Hatutan.com, (30 Maiu 2023), Dili-Comissão Nacional de Eleições (CNE) durante halo prosesu monitorizasaun bá atividade kampaña eleitorál iha ámbitu eleisaun parlamentár 2023 rejista krime eleitorál hamutuk 11. Hosi númeru ne’e, krime 7 aplika de’it sansaun administrativa, no krime haat seluk, CNE enkamiña ona bá Ministériu Públiku (MP) hodi prosesa tuir lei.

Lee Mós : 01 Juñu, CNE Submete Rezultadu Apuramentu Nasionál bá Tribunál Halo Validasaun

Prezidente CNE, José Agostinho Belo. Foto/Elio dos Santos da Costa

“Iha duni keixa reklamasaun hamutuk 11, 7 ita konsidera hanesan administrativu, ita rezolve kedas, fó kedas resposta. Iha 4 maka kategoria hanesan presiza tenke partisipa bá Ministériu Públiku. Ida, labarik maioridade tuir mós votasaun. Ita tenke investiga, mak haree dehan, sé maka fó. Iha mós ema estranjeiru balu ne’ebé tentativa no halo hela prosesu ida ne’e. Ita prosesa, no tán kazu balu ne’ebé uza ema nia kartaun bá vota. Ne’ebé, prosesu tomak ita haree hela, ita hakarak dehan transparénsia,” Prezidente CNE, José Agostinho Belo hateten bá jornalista sira iha Salaun Laline, CNE-Dili, Tersa (30/05/2023).

José Belo informa, krime eleitorál hirak ne’e, komete no envolve hosi partidu polítiku 17, sira-ninia militante, apoiante no simpatizante sira hotu, mak durante partisipa iha atividade kampaña eleitorál fulan ida, 19 fulan-Abril to’o 19 fulan-Maiu 2023 iha territóriu nasionál.

Hatán kona-bá, karik krime eleitorál sira ne’e mosu tanba iha orientasaun ruma, ka tanba intensaun hosi indivíduu rasik, José Belo dehan, liuhosi prosesu investigasaun mak bele deskobre.

La’ós ne’e de’it, presiza mós halo investigasaun hasoru sidadaun estranjeiru sira ne’ebé durante ne’e deklara sira asesu hotu kartaun eleitorál Timor-Leste nian, sé mak fasilita, no motivu saida mak sira fasilita ida ne’e

Jornalista: Rogério Pereira Cárceres