Hatutan.com, (13 Jullu 2023), Díli—Polísia Nasionál Timor-Leste (PNTL) liuhosi  Departamentu Investigasaun Kriminál (DIK), sei prosesa sidadaun na’in-rua ne’ebé deskonfia nu’udár na’in bá ID Facebook ‘Jonn Malic’ ho ‘Ela Variana’ bá Ministériu Públiku (MP).

PNTL sei enkamiña prosesu kazu sidadaun na’in-rua ne’e bá MP, tanba konsidera durante ne’e utiliza ID facebook falsu, hodi halo propaganda iha média sosiál to’o hasai lia-fuan aat ka trata, tolok no ameasa’ hasoru Eis Komandante En-Xefe FALINTIL no atuál Primeiru Ministru, José Alexandre Kay Rala Xanana Gusmão.

Lee Mós: Polísia Kaer Ona Na’in Bá Konta Facebook ‘Jonn Malic’

Komandante Jerál PNTL, Komissáriu Jerál Polísia Henrique da Costa informa, iha loron 10 no 12 fulan-Jullu ne’e, ekipa Investigasaun Kriminál bolu ona sidadaun na’in-rua, ida mane ho identidade loloos MJ (idade 30), hanesan na’in bá ID facebook ‘Jonn Malic’ no sidadaun feto ida seluk nu’udár na’in bá ID facebook ‘Ela Variana’, hodi halo prosesu identifikasaun, iha Kuartél Jerál PNTL Caicoli.

Ho identifikasaun ne’e, Investigadór sira sei enkamiña prosesu rua ne’e bá Ministériu Públiku, tanba nu’udár na’in bá asaun penál, hodi deside tuir Lei ne’ebé vigra iha RDTL.

“Iha loron hirak bá kotuk, ita halo ona xamada, ita bolu ona hanesan ID sira ne’ebé mak passa informasaun facebook. Ita bolu ona hodi halo identifikasaun tanba iha liafuan balun iha ne’ebá, tama ona iha ameasa. Ita halo identifikasaun, depois prosesu iha ona parte investigasaun, sei kontinua bá iha Ministériu Públiku,” Komissáriu Jerál Polísia Henrique da Costa hateten hafoin sorumutu ho ezekutivu sira RENETIL nian iha Faról, Díli, Kinta (13/07/2023).

Komandante Henrique defende katak, iha país ida demokrátiku hanesan TL, ema hotu moris lívre, maibé, tenke iha ninia limitasaun, tanba iha mós Lei seluk ne’ebé mak regula hahalok sira ne’ebé kategoria bá krime. Bainhira mosu aktu ruma ne’ebé iha indísiu forte ba krime ninian, husu atu labele sees hosi Lei.

Kona-bá notifikasaun ne’ebé PNTL halo hasoru sidadaun na’in-rua ne’e, mosu mós opiniaun pro no kontra katak, ida-ne’e limita ona ema ninia Liberdade bá Expresaun ne’ebé temi iha artigu 41, Lei inan Konstituisaun RDTL, Komisáriu Henrique dehan, sé ema ida ameasa ema seluk, sempre ema ne’ebé ameasadu sente la seguru.

“Entaun, ha’u ameasa ita-boot, ha’u atu oho ita-boot, ne’e ita-boot sente seguru ka la’e. Bainhira ita-boot sente la seguru, entaun ida-ne’e servisu polisia ninian,” Komandante Henrique hateten.

PNTL ninia atuasaun no intervensaun sira ne’e la’os bá de’it ema balun, maibé bá ema hotu-hotu.

Kualkér sidadaun mak la seguru bá ninia an, bele hato’o keixa nune’e polísia bele buka tuir, halo identifikasaun no prosesa tuir Lei.

Lee Mós: PNTL Kaer Tán Ona Na’in Bá ID Facebook ‘Ela Variana’

Jornalista: Rogério Pereira Cárceres