Hatutan.com, (05 Setembru 2023), Díli-Xefe Estadu Maior FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” ho Governadór  Institutu Nasionál Reziliénsia ka Lembaga Ketahanan Nasional (LEMHANAS)   Repúblika Indonézia, Tersa (05/09/2023), hasoru-malu iha Díli, hodi diskute koooperasaun iha área defeza no seguransa Timor-Leste ho Repúblika Indonézia.  

Xefe Estadu Maior FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” halo enkontru ho Governadór LEMHANAS Repúblika Indonézia iha Kuartél Jenerál F-FDTL, Díli, Tersa (05/09/2023). Foto/Mídia F-FDTL

Portavós Komandu F-FDTL, Capitão de Mar e Guerra João da Silva, esplika, prezensa hosi Governadór LEMHANAS ho nia estudante sira ne’e, hanesan vizita kortejia ida ne’ebé mak delegasaun ne’e halo. Vizita ida ne’e mós, hanesan vizita Estudu ida dahuluk nian mai Timor-Leste, liu-liu iha Kuartel Jenerál F-FDTL.

“Ko’alia oitoan kona-bá kooperasaun defeza, seguransa ho Indonézia, no mós iha área kooperasaun iha nível akadémia militár sira ne’e,” Capitão de Mar e Guerra João da Silva, informa bá jornalista sira hafoin halo akompaña bá sorumutuk ne’ebé hala’o iha Kuartel Jenerál F-FDTL.

Hatán kona-bá regra sira militár nian ne’ebé F-FDTL bele fahe, portavós João da Silva dehan, regra no regulamentu sira militár ne’e, buat ki’ik ida ne’ebé maka interna F-FDTL nian. Tanba ne’e, enkontru ohin ne’e, diskute de’it kona-bá área sira iha nível estratéjika nian.

Advertisement

Iha biban ne’e Guvernadór LEMHANAS RI, Andi Widjajanto esplika LEMHANAS hanesan instituisaun ida Estadu Indonézia nian, ne’ebé fasilita formasaun bá rekursu umanu  militár  nian. Nune’e,   liuhosi enkontru ne’e ko’alia oinsá mak  F-FDTL bele haruka nia ofisial sira tuir formasaun iha LEMHANAS.

Jornalista Estajiáriu: Lazaro Pereira Quefi