Hatutan.com, (04 Agostu 2023), Díli – Ezersísiu militár durante semana rua ne’ebé koñese ho naran Ezersísiu Dalan bá Dame bá faze datoluk nian termina ona ho susesu.

Lee Mós : EUA Oferese Aviaun CESSNA Bá F-FDTL Hodi Kontrola Rikusoin Tasi TL

Ezersísiu militár Dalan bá Dame. Foto/Mídia EUA

Ezersísiu  datolu ne’ebé hala’o semana rua iha Munisípiu Baucau foka liu kona-bá kuidadu médiku, navegasaun rai, tátika unidade ki’ik, no enjeñaria remata ona.

Embaixada Amérika nia Enkarregadu Negósiu Tom Daley hamutuk ho Xefe Estadu Maiór Interinu F-FDTL Koronél José da Costa ‘Trix’ Soares, Komandante Komponente Terrestre Koronél Domingos da Costa Soares (Dobu), no ofisiál lokál sira selebra ezersísiu Dalan ba Dame ne’ebé remata ona, Sesta (04/08/2023).

Haktuir hosi komunikadu imprensa ne’ebé Hatutan.com asesu, katak durante ezersísiu Dalan bá Dame, membru sira husi forsa armada Estadus Unidus no Timor-Leste dezenvolve relasaun no hametin sira-nia abilidade bá kuidadu médiku, navegasaun rai, tátika unidade ki’ik, no abilidade enjeñaria.

Bá primeira-vez enjeñeiru sira husi Forsa Navál Seabees EUA, Forsa Ezérsitu EUA, ho enjeñeiru hosi F-FDTL sira kolabora hamutuk iha atividade konstrusaun enjeñaria nian. Sira-nia esforsu hamutuk foka liubá hadi’ak klínika médika no projetu sira seluk ne’ebé sai ezemplu ba kooperasaun entre nasaun rua ne’e.

Ezersísiu Dalan bá Dame. Foto/Mídia EUA

“Ezersísiu tinan ida-ne’e hatudu eventu pioneiru barak hanesan eventu dahuluk hosi Navál Seabees EUA no Enjeñeiru sira hosi Forsa Ezérsitu Estadus Unidus servisu hamutuk ho Enjeñeiru sira huoi F-FDTL hodi hadi’a klínika médika baze nian, bá dahuluk F-FDTL no membru ekipa batallaun EUA hamutuk foka bá operasaun, lojístiku, no médiku nian no ba dahuluk Padre Kapelaun Katóliku hosi Forsa Aérea EUA nian hala’o atividade relijioza no envolve ativu ho Timoroan nia lider relijiozu sira, no mós ba primeira-vez maka Rhode Island Guarda Nasionál partisipa ona iha ezersísiu ida-ne’e,” Enkarregadu Negósiu Tom Daley hateten.

EUA iha kompromisu bá parseria ho Timor-Leste. Tinan ida-ne’e,  hala’o ezersísiu CARAT, Asina Akordu Parseria Estaduál ka SPP, no entrega Aviaun Cessna; enkuantu oportunidade aumenta, ami iha intensaun atu fornese nafatin.

Bainhira ezersísiu Dalan bá Dame Datoluk ne’e remata, atinjimentu no susesu hamutuk ne’e sei dezenvolve kapasidade forsas rua ne’e nian no kria oportunidade ba kolaborasaun liután iha futuru hodi asegura Indo-Pasífiku ida-ne’ebé mak Livre no Nakloke. Estadus Unidus Amérika orgullu halo parseria ho Timor-Leste no mós hatudu kompromisu ba apoia nasaun ne’e nia soberania, seguransa, no prosperidade.

 Jornalista : Lazaro Pereira Quefi