Hatutan.com, (20 Setembru 2022), Baucau–Xefe Estadu Maiór Jenerál FALINTIL-Forsa Defeza Timor Leste, Tenente Jenerál Domingos Raúl “Falur Rate Laek”, Tersa (20/09/2022), ofisiálmente nomeia  Tenente Koronel João Bosco Ximenes, lidera Batallaun Infantária iha Kosta Norte ho Tenente Koronel Henrique Piedade da Costa, asume kna’ar nu’udár komandante bá Primeiru Batallaun iha Kosta Súl.

Lee Mós : Falur Husu Soldadu Foun Komponente Navál 68 Leal bá Instituisaun

Xefe Estadu Maiór Jenerál FALINTIL-Forsa Defeza Timor Leste, Tenente Jenerál Domingos Raúl “Falur Rate Laek” nomeia Tenente Koronel João Bosco Ximenes, lidera Batallaun Infantária iha Kosta Norte ho Tenente Koronel Henrique Piedade da Costa, asume kna’ar nu’udár komandante bá Primeiru Batallaun iha Kosta Súl. Foto/Espesiál

Tenente Jenerál Domingos Raúl “Falur Rate Laek” konsidera nomeasaun bá komandante na’in-rua ne’e, hatudu katak iha duni kresimentu no dezenvolvimentu iha forsa armada TL nian.

“Ne’e kontinuasaun investidura bá lideransa instituisaun nian iha fulan-Fevereiru 2022. Tanba ha’u hetan nomeasaun ne’e, book to’o iha kraik. Ohin, ha’u halimar ho sira, ha’u dehan, loloos, imi fó obrigadu no parabéns bá ha’u, imi la fó tán. Tanba ha’u sa’e ne’e maka, imi sira ne’e sa’e ne’e. Lae karik, sira ne’e la sa’e, mate hela de’it iha fatin,”  Tenente Jenerál Falur Rate Laek, hateten, hafoin seremónia nomeasaun bá komandante na’in-rua iha baze Komponente Terrestre Primeiru Batallaun nian iha Baucau, Tersa (20/09/2022).

Kona-bá preparasaun fatin, liu-liu ligadu ho kondisaun sira postu seguransa nian bá  membru sira ne’ebé destaka, hodi hala’o servisu, oras ne’e, ekipa tékniku sira konklui ona ninia instalasaun sira hotu iha parte Norte ho Súl, no mós iha territóriu Timor laran tomak, no liu-liu iha área sira fronteira nian.

“Ida ne’e kondisaun ita-boot sira hatene, foin lalais iha Oé-Cusse, iha Alto Lebos, iha Cova, Tunu-bibi, iha fatin sira ne’e iha ona, para bele sira bá destaka iha ne’ebá, halo misaun iha postu destamentu sira hothotu iha TL laran tomak,” Komandante Falur Rate Laek hateten.

Iha parte Norte nian, komandu batallaun ida sei tau iha Munisípiu Ermera, tanba hetan apoiu hosi autoridade komunitáriu sira, hodi oferese ona fatin balu, no dadaun ne’e kondisaun sira hotu instaladu.

Falur Rate Laek agradese bá Governu Austrália, liuhosi Militár Austrália sira iha Timor-Leste, tanba maioria investimentu sira iha dezenvolvimentu Postu Seguransa sira mak destakadu iha fronteira ne’ebá, lojistikamente sira mak apoia bá F-FDTL.

Jornalista: Rogério Pereira Cárceres