Hatutan.com, (27 Outubru 2021), Díli– Prezidente Repúblika seidauk deside data fiksu hodi dekreta kalendáriu ba eleisaun prezidensiál 2022.

PR Lú Olo akompaña hosi PGR Alfaonso Lopes, asina plaka inaugurasaun edifísiu Gabinte Sentraís PGR iha Colmera, Díli, Kuarta (27/10/2021). Foto/Hatutan.com

“Atu dekreta kalendáriu eleisaun depois tinan foun,” Prezidente Repúblika, Francisco Guterres “Lú Olo” hateten ba jornalista sira hafoin partisipa iha inaugurasaun Edifísiu Gabinete Sentraís Prokuradór Jerál Republika (PGR)  iha Colmera, Díli, Kuarta (27/10/2021).

Kona-ba atu re-kandidata fali ba Prezidente Repúblika periodu 2022-2021, Lú Olo, lia-tun dehan, seidauk to’o nia tempu atu ko’alia no bele fó sai ba públiku.

Inaugura Edifísiu Gabinete Sentraís PGR

Prezidente Repúblika, Francisco Guterres “Lú Olo” ho Prokuradór Jerál Repúblika,  Alfonso Lopez, hamutuk ho korpu diplomátiku inklui konvidadu importante sira, kuarta (27/10/2021), halo inaugurasaun ba edifísiu Gabinete Sentrais Prokuradór Jerál Repúblika iha Colmera, Díli.

Iha diskursu PGR, Alfonso Lopez hateten edifísiu foun ne’e sei akumula serbisu espesializadu Ministériu Públiku ne’ebé funsiona hamutuk ho Prokuradoria Jerál  Repúblika.

“Momentu importante ba istória MP hodi hatudu kreximentu no dezenvolvimentu, tanba ho edifísiu ida-ne’e PGR liu-liu servisu espesializadu ne’ebé agora iha kondisaun instalasaun funsionamentu seguransa ne’ebé di’ak ho dignidade institusionál,” Alfonso Lopez.

Reabilitasaun edifísiu foun ne’e, halo husi kompañia Bobolait Lda ho durasaun konstrusaun tinan ida, hahú husi fulan-Outubru  2019 no termina ka finaliza  iha fulan-Setembru  2020, maibé tanba pandemia COVID-19 ho aplikasaun serka sánitaria mak fizikamente  finaliza iha fulan-Fevereiru 2021.

Orsamentu konstrusaun ba edifísiu foun ne’e bazeia ba estimasaun no verifikasaun final husi Ajénsia Dezenvolvimentu Nasionál (ADN) ho montante $607.142,81.

Prezidente Repúblika enkoraja no solidariza serbisu Ministériu Públiku hodi ezerse funsaun ho di’ak.

“Ha’u mai manifesta, solidariedade no apoiu institusionál ba órgaun Estadu ne’e atu bele ezerse didi’ak funsaun nu’udar reprezentante Estadu no nain ba asaun penal iha relasoins jurídika nian,” Lú Olo hateten.

Tuir nia haree ba progresu serbisu MP durante ne’e katak maske iha dezafiu oi-oin ne’ebé kompleksu tanba krime sira ne’ebé tranzisionál, maibé tenke prepara aan di’ak hamutuk  ho operadór judisiais no polísia atu bele hasoru tipu kriminalidade ne’ebé iha.

Lú Olo  husu ba entidade hotu atu kontinua koopera no serbisu hamutuk ho MP in-terminus  lei hodi fasilita serbisu ne’ebé di’ak liu.

Jornalista : Carmelita Isaac