Hatutan.com, (09 Maiu 2023), Díli– Tribunál Judisiál Primeira Instánsia Díli (TJPID) liuhosi Juiza Ercília de Jesus, Tersa (9/5/2023),  hola desisaun hodi aplika medida koasaun Prizaun Preventiva bá arguidu na’in-tolu ho inisiál EPdS, JPdS, APLA, no aplika mós medida kosaun aprezentasaun periódika bá arguidu RdCB, tanba deskonfia envolve iha kazu omisídiu iha área Kinta-Boot, Dili, hodi rezulta Dodi Adão de Sousa mate fatin.

Lee Mós : Polísia Kaptura Suspeitu Na’in-haat Ne’ebé Envolve iha Kazu Oho Dodi Adão de Jesus

Arguidu na’in-haat ne’ebé deskonfia involve iha kazu omesídiu hodi oho Dodi Adão de Jesus, iha área Kintál-Boot, Díli, Sábadu (06/05/2023), submetee ba prosessu Primeiru Interrogatóriu Judisiál iha Tribunál Judisiál Primeira Instánsia Díli (TJPID). Foto/Elio dos Santos da Costa.

Kazu omisídiu ne’e akontese iha kedas besik eskola Universidade Dili (UNDIL) nian iha Sábadu (06/05/2023), haleu tuku 01:00 madrugada Otl. Ministériu Públiku (MP), liuhosi Prokuradór Ricardo Goudinho Leite, promove kríme tolu bá arguidu na’in-haat bá kazu krime sira mak hanesan kazu Omesídiu Simplés, Armas Branka, no mós Omesídiu ho Forma Tentadu, tanba iha indísiu ne’ebé forte ‘tebes’.

Defensór Francisco Caetano Martins ne’ebé fó asisténsia legal bá arguidu sira hateten, desizaun Tribunál nian aas liu buat hotu, tanba ne’e, hanesan Defeza nafatin hakru’uk bá desizaun ne’ebé fó sai ona.

“Relasion ho situasaun ida-ne’e, ha’u la bele fó komentáriu, tanba Tribunál aplika prizaun preventiva. Ida ne’e, faze iha delijénsia bá primeiru interrogatóriu, tanba ne’e, ha’u labele fó komentáriu kona-bá desizaun ida ne’e. Kona-bá desizaun, ita hotu nafatin hakru’uk nafatin Tribunál nian, tanba desizaun Tribunál nian, aas liu buat hothotu,” Francisco Caetano Martins hateten.

Defensór Públiku ne’e dehan, karik sente la simu ho desizaun ida-ne’e, iha prazu legál nia laran, para sira atu rekorre bá iha Tribunál ne’ebé mak aas liu mak Tribunál Rekursu (TR).

“Iha situasaun bá kazu ida ne’e, iha arguidu konfesa katak, sira sona duni vitima ne’ebé mak iha. Mais ha’u labele esplika naruk tán, tanba prosesu sei iha segredu justusa nia laran,” nia tenik.

Observasaun Hatutan.com iha terrenu, nota katak, hafoin rona tiha desizaun Tribunál nian, Polísia Nasionál Timor-Leste (PNTL) liuhosi Ekipa Investigasaun Komandu Munisípiu Dili, transporta kedan arguidu sira ne’e bá kumpri sentensa iha Prizaun Becora, Dili.

Audiénsia primeiru interrogatóriu ne’e, prezide hosi Juiza, Ercília de Jesus, Ministériu Públiku (MP) reprezenta hosi Prokuradór Ricardo Goudinho Leite, no Arguidu sira hetan Assiténsia Legál hosi Defensór Francisco Caetano Martins.

Jornalista: Rogério Pereira Cárceres