Hatutan.com, (24 Abríl 2023), Díli–  Partidu Os Verdes Timor (PVT) kompromete lori matak malirin bá joven Timoroan sira ho meiu loke kampu servisu  iha rai-li’ur bá timoroan sira.  

Lee Mós : Survey M-SRI: Maioria Respondente Hili CNRT no Hakarak Xanana Primeiru-Ministru

Liuhosi kampaña partidu Os Verdes Timor iha Kampu Futeból, Taibessi, Díli, Segunda (24/04/2023), Prezidente Os Verdes Timor,  António Lela Hunu Cruz, afirma, partidu Os Verdes Timor instala ona embaixadór verdes iha nasaun-10 atu bele simu verdes nia oan sira hosi Timor bá servisu iha nasaun sira-ne’e.

Kampaña partidu Os Verdes Timor iha Kampu Futeból, Taibessi, Díli, Segunda (24/04/2023). Foto/Elio dos Santos da Costa

“Tinan barak joven sira kumu-liman, maibé bainhira loke liman, liman mamuk hela. Verdes husu joven sira loke liman mai Verdes prepara imi nia pasaporte bá formasaun servisu iha rai-li’ur tanba Verdes instala ona embaixadór verdes iha nasaun-10 atu trata visa traballu bá verdes nia oan sira,” António Lela Huno hateten.

António Lela Huno Cruz husu bá verdes oan sira atu lalika ta’uk no lalika laran taridu, tanba  mezmu partidu ne’e la iha lider boot atu sai mata-dalan, maibé verdes nia oan sira iha esperansa lori naroman bá joven dezempregu sira.

“Ema balun dehan ita verdes beik ten de’it, la eskola, la servisu, ne’e loos, maibé hirak ne’e mosu tanba imi sira ukun ona ne’e mak halo ohin loron la iha servisu,” António Lela Huno  hateten.

Durante militante ho simpatizante sira-nia oin, António Lela Huno alerta atu joven verdes sira fiar aan halo polítika ho kosar-been atu bele fó fuan di’ak bá joven ain-tanan sira hodi la depende bá figura kaliber sira Timor nian ne’ebé ohin loron ema hana’i no hahí hela.

“Os Verdes lori buras, lori matak malirin bá joven iha Timor-Leste laran tomak tan ne’e husu lider sira hotu atu hadomi verdes no husu atu lider sira seluk  labele toman hatún Verdes sira tamba Verdes ne’e ki’ak no kbiit la iha,” António Lela Hunu Cruz  afirma.

Karik povu fó fiar bá Verdes, António Lela Huno hateten,  sei fó servisu bá joven dezempregu sira  no buka meius bá juventude dezempregu tanba joven nia partidu iha ona maka Verdes.

Militante Partidu Os Verdes Timor. Foto/Elio dos Santos da Costa

Partidu Os Verdes Timor mós kompromete atu utiliza osan subvensaun públiku iha Orsamentu Jerál Estadu (OJE) kada tinan hodi instala sentru formasaun verdes iha Munisípiu Aileu atu transforma juventude verdes sai juventude ne’ebé kriativu no kria servisu bá aan rasik.

Kampaña partidu Os Verdes Timor nian ne’e la’o ho di’ak no  hetan observasaun direita hosi Ofisial Supervizaun Eleitorál (OSE) hosi Comissão Nacional de Eleições (CNE) no membru PNTL Postu Administrativu Na’in Feto, Munisípiu Díli.

Jornalista Estajiáriu : Lazaro Pereira Quefi