da Costa

AD SLB Laulara mantein ho jogu ne’ebé defensivu hodi hein bola oportunidade no halo kontra atake liuhosi avansadu Mouzinho de Lima (10). To’o primeira parte termina ekipa AD SLB Laulara mantein ukun ho skor provizóriu 1-0.

Hakat bá segunda parte, ekipa Emanuel FC hola inisiativa hodi halo kedas substituisaun bá Jogadór iha liña klaran no defeza hodi hasai Zenidine Lopes (6) no Cristóvão de Carvalho (29) no hatama Angelito Tilman (8) no Afonso de Carvalho (2) ho intensaun bele halo tranzisaun bá táktika no kontinua buka oportunidade atu halo golu. Jogadór AD SLB Laulara Gumario Moreira (5) simu kartaun kinur iha minutu 49 hafoin komete erru.

Tama bá minutu 52, AD SLB Laulara hahú halo substituisaun bá Jogadór iha liña avansadu hodi hasai Michel Hutabarat (26) no hatama Alexandra Kefi (21) atu bele ajuda Mouzinho de Lima (10) uainhira halo kontra atake ba Emanuel FC.

Maske AD SLB Laulara joga ho Jogadór 10, maibé nafatin halo balansu bá ekipa adversáriu liuhosi Jogadór sira meiu kampu ne’ebé badinas no disiplina halo presaun bá iha ekipa adversáriu nia jogu.

Iha minutu 70, defeza Emanuel FC Juvito Moniz (3) sofre aleija no tenke sai bá liur no AD SLB Laulara aproveita oportunidade ne’e hodi lansa kontra atake no rezultadu pozitivu.

Tama bá minutu 72 Jogadór estrela AD SLB Laulara Mouzinho de Lima (10) konsege halo asaun individu di’ak no hatama golu ida hodi muda skor bá 2-0.

Ho golu ne’e halo ekipa AD SLB Laulara kontinua iha espíritu no vontade boot atu asegura vitória ne’ebé iha.

Emanuel FC kontinua halo substituisaun hodi hasai Julvito Moniz (3) no hatama Carlos Soares (23). Emanuel FC kontinua halo substituisaun hodi hasai Amâncio Araújo (18) no hatama Orlando Belo (21) iha minutu 76.

AD SLB Laulara hahú halo tranzisaun bá táktika no buka meius atu asegura Jogadór prinsipál sira ne’ebé kuaze kona kaembra tamba halo esforsu másimu iha kampu laran.

Tama bá minutu 80, treinadór AD SLB Laulara deside hasai Jhon Frith de Oliveira (6) no hatama Natalino da Costa (8). Liu de’it minutu rua, AD SLB Laulara kontinua halo substituisaun hodi hasai Mouzinho de Lima (10) no hatama Alexandre Lemos (9) iha minutu 82.

Ekipa Emanuel FC nafatin halo esforsu hodi buka oportunidade atu halo golu maibé AD SLB Laulara la fó biban tamba maioria Jogadór AD SLB Laulara halo jogu ida defensivu no disiplina uainhira ekipa Emanuel FC halo atake.

Tama ba minutu 90 AD SLB Laulara obrigadu tenke joga ho Jogadór na’in-sia hafoin Jogadór Gumario Moreira (5) simu kartaun mean. Motivu husi kartaun mean ne’e sai mistériu tamba Jogadór refere la komete erru ruma sériu maibé hakilar de’it nia maluk Jogadór AD SLB Laulara no árbitru konsidera ida ne’e erru no fó kedas kartaun mean.

Treinadór AD SLB Laulara, Julião Monteiro hafoin jogu hateten Parabéns ba Jogadór sira tantu AD SLB Laulara no mos Emanuel FC ne’ebé mak hatudu ona jogu ida kapas, maske iha insidente balun akontese durante jogu.

Nia afirma Emanuel FC joga kapas no ami nia ekipa AD SLB Laulara mos joga diak maibé arbitu ohin diriji jogu ne’e falla tamba desizaun ne’ebé foti iha kampu laran fo prejuizu ba ekipa AD SLB Laulara iha jogu sira tuir mai.

“Ohin ami nia Jogadór prinsipál na’in-rua mak sofre kartaun mean, ami nia Jogadór Zenivio Mota nia kartaun mean ne’e laiha esplikasaun klaru hosi árbitru no hakfodak fó kartaun mean maske erru ne’ebé Jogadór komete la todan no lolos árbitru la merese atu penaliza ho kartaun mean,” Julião Monteiro kestiona.

Treinadór ne’e hatutan nia Jogadór Gumario Moreira simu kartaun mean tamba de’it hakilar nia maluk Jogadór rasik maske nia asaun ne’ebé halo la ho liafuan mal.

Nia subliña árbitru sira presiza hadi’a sira-nia atitude oinsá dirije jogu atu nune’e labele prejudika ekipa sira ne’ebé partisipa iha liga époka ne’e.

Asistente treinadór Emanuel FC, Van Basten hateten, Jogadór Emanuel FC maioria kolen tamba oráriu ne’ebé ekipa ne’e hasoru kuaze ho de’it ekipa jigante no jogu halo diferente de’it loron rua.

“Ha’u nia Jogadór kuaze kolen, ami foin mak joga iha loron rua liu ba no ohin iha jogu tenke hasoru kedas AD SLB Laulara maibé ida ne’e laos razaun ami simu dereta ne’e no sei hadi’a ba jogu tuir mai,” Van Basten hateten.

Asistente treinadór ne’e subliña, derrota ne’ebé nia ekipa sofre ohin tamba Jogadór sira maioria mentalidade fraku, nune’e iha pasajen bola no kontra atake ne’ebé nia ekipa halo la iha efetivu nune’e tenke simu derrota ne’e.

Jornalista: Vito Salvadór